又係filter惹的禍

似乎每次換慮水filter，都會有手尾跟。












朝早同阿John傾完"人生大計"(2007 Objective + Development Plan)後，同Alvin去Rice Paper食個lunch。佢為左答應幫我換個慮水芯，11am已經standby等我，真係有d唔好意思。 Rice Paper既lunch sets都幾抵食，由$38起，送一杯熱青檸薑蜜或凍青檸梳打。我地叫左咖哩牛腩+法包，同豬排撈檬，加$18有appetizer蔗蝦， 比夜晚更抵食。

上次換filter到而家都相隔9個月，再拖落去，我自己都唔敢煲水飲架啦。換出黎既慮水芯每次都係啡色既，飲得多都驚腎虧啦。Alvin照平時咁換，但再開番水制時.........頂，有滴水。我地如是者重裝左3-4次，都無辦法改善滲漏情況，死死地氣落樓下約個水電師傅聽朝上黎攪。









哎，我似乎同呢個filter簡直糾纏不清，一怒之下真係拆左算數。

新老闆
下午新老細John Chou由台灣飛過黎。甫落機，就搵唔到個hotel pick up(Park Lane又係衰d既，無人舉牌之餘，個counter又無hotel名稱，搵唔到都唔怪得人啦)。自己check-in完殺到黎，都2pm鐘喇。

二話不說，第一件事就係捉住佢同我黎張合照啦(當然我唔會話比佢聽上blog呢家野，哈哈)。John個樣好後生，頂多40頭。

帶佢過惠氏office和裕利同班高層打聲招呼後，就埋牙坐低做sales & marketing plan review。

閒話家常就話講國語無問題，但講sales都係用英文會流暢同快好多。我一講開英文，快既程度係近乎無晒標點符號，一輪嘴rap出黎(以前細個去bible reading比賽時，都係因為讀得太快而輸左)。哈，真係懷疑到底佢吸收到幾多我rap既說話。

又係Rice Paper

D朋友話我每去過一間幾好既餐廳，就會密密去，去到厭為止。但今次鍾情Rice Paper既唔係我，係卡生。









踏入2007都未見過阿路姐，call埋佢出黎食飯聚一聚。

仍然有玩Rice Paper呢味菜，呢次包既係香橙燴鴨，加埋新鮮番石榴一齊包，唔會太肥膩。酥炸軟殼蟹依然香口，紅咖哩鴨+法包，同荷葉小龍蝦海鮮飯都不過不失。









三個都飲Wine既人，開枝紅同白本來唔算多。不過卡生ｘ路姐，話題就離唔開研究紅白酒。你問我fruity, corky, dry, berry, 單寧......味道上有乜分別，我真係無考究。或者對我呢款粗枝大葉少條筋既人，酒對我黎講只係nothing more than餐飲既一種，發酵葡萄變成有"異味"既液體，情況同大豆發酵成納豆差不多。

就等如我更愛Starbucks咖啡，都唔會在乎飲既係Kenya, Verona, Fair Trade定係House Blend啦。

我份人，好聽ｄ叫唔挑剔，難聽ｄ就係"牛嚼牡丹"。

同Promotors開年

原定下午黎既新老細阿John，臨時有事改遲一day；仲好啦，等我buy多一日時間趕工。









余經理第一日返工，約左班promotor上黎開會訓話之餘，朝早切埋乳豬，下午順便同佢地開年飲餐茶；地點係毫無新意既「彩雲軒」。莫講話我同一般ｄ姐仔無乜話題，對住呢班"嬸狀物體"就更加無開口既空間。

Promotors個阿姐Joyce幫我地管住班女都好幾年，雖然手下ｄ女良莠不齊，但如果唔係有呢個中間人，要我直接handle呢班師奶都幾惡頂。

錢，有時係要比人賺既。

我係8號仔

又係「星期日檔案」，今次講九型人格。個案中一講阿師奶ｄ特徵，我就知係佢同一種，屬第８型。

返到黎貪得意再做個網上問卷，全中，係８號仔；因為我既性格實在太明顯，一ｄ都唔難估。

http://www2.uzone21.com/WOT/sdu/enneagram/test.epl

第 八 型 ： 領 袖 型 (Leader)

