撈過界

兩大連鎖店既"買善存送體檢"promo剛開始，因為發現好多dumpbin同top shelf就算放吉盒都係得一兩個，搞到個display真係非常"吉"，所以立刻同余經理反映，每人分幾間旺舖手拿吉盒落去添加。

連merchandisers都撈埋。










無計，等得裕利班merchandisers大姐跟得個call plan行完一round，都應該個promotion落畫。老細阿John對呢個體檢概念寄予厚望，零願大家做多一步，免得影響效果。

所以不經意地巡舖多左，亦都做埋舖內偷拍。







我覺得自己似惠氏打雜多過似經理。

三個月內再回老家

之前都收到風三月尾New York會有個Strategic Plan Meeting，以往一向香港唔駛去，但阿John呢個新老細乜鬼狗屎垃圾都想我去，所以都心知不妙。

果然，今日臨收工前個Invitation殺到。

盡最後努力嘗試去推，當然無功而回。

去New York既business class國泰要近8萬，反而飛加航停多倫多"只係"4萬幾；所以今個復活節會又返老家省親。

Mar 19-22 Toronto
Mar 23-24 New York

又係飛廿小時present一粒鐘既"字字千金"presentation。

唯有代我外公外婆多謝公司囉。

今夜無咁寂寞

雖然都係開夜中，但比起上兩日對面水靜河飛，全層得我一個針跌落地都聽得見，今晚有臣哥響對面陪我搏鬥。

雖然大家都係各有各忙，但咁覺無咁寂寞。 最抵死係佢過黎探班時劈頭第一句：你都有今日啦!!!

希望聽晚飯後唔駛再返黎續灘。

被迫參與5+1Promo

又係另一個晚飯後返工司默默耕耘既晚上。

收得工都差不多11:45pm；屋企樓下百佳惠康都收晒。買奶被迫幫襯公司樓下Circle K，亦都無意中參與左佢既"買5送一"蓋印牛奶卡優惠。

如果開夜情況持續至換領到包免費奶，都確實令人沮喪。

食飽繼續搏殺

出左一個星期trip，聽日Sinmei同過兩日Kerry輪住黎放假....加上今個星期要交既5-Years Strategic Plan，結果就係去梁師奶度食完晚飯家陣返公司繼續搏殺。

或者真係要夜欄人靜，先可以專心做數。

聽朝仍要早返，咁究竟我應唔應該返去訓呢？

重投All-Bran的懷抱

中學時期開始食All-Bran；雖然佢可能係最難食既cereal，而且溝奶後攪多兩攪會變成雀餿般糊狀物體，但無計，鬼叫佢高纖。(如果唔理卡路里既話，我既至愛係Coco Pops & Special K)

呢個多月食太多零食之故，肥左好鬼多。所以洗心革面要比多d effort去減減減。

尋日聽完個health talk，的起心肝要增加fibre intake。返屋企前在樓下惠康一手執Kelloggs' All Bran同Brown Rice Flakes，一手執高鈣奶同藍莓乳酪去比錢。

比我一個月，要用呢個High Fibre Dairy Diet去減磅。否則四月去台灣真係乜都唔駛食!!

體檢講座









細佬做左「香港體檢」咁耐，我都係第一次上去。

下午公司同佢地合辦"都市生活與慢性疾病"既講座，由佢地既劉醫生tailor-made左個talk。我，Sinmei同細Dee 1:45pm去到現場set up，拉左d banner同放d吉盒陳列，2pm開始。









個health talk會場容納到過百人，而且粗略跟細佬入內參觀，d設施真係好鬼pro；設計到成間私家醫院咁。
途中介紹埋佢地個CEO曹貴宜比我地識，真係想問問點解佢地隻397(股票代號)會跌成咁!!!!!

