Twins x 張敬軒

今日既新都城商場，真係有d西門町feel。

2:30pm於二期商場有Twins Party簽唱會，同一時間一期商場又有張敬軒簽唱會。論fans同路人甲人數，當然係Twins虛撼好多啦；其實真係應該叫埋巢樂然過黎睇，因為佢都係一個Twins迷。

我呢個無聊屋苑師奶，就穿梭於兩個商場兩邊都撈一撈。

阿Sa整左個米奇式爆炸頭，真係有d嚇人；反而阿嬌既Bob頭就順眼好多。

張敬軒仍然係一附道友look，訪問時間居多，簽碟就十數分鐘攪點(睇怕無乜人買之故)。

我真係越來越頹廢，梁師奶唔該你快d返!!

助養狗女
早前以月供形式，響愛護動物協會助養左隻狗。

剛收到該會寄黎既相，原來無獨有偶都係西施狗，全白色，6歲，叫Money既狗女。

被違棄既原因係"無暇照顧"。

睇佢個邋遢樣，再望望身邊既阿烏，真係同狗唔同命。希望快d有好心人會領養佢啦。

所以決定養寵物前，真係要諗清楚，要負責佢一生一世，唔可以話養時貪得意好玩，但年紀開始大多病時就違棄。

奶奶的手信

估唔到連烏烏都受惠，奶奶帶左兩條日版狗仔波板糖比臭烏!!
雖然外型係波板糖，實則係乾雞肉做既snack；有芋頭同蕃茄味，連條棒棒都食得。

先開左蕃茄味比烏烏做下午點心。不過當然唔可以成條比佢要"碎上"啦，以佢好似餓鬼投胎咁猴擒，一定哽死。

一班金魚Auntie
廖太幫奶奶慶祝生日，為左就我兼探阿烏，佢地拉大隊入黎將軍澳樓下商場「客家好棧」食飯。

奶奶同阿丁先上黎坐左陣，阿烏一見到有訪客，表現有d興奮。今晚真係勁熱鬧，連好少蒲頭既阿大貓貓同阿寶都黎到，再加埋奶奶個女，一行十四人浩浩蕩蕩。

因為實在有太多"姨姨"要探呢個皇帝仔，我把心一橫，用手推車偷運阿烏入酒樓。












好彩放響角落唔多起眼，加上人多地方噪雜，個衰仔吠都唔係太覺。

一餐飯落黎，個個都話我簡直似d推住BB車既師奶，不時要分心安撫個好奇兼發出不耐煩聲音既死仔包。

餐飯真係把鬼，除左鹹，都仲係鹹。"大班兩味"先係太鹹食唔落口，整過碟又太腥(唔通係魚唔新鮮至要醃咁鹹？)埋單仲要自己出去reception比錢，大佬，堂堂稻香集團酒樓，你估茶餐廳咩！！

多留一日

本諗住下個月去伊斯坦堡11號早上present完個Centrum marketing plan之後，12號就早機返港。

同事門連travel agent條女都話我傻，呢d平時少會去旅行既地方，十多個鐘飛機，都唔留多日到處觀光。聞說當地扒手勁多，如果得我一個，周圍hea既意慾真係唔大。

今期「新假期」介紹Istanbul，裡面既市集Brand Bazaar, Spice Bazaar都頗吸引。結果的起心肝，Email問大陸幾位同一朝present既同事有無觀光計劃。

既然有人做伴，決定多留一日。成唔成事要睇次日後補機位會唔會confirm到，真係旺，商務客位都要後補。

八月十七的月光

中秋無出外賞月，結果今晚check Email期間無意抬頭見到窗外又圓又大月光。

學阿丁咁馬上舉機。

原來郊區師奶悶極無聊，真係會影月光，閃電，烏雲架，哇哈哈。

色，戒
實在太太太太無聊，雖然早前阿丁同Connie都話有興趣睇呢套戲，但又無理由叫佢地山長水遠入黎將軍澳睇戲架(車費時間都蝕埋)，所以都係決定獨自"享受"呢套三級片。

樓下MCL將軍澳，9pm。

自威尼斯得獎後，無論電視同雜誌都狂谷宣傳。雖然用片內梁影帝同湯唯既激烈床戲作為賣點，但其實張愛玲既story line更吸引：愛國少女色誘大漢奸，結果動左真情放佢一條生路，此舉送自己上死路。

