La Vie Avec Amusement: 09/01/2009

魚翅中蝦宴
同三舅父及Ivan困獸鬥開足一日會之後，整條team去太古城「西苑」黎個division dinner。

雖然老細話食好d，但都無謂太大魚大肉，閒日既套餐唔算好貴，$2688十二位用既"魚翅中蝦宴"，碟頭大到要打包：

六小福(精裝燒腩，爽脆海哲頭，大哥叉燒，鹵水豆腐，台式牛展，脆皮素鵝)

如意翡翠炒帶子皇，紅燒花膠生翅

鮑魚菰扣鵝掌花菰，砂窩薑荵海班腩

上湯焗生猛中蝦伊麵，頭抽霸皇雞

魚湯鮮腐竹浸時蔬，皇庭招牌炒飯

杞子菊花糕

呢味外加既"啫啫蝦醬唐生菜"，係因為當我地步入酒樓時，被此香味吸引，三舅父點名叫既。

睇婦科

差不多廿年都無睇過既婦科醫生(做sales時call唔算)，今朝就透過Sinmei打個尖，schedule左個appointment。

皆因上星期發現小便後有少少血絲，但就唔係姨媽到訪。Spotting其實可大可少，不能掉以輕心；因為簡單如排卵時期既ovulation spotting，到大穫野如卵巢子宮毛病，都可以有呢個症狀。所以都係拿拿臨去驗個清楚求安心。

介紹既婦科林靜鴻醫生，位於旺角銀行中心11樓；斯文中坑一個，人就頗nice而且算細心。原來余經理老婆外家所有女性都係佢客仔。

做左個超聲波，無異樣，都放下大半心。發現原來係子宮頸有少少損，佢話可能係輕微發炎導致，順便做埋個papsmear，過兩日可以打去問報告。據稱呢類case頗常發生，所以只要自己observe就無大礙。

因為佢同惠氏樓下既sales同事熟，收平左$100添。Consultation $250+Ultrasound $300+Papsmear $300，唔算貴；拿佢個referral letter，檢查部份可望全數claim到，診金都有8成，抵!!

新梳化

梁師奶去年已經想整張白色皮梳化，呢排整襯膝蓋日日坐得多，更加速佢換左個舊既Ikea梳化床既決心。

本來話下午送貨，傢俬舖送貨有拖無欠，但就要我地等到晚上8pm後先黎。

新梳化係全白梳化床，但加硬既後果係有如坐地下；哈，反正咁對脊骨會較好。

唔知烏烏會否整篤尿黎霸地盤呢？佢細個時就響舊梳初報到時試過。

威尼斯人慶雙十？

公司10/9號傍晚拉大隊過大海開cycle meeting，入住威尼斯人一晚，第二朝10/10只係早餐後一粒多鐘既award ceremony，大家就自由時間。

睇個行程，擺到明就係開會為藉口，員工旅行就真。

最豪既係每人一房，加埋晚上個"馬交風"buffet dinner同meeting package，成本都要$2600一位。而且額外既船飛，可獲買一送一優惠，變相鼓勵大家帶埋家屬去住。

其實晚上食埋buffet，段估都無人會即返上去個suite度睡大覺；出去hea兼黎個宵夜，第二朝又要早起食早餐開會，實則留響房既時間得幾粒鐘。一人一套房，太浪費了吧。

賣？不賣？

傳聞中既Day One會係十月中，近排都收到美國阿公既mail，講解Day One後眾經理級手頭上既惠氏股票，點樣轉去Pfizer股。

觸發大家都考慮既議題：Day One前賣掉可行駛既認股權，同埋可買賣既實股？定係等變到對方股票後期望個價會更好？

另一個大家都會做既野，係登入美國manage我地呢d惠氏小股東資產既Morgan Stanley Smith Barney網頁，各自既account去確認買賣既方法。

尋晚我就手痕，賣左手上可exercise既Stock Option(當然係差價有得賺既部份啦)；被HR同事笑衝動，因為佢地現階段計緊數，個惠氏股價應該再有得上。

好，拿住其餘實股，靜觀其變。

9T4飯局@Namh

身為9T3(即多倫多大學93年畢業)，會不定時出席低我一屆既9T4聚會，主要都係因為熟稔既Gigi & Shirley都係9T4。

因為大家返工地點分得好散，揀個中間位Elements黎個飯局。大鄉理既我，都係第一次踏足呢個mall，感覺只係一個大碼既IFC。Namh主打fushion泰/越菜，整個環境好似Thai Basil。

兩年無見既師弟妹們，有的做左阿媽，有的轉左工。最一成不變既都應該係我同Shirley。

味道不過不失，碟頭唔細就真既。

惹味蝦片小食，串燒沙爹雞/牛($68)

海鮮冬蔭($68)，香脆蟹肉薯餅($88)

炭燒豬頸肉($88)，香芒牛油果軟殼蟹卷($108)

黃咖哩蜜豆雞($132)，素菜金邊粉($72)

蒜蓉白菜($52)，蒜蓉菠菜($48)

Mango Sticky Rice, Jasmin Coconut Cream Sauce ($58)

Melting Chocolate Pudding served with White Chocolate Ice Cream ($68)

新黑莓

部Blackberry唔經唔覺用左兩年，夠期去write off換部升級版新玩具。

新的Blackberry Bold比之前略大(因為個screen相對地大左)，背面係包皮，而且有200萬丈數相機。雖然唔係市面上最新既Storm型號，但摸上手頗有質感。

舊機就咁拿去write off著實有點浪費，但又唔可以過比余經理，因為公司規定黑梅使用者一定係director grade或有頻密travel needs；就算比部硬件佢，無network plan都係枉然。

原來係旁系韌帶受傷

見梁師奶呢兩日隻腳有番d力，而且可以慢步自己行，朝早告半日假同佢出尖沙咀睇脊醫。

雖然佢發神經地嫌的士貴想坐地鐵去，我半迫半嚇佢話如果因為慳少少錢再整傷的話，辛苦既其實係我囉；佢就乖乖就範打的到門口。

位脊骨神經科醫生叫李嘉祿，係教友介紹既，聞說同天主教都好多聯繫，而且人頗細心。

問症細摸關節兼到樓上再照X光，斷診既結果係：膝蓋少少退化，兩旁韌帶發炎，上星期因為入門口想轉身關門時扭到，導致旁系韌帶受傷(下圖之MCL)。無乜特別療程，只係呢段時間多休息，等佢自己恢復。

但佢話飲牛奶反而對傷口唔好，有d人飲牛奶骨質流失反而更多，建議轉飲羊奶；呢點我就唔多明，要google一吓。另外需多補充維他命D，因為對muscleskeletal growth有幫助；而且近年有甚多新數據要提升Vit D攝取量。所以除左一粒Centrum Select同兩粒Caltrate+D所提供既800IU外，可能要額外買Vit D3補充劑。