顧丁聯婚
行完禮飛的落Hong Kong Regal既「富豪金殿」。阿二竟然將廖太們編在註明"廖氏宗親會"的一圍坐；其實親友唔知，仲以為我地個個真係姓廖既添。

比阿二拉伕做司儀，無乜點事前準備，唯有臨時爆肚；其實生怕自己口沒遮攔慣，會講錯說話。

我無同廖太坐，臨時同Marinda佢地坐隔離枱；以平衡每張枱人數。

筵開五席，真係由乳豬全體到美點雙輝紅豆沙，十分"地道"既婚宴菜；講真食物質數不怎麼樣，但大家都志在睇睇阿二換出黎既晚裝。









橙色既太艷，反而鍾意送客套湖水藍。

阿二今日真係好鬼閃！！

廖二太出閣

阿二特地揀今日生日結婚，所以大家都為左就佢呢個雙重意義既大日子告假觀禮。









註冊地點係私人場所，位於纜車站既「伊甸園」舉行；其實係一個頗花花碌碌佈置既禮堂。
由於個主婚律師遲到，所以我地柴娃娃影相玩左好耐。各位廖太每人手執一部機圍住對新人影，真係有ｄ似採訪明星。









最攪笑係表妹Ronah好似教堂奉獻般，拿住個大袋周圍去收禮。
11:30am開始行禮，兩位新岳母同新奶奶都好緊張，影相都無乜笑容。反而廖氏奶奶真係好似娶新抱咁四萬。

哇哈哈，以後阿二係顧太唔係廖太；奶奶，一於逐佢出家門啦。

奶奶同Connie送左幾款唔同既Foot & Heel Care產品比我，今次真係有排用喇。

空中賞月賞"花"

回港坐窗邊，偶然望出去見到薄薄雲層下面，唔止平時城市既街燈，仲有勁多閃爍既光；如果話係導航燈，又未免太雜亂無章。定眼望左一陣，發覺竟然係煙花!!!

正奇怪：唔通煙花廠爆炸咁多日都未攪掂？

但範圍又似乎太廣。

足足由7:50pm-8:10pm，飛過既地下城鎮都有密密麻麻既煙花。屈指一數，原來係元宵節!!

第一次由高空觀賞煙花，夠晒特別。

立刻舉頭順便雲上賞埋呢個正月十五既月光。

浦東機場的"雨"

Connie應該見過啦。

不過既然一落車就兜口兜面見到，唔理由唔影低比佢做手信。

正大廣場，浦東

下午optional參觀蘇州廠，我去過咁多次當然咪預我啦。利用一個free afternoon返上海office同阿John discuss下星期交既Strategic Plan。傾完立刻閃人，費事比佢捉住食飯。

既然晚飯自己攪掂，步行十分鐘，到附近一個名為正大廣場既shopping mall搵食。呢度係上次同鬼佬老細唱K既商場，位於東方明珠塔旁。

食乜野？哇哈哈哈哈，新開張既「鼎泰豐」！(當阿John簽我份expense report時，一定會諗：你怎麼比我還"台"耶！)

我都有d佩服自己，一條女清左：一客小籠包(6隻)$33，紅燒牛肉麵$47，同一碟清炒豆苗$38。本來見有刨冰都想留肚，但真係無能為力啦。小籠包有本店既水準，但碗麵就強差人意，牛唔係用牛腱肉，麵亦都係用上海幼麵。

價錢唔平，但裝修光猛感覺乾淨；牆上更有香港明星肖像畫，特別得黎有ｄ畸哩(乜鼎泰豐唔係台灣野黎架咩？！)

Encore濱江壹號樓

兩個月前同余經理黎過，今晚joint marketing+regulatory既group dinner又揀番同一間餐廳；對我黎講就真係無乜新意喇。












飯前指定動作：去-5度既"Ice Bar"隊杯vodka。今次試左阿John推介，偏甜既Double Expresso Vodka。









晚飯依然係西式a la carte；餐單同上次大同小異。我仍然係揀牛，分別只係上次係和牛，今次係Angus beef。
雖然惠氏包場，但因要同一時間起菜，上菜速度頗慢。我地還好，飽受jet lag既鬼佬就差不多去到stage two of sleep咁滯。

唯一有新鮮感既係：大陸office送比我地，每人有一個刻有自己英文名既印鑒；非常有心思。