第12件羽絨

去年買過UNIQLO羽絨背心，但甩毛情況嚴重，去韓國穿了幾日返到香港就來個product complain退返比佢。

見Muji有八折，$384平過日本買；今晚可以帶去英國打底穿!

Green Lunch

多得公司的Green Project我們贏了二獎RMB5000，全條team拉大隊到四季酒店的法國餐廳Caprice食個group lunch豪一豪。

麵包都好香脆，忍唔住隊左3個!!

$520的三道菜午餐；頭盤：南瓜濃湯配義大利甘腿，合桃配香脆芝士片；香醃日本帶子薄片配紅菜頭，青蘋果配鮮蠔忌廉；法式大蒜薯蓉濃湯配鴨肉多士，雞肉薰草豆啫喱，婆羅門參配栗子慕司。

主菜：香草銀鱈魚柳配燒雞汁甜蒜蓉；香煎虎蝦伴煙肉/蘭度豆/羅馬生菜凱撒汁；金梭魚柳炒洋薊/露筍配水瓜柳牛油汁；法國走地雞配野菌通心粉。

甜品：法式爆谷芝士餅伴無花果配紅桑子石榴雪芭，法式水煮蘋果配黑加侖子/雲呢拿慕司配青蘋果雪芭，焦糖克巧力疏乎里撻伴榛子配青檸雪糕；靚靚的Petit Four。

又甜又黐牙的三色拖肥糖，咖啡。

食物質數唔差，服務態度亦都好好，無臭吋既感覺；當然成六舊水食個晏自己荷包出就點都唔值架啦；但獎品就大家都叫做試試吧。

蟹家

見奶奶食完又食，唔駛入寶琳滴眼藥水，下午同QA同事試世貿9樓的"蟹家"；真係很不錯啊。

蟹扒餐($150)，其實係鐵板蟹腳+大大碗蟹味增湯。

蟹鍋餐($150)，份量唔細，啖啖蟹肉!!

有同事唔食蟹，也可以揀特選牛扒定食200g ($150)。

都會凱逸Tea Buffet

週日下午，約埋林氏/巢氏一行9人到紅磡"都會凱逸"食Tea Buffet；幫Carol慶生，而且也為中入院去做膝蓋手術嘅林Auntie加油。

折後每位$200有找，當然期望唔會太大；甜品比熱醺多，不過不失啦。限時兩小時，好坐就真係講唔上了。

Izumi Currey宵夜

沒有點咖哩，反而叫了Omurice with Demiglace Sauce($75)…個汁酸酸哋,開胃!

晚上隊咁大個飯，真係唔多健康；好彩誠品收得夜，可以逛逛銷耗一吓。

重溫新參者

睇完本原著小說，很想再重溫呢套日劇。好彩Debbie前年自己買左個copy，也有keep住；借來一口氣煲了。

日劇作了些無傷大雅的小改動，不比小說遜色。

遲些到台北，一定到誠品抬隊東野圭吾小說返黎。

成個頭輕晒！

烏烏終於都可以除下頭罩了!也不用再滴眼藥水。

由獸醫度出來，馬上帶他去洗耳仔和剪指甲。希望佢可以乖乖哋，唔好再整親自己了。

新入職？

HR送的"P-記"電腦袋. 話所有新入職員工都有喎；我地搬office，都算新入職？

不過個袋幾靚就真。

洛神花果醬

多謝Marinda的自製洛神花果醬，很特別！(下次會否試雞骨草Jam呢？)

除咗塗麵包外，聽講沖水加檸檬，味道似檸賓呢。

豹紋Roll Cake

Das Gute出了豹紋和栗抹茶卷蛋糕，超可愛。($128)那個豹紋應該值$30了吧。

Pokka鐵板餐

早上和堂妹拜完山，到厚德商場Pokka Cafe食晏。

鐵板午餐($108)：雜扒及海鮮，份量唔大而且味道很普通嘛。咁嘅價錢，咁嘅質素，唔值得encore。

星期一水果

新Office好多野都係適應中，例如到影印機print野要用staff card dut先有document出黎，未識用那Cisco IP電話，所以除左打出打入外，其他function尚在摸索中。

無左Nespresso的capsule咖啡機，用咖啡豆即磨。雪櫃的汽水維他奶任飲.....而今日更發現，原來逢星期一pantry都有生果比同事們享用。雖然只是小福利，但感覺不錯嘛。

老翻Demiglace

要買生日禮物，將軍澳沿線比較像樣的商場就是Popcorn。那裡雖然裝修靚，但食市唔多，再到"麵屋一平安"，今次棄拉麵選蛋包飯。

芝士肉醬蛋包飯($90)，Menu上英文寫Demiglace Sauce...怎麽看也不正宗吧。雖然蛋煎得很薄，那所謂的demiglace其實似肉醬意粉的汁啦，應該叫Omurice Bolognaise就真。這個價錢，我寧願去"秀殿"吃了。