歷史亦好似真有其人。

以新人黎講，湯唯演得甚至比章子怡出色。李安亦一洗"臥虎藏龍"同"斷背山"既隱隱晦晦，拍一套比較直接既戲。不過講真，兩個半小時既戲，真係有d長；前段節奏可以快d。

人狗兩團圓

公司下午於太古城「西苑」食完個company lunch後就早放，咁當然我無咁傻告下午假，所以今日改放早上，施施然蒲頭食個晏又返歸。

呢兩年「西苑」個部長都會送盒月餅比ｄ經理級，去年比左梁師奶益樓下管理員，今年得我同阿烏二人世界，拎都費事，醒埋比余經理。

梁師奶就響多倫多不時大魚大肉，梁大少又帶同女友飛曼谷風流快活，我今晚就多餵烏烏ｄ粒粒同佢"做節"啦。

憶蓮Live07

Connie臨去泰國旅行前交托我，用東亞白金卡優先預訂十一月份既林憶蓮演唱會門票。今朝9點開始狂打電話，好彩都只係用左15分鐘就打通，訂到11月10日第二場既$680門票。

本來無諗住去既我，既然有人陪，no harm去湊熱鬧。

地點係交通唔多方便既九龍灣展貿，真係唔明點解要收得咁貴；差不多比紅館既最貴飛多成50%。加埋每張$16既手續費同$22掛號費.......希望物有所值啦。

烏烏的訪客

下午Annie攜同佢媽咪由杏花邨過黎新都城探阿烏烏。4點半過到黎，剛好係阿皇帝仔出去行街街既時間，一行3人陪住佢去公園walk walk；真係巴閉。

一號風球底下，雖然風大，好彩行完先落大雨。

返到上樓佢地等我洗完腳腳，服侍埋佢食snack，我地先落去自己搵食。

雖然商場食市林立，但要就auntie食得清淡，所以去左份量頗大但味道一般既「澳門麗都葡國餐廳∕台灣牛肉麵」食左ｄ所謂台灣菜。

將軍澳出名多人，週日唔訂位真係邊度都要狂等。

極無聊中秋晚會
今晚平台花園有中秋晚會，話有燈謎，表演同抽獎。

其實康澤都有攪，平時既我，真係睬佢都傻；但家陣慘變師奶，一反常態落去hea。

會所門前燈謎區人山人海，見到咁既陣勢都無謂迫啦。行過網球場隔離既表演台，只見抽d小朋友上去玩遊戲。一眾家長就頗有心機圍觀，又唔係我烏烏有得上台，行左一圈就返上黎啦。

梁師奶今日就風流快活去尼加拉瓜瀑布賭場食buffet，難為我就差d悶到嘔泡，過d早睡早起既生活。

10月新娘

轉左工半年既Gladys，離開左惠氏先得閒攪結婚。

可惜擺酒當日我半夜機飛土耳其，否則佢都跟左我地個division條數幾年，就算唔再係同事都應該去飲。

連同唔會去飲既Martha & Debbie，襯佢今日返黎派帖，一齊去「稻穗亭」食晏恭喜佢。夾份送左對水晶啤啤結婚熊“我願意”作為結婚賀禮；雖然係我親身買，但ｄ咁可愛既擺設，當然係Martha指定架啦。

露宿

訓左數日梳化床既我，呢兩晚返風，平時自己唔會開窗訓，但梁師奶為左屋企空氣要流通，客廳同廁所都會開住窗扯風。

今朝臨天光大風到簡直有d打風feel。由涼爽到覺得凍，因為只係帶左個口水枕頭而無帶薄被過黎，攬住阿烏瑟縮左一陣都係訓唔番，甚至有諗過撕開本明報周刊黎蓋(街邊d乞兒都係蓋報紙取暖咋)!!