很 多 領 袖 都 有 以 下 特 質 ： 豪 爽 、 不 拘 小 節 、 自 視 甚 高 、 遇 強 越 強 、 關 心 正 義 、 公 平 。
你 們 清 楚 自 己 的 目 標 ， 並 努 力 前 進 。
由 於 不 願 被 人 控 制 ， 且 具 有 一 定 的 支 配 力 ， 所 以 你 們 很 有 潛 質 做 領 袖 帶 領 大 家 。
由 於 你 們 都 較 好 勝 ， 有 時 侯 會 對 人 有 點 攻 擊 性 ， 讓 人 感 到 壓 力 。

第八型人格是九型人格中的性格，名為能力型、領袖型、保護者、權威型。

人格概述
內心渴望：掌握權力，在人群中具影響力。
內心恐懼：被操控，失去自主。
行為動機：果斷，好克服挑戰，保護他人。

人格升降特徵
健康的時候：會有二號的憐憫之心，關心他人 。
不健康的時候：會有五號的冷眼旁觀。

哥仔，我睇你係2號仔，唔信自己做一做個測試，睇吓我係咪真係熟知你多過你自己？(Opps....衰左添，原來佢係第3+第6型)

自助賣書機

地鐵不時都有d自助販賣機，賣埋d"唔等駛"既野，例如電腦accessories，condom等；睇怕十世都唔會有人幫襯。

經過老銅地鐵站，見到換左部叫"青春加油站"既機。賣既係新出既小說，由林詠森，張小嫺，大S，甚至"花樣少年少女戀愛札記"都有。售價打9折，用八達通付款。忍唔住行埋去駐足觀看左一陣。如果無時間去「開益」，呢部機都係一個好選擇。

終於都賣ｄ比較有用既野。

狠狠幹掉5吋

二月已經好似回南天，我把捲髮又越來越不受控制。












下午上Hairdo搵Kawashimaさん修一修，兼黎個焗油。反正夏天將至，我叫佢同我修到鎖骨長度，狠狠地剪掉5吋。

雖然對好多人黎講，仍然算係長，但自己感覺清爽好多。

同堆數字約會

下午一個人返公司重組過個2007 Sales File......

我以為只有6-7月budget time先至需要週末返工，估唔到今年早到二月都已經係咁，哎!!

成層得我一條友，連對面裕利今日都無人開OT；真係靜到針跌落地都聽見。

12pm-6:30pm，攪掂完個2007(對d Net Sales by product by month同d discount，真係眼都矇)，要開始改埋2008-2009 d數。雖然上個星期交左條prelim既2008/2009比美國，家陣又話要改係樣衰d，但我寧願而家立刻改番，好過繼續用d解釋唔到既數去做Strategic Plan & Budget，真係會比人"小"架。

星期一早d返去繼續奮鬥。

重要日子：July 21th

最後一本Harry Potter and the Deathly Hallows終於都響7月出版。已經見到Page One有預訂優惠。

呢個系列有越出越厚既趨勢；由第4本開始，已經成本牛津大字典咁厚。通常取書後一個星期，我都會隨身捧住呢本牛津字典苦讀，免得比媒體搶先一步揭露個結局。唔知呢本結局篇，會唔會厚如大英百科全書呢？

故事人物中，我最鍾意邊個？熟知我既人唔會難估，係亦正亦邪既Professor Snape；因為佢夠黑暗。

聽日出「開益」訂番本先。

比較有品味既賀年佈置

途經置地，見到呢堆桃花佈置，真係值得一讚。拼棄一般既大紅金豬設計，用比較清淡既pastel color。睇落無咁俗氣，反而春天氣色濃厚。C'est le printemps.......

