年會"八"獸賀歲造型

下星期去Bangkok既年會，都係途唔過要表演既命運；今年仍然係問廣告公司借衫，然後至設計劇目。
本來諗住咪咀唱首秋官阿姐既"歡樂年年"，但為略表誠意，決定今個星期拉大隊去Noon K每人幾句自己唱。

朝早大家分costumes時一輪擾攘，結果我捨棄造型可愛既長頸鹿(因為個頭套太墜)，而選熊貓。

等齊人，要黎個dressed rehearsal；不過難題係：邊間Ｋ有錄音服務？

一嚐為食心癮

竟然比Connie發現，太古城APITA有售Walkers Scottish Shortbread既兩條裝!!









哇哈哈，呢個簡直係偉大既pack size；專為我地呢d鍾意食又怕肥既人而設。其實買大包錢唔會貴得好多，但浪費係最大問題；食一塊扔掉太折墮，食晒落肚就更對自己唔住。

所以襯佢今日下午過黎做facial，我地去「味皇」短聚，黎個quick noodle。

今晚會將呢兩塊餅解決掉。

9T4飯局

除左Shirley外，低我一屆既9T4都有兩pair返黎香港渡假。既然咁人齊，就相約鯉魚門食海鮮。我呢個9T3因為Gigi同Shirley既關係，當年同佢地唔算太熟都叫做傾得兩句，所以黎"黐餐"。

因為細路們唔多鍾意食海鮮，所以事前先到MaCafe黎個chicken nuggets同shake shake fries打定底。

經師弟Jacky推介，今次試一間叫「港龍」既酒家；裝修算新淨，而且仲比左間門上標誌住"華聯高球會"，牆上掛有Golf Clubs display既廂房。

對於居住多倫多既人黎講，有部份海鮮如癩尿蝦真係好難食得到。基本上今晚既海鮮碟碟份量頗大，同味道都有水準：白灼中蝦，避風塘癩尿蝦，清蒸大東星，豉汁蒸大連鮑，砵酒焗生蠔，豉椒聖子皇......

貴唔貴？唔知，因為係剛結婚但無請飲既Vinky好客氣地埋單；多謝多謝！

輪米雞蛋仔

約左班低一屆9T4既師弟妹食飯，之前先同Gigi, Dave及Shirley去佐敦碰頭。

本想搵地方坐低飲野，但經過彌敦道呢間多人到要派籌既雞蛋仔檔，唔知真係以為有米派添呀。羊群心理驅使下，我地都一齊企街邊等足十多分鐘，為左一底熱辣辣脆卜卜既雞蛋仔。

唔甜兼香趣，$12一底的確有d水準；但要等咁耐，除非真係好得閒啦(不過睇現場情況，香港真係幾多閒人)，否則偶一為之好喇。

Scottish Shortbread

晚飯時剛睇到陶傑既「細說名城」介紹蘇格蘭愛丁堡，非常吸引。









一直都嚮往去呢個城市，除左當年梁生曾被香港政府派去愛丁堡進修，自小猛同我推介當地夏天一流既風景，同入夜後大到伸手不見五指既古堡酒店外，最吸引我，係整個城市都充滿巫術既傳說；夠鬼異，我鍾意。真羨慕Damon下星期會去呢度除夕倒數，雖然旅費唔平，但氣氛搭救。

當年J.K. Rowling都係響呢度得到靈感，寫出一系列既Harry Potter小說。









當佢介紹到製造當地聞名既Scottish Shortbread時，我真係有ｄ吞口水架。自中學生時代後，都無掂過呢款勁牛油，肥死人不賠命既餅乾。

剛才返到黎屋企樓下，真係有入惠康嘗試去搵；好彩佢無入呢款餅，救我賤命.....近排唔可以入馬莎，真係會忍唔住誘惑架。

唓！呢d邊鬼度叫"床戲"呢？

「惡作劇2吻」一開播，就因為中視刪減左數分鐘既床戲而令人大失所望；之後八大GTV再重播足本版，攪到ｄ友再load過黎一窺全豹。



睇完呢四分鐘....汗....呢ｄ都叫床戲？元暢，你真係要跟影帝Tony學野喇，同易先生差十萬八千里噢。

Choco Pudding in X'mas Cup
Starbucks聖誕出左呢款連瓦杯裝既甜品。

個杯就真係幾別緻，但內餡(上面實地朱古力mousse，同埋底下既咖啡軟mousse)都勁rich!!