真係慘，響自己阿媽屋企訓到有d街頭露宿feel。

命運自選台
上一套有d失望，尋晚呢套就喜出望外。

去年Damon已經推介過，真係有d人生哲理架。

故事同狄更斯既小說Christmas Carol異曲同工。

建築師米高，有漂亮賢慧的妻子和兩個活潑可愛的小孩，生活羡煞旁人；但他總把事業看得比其他一切重要。和妻兒同一屋簷下，卻難享天倫樂。一天，他在一所家庭用品店得到了一個神奇遙控器，米高赫然發現這個竟可遙控人生！它既可跳過無聊時間、暫停失控場面、除去令人生厭的「噪音」，甚至能倒轉時光回到被遺忘的美好時光……
結果，就連同家人相聚既珍貴時光都一併跳過。

一覺醒來，原來係南柯一夢。仍然有機會補償失去既親情。

除左哲理，仲加插左唔少笑料；真係唔錯既推介。

瞞天殺局
悶極無聊，除左帶備多套日劇入將軍澳，亦都買左d之前想睇但又無時間入戲院睇既戲黎煲。

對呢套戲既卡士同佈局頗有期望：Anthony Hopkins演既智慧型殺人犯，加上一個年少氣盛，初頭低估左對手既檢察官，上演一套完全犯罪鬥智鬥力既戲碼。

不過，故事結構同舖排真係有d失望。雖然為左搜尋凶器(手槍)大費周章，亦差點比凶手途過法網，但個twist比想像中簡單，唔夠懸疑。

全職師奶

今年剛榮升阿媽既Martha，早兩日做左個決定，就係做個全職師奶。

為左個仔咁大犧牲，當然尊重佢既決定；萬大事永遠屋企行先，一份工始終都只係一份工啫。

好彩佢會11月開始，暫時以半日part time幫我地頂住，直至搵到合適人選為止；無咁倒瀉籮蟹。

一日兩次，每次45分鐘

每日6:15am同4:30pm既活動。

佢就施施然咁行，總會放低4-5噠同兩條(好易估啫)。

行完回程時我都會陪佢響公園凳凳度坐一陣，望吓人，吹吓風。

學Piann話齋，我地就係佢全世界，總不能除左一日幾餐等食之外，就係趴響屋企望天打掛終其一生架。我地就話有手有腳自己出街啫，佢地就日日等我地陪佢。

雖然煩，但養得佢就要負起責任；難為梁師奶日日都要當人仔黎服侍。

查家宅的Visa

朝早拿拿臨閃返屋企囉埋護照同bank statement，返工又拿拿臨清埋d debit notes，趕頭趕命11am飛的去銅鑼灣Sino Plaza 3樓既土耳其辦事處申請十月去Istanbul開會既簽證。

哇，持有加拿大護照，個visa申請表都4頁長；除左公司信外，又要出示過去3個月糧單，銀行存款證明，填寫自己父母兄弟姓名，宣誓有無配偶，學歷背景同工作背景......真係見工既CV都無咁詳細。

大佬，你慌我手持加拿大護照，會去土耳其賴死唔走做黑工咩？

個office極細，得3張凳，好彩亦無人排，20分鐘內攪掂，星期五有得囉。

仲趕得切去轉灣既「澳門茶餐廳」12點前食個醒晨葡式早餐添。

來來曱甴屋

之前都聽梁師奶講話夜晚會有曱由仔出沒，終於都見識過。

我屋企因為唔會煮食，亦都唔會有乜食物外露，所以塵就大把，曱由欠奉。

頂唔順尋日落惠康買左盒「來來曱由屋」，一盒有5個，我就先放4個分別響廚房，鞋櫃頂同睡房窗邊。

今朝一檢查，哇哇哇，有料到！廚房兩個分別都有數隻曱由黐實響裡面，郁都唔郁唔知死左未。不過就算未死，見佢地蠟像一樣，都命不久矣。

就等呢3個星期，我幫梁師奶黎個曱由大屠殺！

古巨基新都城Moments簽唱會

估唔到做3個星期將軍澳師奶都有星撈。行過商場見到海報話下午3點有古巨基，既然無所事事，無理由樓下有function都唔望兩野。

新都城二期不時週日都有function攪，之前Connie睇阿Rain都有黎過。As usual，遲廿分鐘至開始；又講環保又講學生d小發明，玩多個無聊遊戲，終於都唱左首"愛回家"。

我聽埋首歌就響應佢既歌名打道回府喇，因為4pm夠鐘去dog walk。