Three Sixty

10:30am去中環泛海大廈做Manulife一年一度既婦科檢查。個醫生都係話我血壓borderline high，要自己keep住check；我夠知啦，駛你講。









一場出到黎中環，順道上去置地樓上開業數月，但我仍然未踏足過既高檔超市Three Sixty掃一掃場。 呢間屬於牛奶公司集團，即與萬寧惠康同group；隔局同太古西武樓下既Great Foodhall差不多。特色就係….貴。$40一包有機薯片，>$100一排入口朱古力；大部份牌子亦都唔會響一般超市見得到。









我當然會走去個health corner度望一望有乜產品。進口supplements有好多，連比較難搵既Valerian都有(100capsules只係$88)，相信卡生可以響度消磨一段時間。Centrum應該入左，但仍未見上架，星期一要返去問吓余經理先。

樓上第二層係foodhall，順手買左個巨型Samosa with Himalayan potato (印度咖哩角)當lunch，因為仲要返公司努力。

14才の母

新年期間煲完套都幾難頂既日劇「辣妹剋星」，終於都開番套正常ｄ既。







14歲的母親 ～為愛而生～（14才の母 ～愛するために生まれてきた～），2006年冬季日劇。

講個14歲靚妹唔識死，同個15歲男友攪左一次就有左餡。後來，佢下定決心，在家人、校方、以至好友等身邊的人大力反對之下，仍然要將個BB生落黎，而點樣面對後面無數極為嚴峻既考驗……
當然要個樣都極幼嫩既童星黎做未婚媽媽，對佢黎講會好吃力；其實我14歲都去左英國啦，邊有佢咁幼稚架？！

反而做得幾出色既係對父母點樣面對個女咁細，比人攪大個肚仲一意孤行要生，由錯愕，反對，至接受同陪個女一齊面對既過程。

一邊睇一邊心裡有個疑問：乜日本真係咁開放，14歲懷孕，只係面對社會道德壓力，唔會犯刑事既咩？

配給開年飯









今年惠氏開年反傳統，捨中菜取西餐。地點揀左Oxford樓下既Belgos East；間餐廳有一半係設於室內半露天，大家排排坐長枱，有d野餐feel。

西餐都無所謂，但成百人要食buffet，可想而知只有混亂。地方已經唔係闊落，要排隊都有d難；最弊傢伙係預唔夠食物，同d野上唔切!!大部份時間都係一群人虎視眈眈d"吉"盤，甚至誇張到一有refill隱約聽得見拍手聲添!!

YY都忍唔住隊多幾件麵包+牛油"充飢"(有d五餅二魚feel)。

但開年飯唔係咁架吓嘛，無啖好食？攪到幾位高層包括個GM都棟篤企響排吉盤前猛催促d侍應。

呢個有些少"天怒人怨"既開年飯，就係大家都只係半飽之下落幕。

馬華









細個老豆成日帶我黎，呢間野屹立佐敦30多年，都算利害。前一排試左咁多間叻沙，點到捉埋卡生陪我返黎呢度比較一吓。

門面有翻新過，但整體裝修都係好有懷舊feel。

由我發辦，就當然叫ｄ我既至愛：叻沙牛肉米，咖哩羊肉飯，同半打豬拼牛沙嗲。

喇沙夠辣同聞落幾香，但個汁比「星馬軒」稀，所以感覺有ｄ淡。咖哩同沙嗲都屬水準之作；比「南亞」好食。因為得兩條友，個胃既容量有限，試唔到奶奶推介既肉骨茶，下次等埋Connie一齊再黎囉。

不可不留肚比紅豆沙；點解？因為佢既賣相同30年前一樣，非常令人懷念。

有時如果肯過海，搵食真係比銅鑼灣多好多選擇。

開年解穢菜



年初四，食晏諗住費事去酒樓同人迫，去試附近一間聞說幾出名(無記阿周名模都推介過)，專食小炒既「炳記」。

唔好睇佢裝修咁地痞，多人到要響門外開幾張摺枱咁誇張。有名既糯米釀雞無預定就當然唔會有，所以我地都係隨意點左幾味菜：椒鹽百花釀雞翼，咕嚕班塊，燒汁鱔球，同埋蒜蓉油蜜菜。

