La Vie Avec Amusement: 12/01/2009

肥仔哥

香港finance自3月份"relocate"去上海，YY第一批食肥雞餐後，6月再走多個，extend再extend，幫我地挨埋SAP Go Live同Internal Audit，留守到最後既Finance Manager肥仔哥今日正式last day。

不時閃上黎撻明週，撻Centrum/Caltrate辦，再加"朋友要"既白宮痔瘡膏，未見佢龐大既身影只係離遠聽到佢把聲，都會迫使我地唔想比佢"順手牽走"既野收收埋埋。

雖則佢不時都老點我地，但有緊要野幫起手上黎，都勉強算係義氣仔女一名。

其實聽聞公司仍然極力想extend佢，但礙於怕份就黎入到口既大大份肥雞餐有乜閃失，都係先袋袋平安為妙。今照捧左兩大盒西餅上黎孝敬我地，以佢平時咁孤寒既性格，所以我地確定今日應該真係last day。

世事難料，感覺上，佢會好似Terminator咁臨走拋下一句："I'll be back!!"

睇吓點。

New Moon Souvenir

廣告公司Ebby既朋友送的電影贈品，佢借花敬佛比我呢個Twilighter。

3 sets 2R的人物資料卡，背面有齊各主配角既全名；外加無乜用既電話繩。

雖然今集人狼太多有點悶，期望半年後的Eclipse。

需要無比勇氣去追

年中去米澤時，已經見到舖天蓋地的"天地人"宣傳。

呢套由年頭一月播到剛結束既48集大河日劇，集眾多偶像及實力派演員：妻夫木聰，小栗旬，小泉孝太郎，北村一輝，阿部寬，松天龍平，木村佳乃，深田恭子，相武沙季，玉山鐵二，城田優....

雖然眾星閃耀，據奶奶稱亦係2009年收視冠軍，但要開呢套劇都需要無比勇氣，除左48集呢個嚇人既集數外，仲要係日本古裝片!!

描寫在只顧尋求「利」的日本戰國時代，始終把「義」和「愛」放在心中的智勇雙全的「戰國英雄」直江兼續的一生，由首次出演大河劇的妻夫木聰主演。

對織田信長，豐臣秀吉，德川家康，依達正宗等都係聽過大名而唔清楚其事績既我，應該未來數星期都被硬補日本歷史課吧。

奶奶，等我，而在努力中。

神探福爾摩斯

最近喜歡到梁師奶樓下的MCL將軍澳睇早場。9點多的場，只係$35，放完狗剛剛好。

尋日又解決左套"神探福爾摩斯"；入場既主要原因：Jude Law。

如果話係鬥智鬥力片，應該有點失望。因為整套戲交待查案部份唔多，反而只係塑造出Sherlock Holmes係一個"哩啡"既人，往往要身邊一絲不苟既華生去幫佢收拾殘局。烏龍有餘，神勇欠奉。

橋段嘛，就有如蝙蝠俠與羅賓咁；好唔好睇見人見智。

12/F隱閉咖啡店：La Serene

永遠都咁多人既Sogo，只有樓上Sogo Club先能夠有一刻寧靜。

12樓之前既瑞士餐廳結業後，開左間叫La Serene既cafe。唔算豪華裝修，但感覺幾舒服。

難得Annie Chan響聖誕期間抽身回港兩日，幾個月無見，都要出黎聚一聚；3pm就黎個小型廖太茶聚。

Tea Set唔算貴，$62-$68。

蝦多士拼三文魚焗薯皮($65)，連咖啡或茶

芝士白菌墨西哥薄餅，配芒果沙律($65)，連咖啡或茶

唔夠喉，再點個焗萍果噠配香草雪糕。

多謝各位既聖誕禮物及手信：

Annie響上海買貴成倍既b仔長冷手襪

奶奶的日本蝦餅，聖誕及貓咪版，造型靚到唔捨得食

Connie的韓國玄米祿茶及Etude x Hello Kitty版手霜

當然仲有Charlotte的Milk Top香滑牛奶布丁(在肚中了，哈哈)

搬家後的金滬庭

之前響坑口，最近搬左黎寶琳既金滬庭，冬至新開張。

林家大少係場內經理，所以聖誕日我同巢樂言無訂座既情況下踩場都唔駛等位。

油炆竹筍($35)，海蜇青瓜絲($48)

上海粗炒($52)，蘿蔔絲酥餅($28)

擂沙湯丸($28)

阿凡達

本來見到張poster都唔多開胃，無諗住睇呢套以特技掛帥既電影，但見個個睇罷口碑都係盛讚，改變主意聖誕日黎個早場。

早場MCL將軍澳9:30am都要$70，好貴，因為係3D電影；下午過後票價要$110，如果去IMAX戲院的話更要索價$160-$170。

2hrs40mins既電影，是否物有所值？係，呢套點都應該入場睇。故事如朋友Ebby所講，好似宮崎駿既卡通炒埋一碟，環保意識濃厚。打鬥場面預左，但Pandora星球上既動植物真係好鬼靚。