外文書入貨

中華書局同恆生卡做緊推廣，中英文書最少都有8折！

呢套"Fifty Shades"的三步曲之前在誠品都猶豫咗好耐買唔買，因為聞說係一部有關SM的情慾小書，翻看過似中學生的讀物，唔係好明點解近排大熱，很多書店都放在當眼處。單買要一本$128，家陣一套7折後$240，即管買來睇睇有咩咁吸引。

至於Mitch Albom的"the Time Keeper"，只出了精裝硬皮版，薄一薄$208覺得貴；但家陣6折就無謂等paperback了。

新Office @ Stanhope

搬咗N次，都有點麻木。

離開磨了8年的太古坊，去到樂基的第一天，在等箱頭運到和unpack中度過。

新的傢俬顏色較沉，所以感覺無咁光猛。不過其實落地鐵會較以前近咗，又無轉地鐵站，應該唔難適應。

那些年，我在St. Felix的歲月

每次搬office收拾細軟，都會dig out一些陳年舊照。最懷念的，都是那老好留英寄宿中學歲月。

校服look!!

最敬重的老師：Mr. Thurgur!! 他教的地理科，利害到中學O-Level超過9成人會拿A；也是因為他教得太好，害我A-Level時棄pure science唸social science，選了Econ/Geography/Math。

倒轉屋

新都城也來湊"哈囉喂"的氣氛，來個古怪"倒轉屋"，很有創意呢。

老地方，小驚喜

昨晚的廖太飯局，大家就我到太古坊的彩雲軒，估唔到水準和價錢都有點小驚喜。

那個片皮鴨兩吃($168)，推出來見隻鴨那麼大隻還以為睇錯價；而且皮脆肉多汁，那薄餅也有芝麻粒而且每片有心思地用紙隔開，不會黏著很細心。第二吃的銀芽炒鴨絲也很不錯。

海鮮類很新鮮：聖子王($22/隻)，龍躉兩味($238)，豉油王煎中蝦。

其他小菜也不賴：南乳吊燒雞，魚湯野菌浸時蔬，芥蘭炒牛肉

口水也濁親

烏烏剛才午飯時，聽到梁師奶話不如粒粒唔駛盅碎，好似以前咁原粒比佢食，等佢習慣返。點知個死仔一聽到我地討論"粒粒原粒上"就開始好似人地哮喘發作咁大大聲扯蝦!!

嚇到我地馬上抱起佢掃心口，十來秒後先順返條氣；放返入籠後驚到屎尿齊放。

估計係佢聽到粒粒太緊張，分泌左大大啖口水又吞錯氣管濁親。你話啃死就無計啦，齋想像未有野落口到會差點比自己口水濁死既狗，真係聞所未聞。

都唔知好驚定好笑!

最後一週太古坊

2004年由集成中心搬到太古坊，足足8個年頭。之前雖然搬左幾次，但都是在太古坊唔同地方來來去去。

今個星期五就搬office，終於都要離開熟悉的環境。雖然樂基中心也是同一地鐵站，只是不同出口，但也可以算是相對地陌生。

可惜最後這一星期，都因為要頻撲地回去幫烏烏滴眼藥水而無遐到熟悉的舖食晏，這個月忙得真是連望多太古坊幾眼都無呢。

真的要開始pack箱了。

大盛拉麵

難得下午可以閃出去食個晏，到Popcorn Mall的"麵屋一平安"來碗雜錦豬軟骨拉麵($85)；肉很多，很稔，豬骨湯頭也不錯，但麵不是彈牙那種，是直身的，有點小可惜。

Dark Cherry Tart

出咗幾個星期，昨晚才第一次點；一來面頭的大堆cream有點嚇人，而且一向對cherry都有點抗拒，怕甜。

意外地比想像中light，上面的是fresh cream，所以溝埋底下的cherry中和了甜度(其實那也不是太多糖醬，反而有點微酸)。底下的撻皮內層塗有朱固力，好像加大碼的美心撻咁，不錯。

未有遠行的感覺

其實還有兩星期，就展開英國9天之旅；但呢幾個星期為烏烏的手術，和術後照顧忙得咩私人時間都冇。

雖然話長時間磨在梁師奶家其實都係煲劇同睇書，無咩特別辛苦嘢做，但由朝7晚10的變相"軟禁"很多旅行前的準備都未開始：唱英磅有Moly幫手，下星期要陸續網上訂入場票(網購有折扣，慳得一磅得一磅)，還要再三細看行程有甚麼違漏及影印地圖。