最唔抵係釀雞翼，基本上係將隻雞中翼斬開兩半，先至釀蝦膠；收你$70但碟頭少得可憐。比較似樣既係燒汁鱔球，舊舊都有拳頭咁大，同埋幾香口。

食物質數唔係重點，“特色”在無論雞翼/班塊/鱔球都係7舊!!而且門口有d“名人”簽名，如周華健，關錦鵬同陳自強，以Michael推斷，可能係佢地響附近香港大酒店“辦完事”，就近過黎開飯。

Porter Pig Power Attack!利是

逗得人利是咁多年，唔知從幾時起，自己都會派開工利是比CHC班人。成條team我唯一無派既係余經理，一來職位上大家咁高咁大，二來年紀上佢點都係長輩(哈，以上唔係藉口)。除左CHC既同事外，"有幸"收開我利是既，只有Hudson呢個冒牌"惠氏陳生"。














以前派過和紙利是比班友話"白晒晒"，非常"大吉"。襯去台灣響101樓下既Porter International買左條黑頸巾，送左兩包利是封，今年小弟就有頗特別既"Porter PigPower Attack!"利是派喇。

http://www.ll-porter.com/home.htm

"PigPower Attack!"係台灣Porter International新一季既theme。如果論袋既款式同手工，我絕對只會垂青日本製既Porter Tokyo/Head Porter。但衫就無乜所謂啦，一條黑頸巾7折後HK$300有找，就算係台版既Porter International都照殺。

粢飯豆漿的Late Lunch

Charlotte今日放假，住沙田既佢，難得放假都唔介意出番黎港島區食晏，我當然求之不得啦。









等佢陪朋友去黃大仙hea完出黎，都成2:30pm。本想去渣甸坊食煲仔飯，但間野好似仲未開。退而求其次，步入阿二極力推介粢飯既上海菜館「耀記」。就算我更鍾意食粢飯，都唔可以一個人隊成條(否則其他乜都食唔落)。所以我地寧願share：粢飯，上海湯麵，同熱豆漿；似食早餐多過食晏。

似乎年初三仍然有好多食市未開，連想去登龍街食甜品都摸門釘，又迫住轉去「紅螞蟻」整左個芒果椰汁沙冰。

開始放假放到有ｄ悶，寧願聽日早ｄ返工清咁ｄ野。新老細阿John駕到既presentation，如果再唔開波，我下星期一唯有"着草"。

翻生侏羅館

哈，仍然係Annie同UA太古城，9:30pm。今次係因為有兩張近期贈券想用左先，而死人UA贈券只可以劃即日既飛，所以下午要特地多走一趟黎劃位(新年檔期實在爆滿，即場劃既話好危，有位都係第一行)。

呢套係我CNY檔期最後想睇既電影。

一句講晒：As Expected。

入場前你我都會估得到8-9成既故事；非常"Home Alone"式既storyline。兩夫子點樣聯同博物館番生班人偶，整一場大龍鳳黎智擒貪心壞人。









雖然無驚喜，特技亦都只係一般，但細路仔或有d童真既大人會睇得好開心(可惜我無)。

浪費

今晚一路幫阿烏做飯後按摩，一路睇住電視播既維港煙花匯演。

每次歷時廿多分鐘既show，放煙花既同時，同燒銀紙無異。點解d機構唔將筆錢用黎做慈善去幫人？(當然我都明白佢地係想出名，要囉威；做善事點都只係無名英雄)

每年一次呢d活動大家高興兼吸引遊客都無可厚非，但回歸，國慶，年初二......會否辦得太過密，太過浪費？

難為幾多老弱一群食唔飽，甚至被遺棄貓狗因資源有限，要慘遭人道毀滅；如果將每年呢d放煙花既錢捐出去，會有幾多人同動物受惠？

與其錦上添花，何不雪中送炭？

強盜

每年都半被迫地比Ontario College of Pharmacist強搶好幾千元繳交licensing fee。以前有老豆幫我響加拿大交左，闊佬懶理；而家當然要自己online用信用卡交。剛剛又好肉赤地被打劫CAD$570.18(差不多港幣$4000)!!