而且價錢比平時既甜品貴50%，盛惠38大洋；肯定係落向呢隻杯既成本上。

Boxing Day Tea一Tea
被流放塞班島十多日既Charlotte實在太掛住我地，所以順應佢要求，Boxing Day約廖太們到世貿Rice Paper 4:30pm黎個tea gathering。

呢ｄ咁既"吉日"見面，當然唔少得交換禮物啦(亦要多謝埋Carol為我減肥大計絆腳石送既朱古力，同埋巢樂然自掏零用錢送我既滴餾咖啡)。

雖然大家都話食左午飯，下一餐亦都迫緊埋身，但仍好有胃口地清左：雞/牛沙嗲，芒果蝦/香荵蝦米紙卷，炸軟殼蟹，蝦乾柚子沙律....同埋唔太熱兼勁甜既越南咖啡。
唔通係我地去日本齊齊撐大左個胃？

潮式芋頭Pizza

好耐都無去樂富。

本來約左林氏姊妹去唱K，但林auntie話實在太耐無見我，所以"召"我過去「榕江」飲茶。

一出地鐵，周圍都圍晒板，真係差ｄ唔認得路。

大半年無見過林auntie同uncle，感覺上林uncle身體比之前壯健精神左。

對要嚷著要"食草"既我，飲茶咁肥膩真係唔多吸引；不過潮式既"芋頭Pizza"確實係幾香口，忍唔住整左兩件添。

死，去日本增左既磅，幾時先減得番？

相約「懷智」

第二年跟梁師奶，連同細佬及其女友到將軍澳基督教懷智服務處，聖誕夜帶班智障人士去尖東賞燈飾。

細佬本有兩個同事答應會黎幫手，但好無責任心地臨時放飛機；其實做義工點可以咁架？佢地一場期待，食飽飯ready好晒，先話因為有d報左名既義工no show而要留下，試問點過意得去？

其實整個流程好快，7點多跟大隊坐大巴出發去尖東；落車後一對一拖住佢地慢慢行半小時，不時同佢地講吓野，返上大巴往人多既新世界半島一帶兜左個圈，唔駛9點就散。

我今次既partner唔係去年患自閉症既詠恩，而係輕度弱智，患唐氏既震偉。震偉比較開朗，好似一個好乖害羞既青年咁默默跟住我行；只係口齒不清，所以往往要估佢想講乜。

細佬就比較challenging，帶一個有視障，只可見光和影，但見到光會自己亂行既青少年；不時要同佢詳細形容周圍有無障礙物。

每次見到佢地，就會覺得自己好幸運，可以自主地周圍去，唔駛期待別人騰空黎帶出街。

元暢@apm

呢兩日假期真係多台灣星來港宣傳，連元暢都一連兩日分別響apm同大埔超級城有function。
我同Charlotte, Shirley & 表妹Karen都只係揀左首日apm去hea。
聖誕日，3pm @ apm。

Charlotte佢地一早就響樓上霸定位，但因為我已經第N次見元暢，而且明知個routine都係：例遲廿分鐘-訪問幾句-粉絲上台玩低能遊戲-媒體訪問-簽名會，所以我都係較岩時間先施施然到達，寧願地下遠少少望都費事迫埋去。

好彩元暢超高，就算人多都唔難望到佢。

唯一既"驚"喜係：五音不全既佢，竟然唱左一整首新劇「惡作劇2吻」既插曲；雖然無走音，但幾雞仔聲，連我咁鍾意佢都不得不承認：確實幾難聽。