還未有旅行的心情呢，希望烏烏在出發前進展良好，等梁師奶一個人可以撐到兩星期。

Pokka Grill

昨晚阿Y來將軍澳找我晚飯，近近哋到Popcorn的Pokka Grill Specialist試試。

YY點的是日式DIY鐵板西冷牛扒餐($118)，試了一塊，味道算唔錯噢。

我的香煎豬扒拼吉列龍利柳($108)，豬扒太硬；加$28 upgrade個甜品做草莓waffle，雖然話係半價，其實比散點細了，唔抵。

小瑕疵

剛帶烏烏去眼科覆診時，佢入袋時大動作整甩咗個頭罩！

眼科醫生用螢光顯影劑照咗好耐，唔知是否自己刮到，用來修補的那塊膜有個小洞！不過那個洞很小，而其他縫針位置都沒問題，醫生話很大機會附近的血管會令那洞自己生番埋.....否則又要推入去手術室補多兩針了，天呀，不要吧。

兩星期後覆診再定斷。真係一波四五折，唉。

《東京．村上春樹．旅》

讀完呢位作者去希臘小島尋找村上春樹之旅後，呢本《東京．村上春樹．旅》是作者在東京繼續尋訪村上小說的場景。

當然唔expect係大路旅遊點，但今次差不多整本書都是圍繞不同的古典音樂/爵士喫茶店，沒有預期的多地方探索。

幸好旅居數年東京的作者，對所住的吉祥寺描述，我也因為去過幾次已留有印象。

一日4次

因為要每日去梁師奶度幫烏烏滴眼藥水，呢個月真係私人時間嚴重受影響。

6:15am出門口，7am到寶琳滴第一次；順道等佢食月早餐粒粒幫佢抹面再返工。

12pm lunch time撲返去滴第二次，回來是買麵包充飢。

5:30pm sharp閃，趕及6pm左右滴第三次。

10pm臨走時滴第四次，才收工回家。

當然梁師奶在我平時上班時間要home bound看著他，免他自己抓甩個頭罩整傷隻手術眼就大x鑊。但問題係公司要做既野堆積如山，唔可以早返又無得開OT，點算？

唔通真係搵晚回公司通頂？

"舌尖上"VCD

Youtube可能版權問題，相關視頻全部刪除了。雖然pps有視頻，但斷斷續續，也有些播到有些播唔到。

這套內地拍的電視劇似乎口卑很好，連加拿大的舅母也有追看；梁師奶在無線未出鍾景輝的廣告時已有所聞。

見出了VCD，一套三隻($156) [DVD則要$238，看一次的，也不用太講究吧]，一口氣買下來，懶得等無線每星期播一集。

公司請打針

近排揾B哥哥大賣廣告，因為50歲以上也可以打，公司最近推出50歲員工及其父母都可以免費打針；只要去指定的一系列診所，付$100行政費，藥費全免。

以為要大花口水同梁師奶講解呢隻疫苗有咩用，點知一提佢就話："打！咩唔打呀！"
原來佢之前收到了公司的P-Club季刊，早已詳細讀了有關資訊，果然那些direct mailing係有用的。

希臘．村上春樹．貓

雖然香港的誠品比台灣貴很多，但開業之後確實書也買多了。

剛讀完一個村上春樹迷，帶著其著作"遠方的鼓聲"，跟著書中廿年前村上走訪過的希臘小島再走一遍。雖然我還未讀過村上春樹，但此書差不多每個景也quote書中文章，真的是蠻特別的旅程。

作者的圖其實也蠻多，而且唔講唔知，原來希臘有那麼多貓！多到一個程度是連當地的狗也會比同化，出現一些貓行為！

讀完後，現在讀另一本"東京．村上春樹．旅"。

烏烏出院了

雖然手術位置看來很嚇人,但冇之前咁fragile，可望三星期後復原!

家陣要滴三隻眼藥水，未來三星期我將會很風塵撲撲，希望佢乖乖地唔好扭計比我滴吧。

烏烏犯太歲？

2月洗牙，7月尾做脊骨手術，今日下午又要第3度麻醉做眼手術!!

昨日梁師奶話佢跳跳紮唔知是否自己撞親，發出怪怪的悲鳴後再變獨眼龍!!

昨晚留守梁師奶家裡，每兩小時幫他滴眼藥水；今朝一早去PAVC睇眼科。結果真係cornea perforate左，最安全做法係動手術修補。

結果要放抵他下午動刀，估計留院一晚和術後滴3星期眼藥水。

希望手術成功，術後康復不要再有complication了；十一月頭有半個月我不在香港呢。

歸隊/告別

終於等到放了十個星期產假既Kerry回來!!同時也要告別這段期間幫我們手的Winky。

西苑午市10-12位套餐$1188：

先來點心6款(雪影杏汁包x2，家鄉煎藕餅，賽旁蟹鍋貼，水晶豆苗餃，黃沙潤燒賣)。

多年來無甚變化的菜式：大哥叉燒拼盤，原煲老火湯，翡翠炒海班球，魚湯鮮竹泡時蔬；加埋皇庭招牌炒飯，蝦子薑荵撈生麵。

三款自選小菜：野菌帶子貴妃豆腐，頭抽洋荵豬扒，豉椒味菜炒鮮魷。