雖然我係屬於Part B (Inactive Member)，即暫無權practise pharmacy(返去後要再考番張paper update自己d law先至可以再當藥劑師)，但年費就一樣年年加；而且升幅唔細。早在上年10月已經收到OCP既Email話"Pharmacist annual fees to increase from $509.14 to $537.91"，加埋8%GST(無錯，牌費都有銷售稅!!)，就變左CAD$570.18........唉!!

香港既藥劑牌費就由初返黎時，十多年都係五百幾港紙，無乜點加過；而且呢幾年公司幫我比埋添。

好心死人加拿大學吓香港啦，乜都麻煩過人(e.g. renew Canadian passport)，收費又貴過人(e.g. pharmacist licensing fee)。

冧歌有情人

鍾意Hugh Grant，唔係因為佢讀過Oxford，而係因為佢同Jude Law，Ewan McGregor，Jeremy Irons & Jamie Oliver一樣，係英國人；無錯，我對英國人係有偏好既。

另一個原因，係我一見到佢個樣就會自不然發笑。佢既英式幽默，唔係美國人咁用誇張表情唧你笑，而係字裡行間既自嘲，令你不期然會心微笑。

又係Annie，又係UA太古城，9:35pm。









一開場扮Duran Duran既John Taylor，真係突破左佢一貫做開既英式紳士角色。對我地呢ｄ三字頭，中學時期聽過Duran Duran既人黎講，覺得開頭呢幾分鐘既老土，又熟悉。

聽講Mr. Grant本人係五音不全，要佢片中唱咁多首歌，真係難為。成套戲非常light-hearted，我一向係睇戲好少笑既人，都每隔幾分鐘笑出聲；片中對白，真係應記一功。

好睇過"緣份精華遊"。

拜年第二擊@樂富

匆匆去Starbucks隊杯啡提提神，就過樂富林家拜年。

唔知點解父母硬係新年要比d細路著長衫，攪到個個有d酒樓知客feel咁。雖然我好耐無見佢地，但都係坐左個多鐘就閃喇；無留低食飯。

要返黎補一補眠，今晚仲要睇戲。

拜年第一擊@CCC

躂落床都唔夠兩粒鐘，又要起身梳洗出門。









約左梁師奶，五叔五嬸，堂大佬Benny & 堂家姐Anna 11am去銅鑼灣木球會飲茶。當然年初一呢d日子，每個侍應都會好好口，續個黎同你討利是。

五嬸自從開始做化療之後，胃口仍然OK；最緊要都係食得落，盡量保持體力。如果好似我Daddy當年食唔落野，體力就會衰退得好快架喇。

新年連d點心都有髮菜，蠔豉，豬手。雖然CCC都叫做私人會所，但中菜廳價錢唔貴，9個人飲茶都係300多落樓(如果你無計堂大佬比左幾多封利是既話)。

戰利品

由3am迫到5:30am，我只係買左：

1. 吹氣桃花，去年既款式；不過上年賣$38太貴，所以今年跌價至$10至買黎玩
2. 海綿盤桔，幾的式；$10還價後$9
3. 叮叮糖，從來都未食過，所以買黎一試。$5兩包，揀左薑同椰子味

兩位Annie都有買鮮花，但我就真係唔多好呢家野。今年天氣暖，好多花都開得好殘；不過臨收檔，點都比佢地執到d平野。"五代同堂果"竟然有一檔$5任你兩手盡囉!!兩位小姐揀到不亦樂乎之際，我就充當一條仔既角色，幫佢地拿住d野響檔口外面呆等。









Annie甚至用$10買左對大桔，唔係講笑，睇落大過佢個胸添呀。

好似傳統慣例一樣，點都要收工前行去「澳門茶餐廳」嘆個宵夜/早餐。

返到屋企都天光喇。