繼續向Laruce屈服

二月都已經係回南天，全球暖化真係可怕。

頭髮frizzy既程度有如癲婆，雖然家陣鍾意既殭屍男唔好洗頭，但無理由同佢睇齊。所以忍唔住去Sogo Club 15樓Hairdo，搵Daisukeさん剪掉3吋，再黎個直髮Laruce令佢貼服。3個多小時，多得有部portable DVD陪伴左右，帶住耳筒日劇照煲。

放低$2100，鬼叫梁師奶生得我天生捲，財散人安樂。

仍待觀察

停左兩日止痛藥既烏烏，大部份時間仍響籠內；只係日間梁師奶比較靜態時先放佢出黎鬆一鬆，放飯時就一定入籠，怕佢興奮起上黎大動作。

可幸尚算平靜。

剛放下大半心，梁師奶打黎憂心忡忡話佢剛又叫(痛)左一次，成個紮起。我安慰佢話始終未完全好番，偶然會有陣痛；只要係慢慢進步中，就由得佢自己調養，總好過不停咁睇醫生食藥。

希望無大礙吧，真係心情上上落落都因為佢。

366天的約定 (Threads of Destiny)

聖誕前響東京見到呢套日劇版同電影版同步上畫既手機小說故事"赤い糸"(紅線)，已經被舖天蓋地既宣傳吸引；返到香港第一時間逐集下載，與日本同步收睇。

今個週末，日劇都大結局了，電影版響香港3月5號先上，知道晒個故事(仲要係detail版本)仲點會比錢入場呀？

不過整個故事感覺清新，主題曲HY既"366日"應記一功。(366日係因為男女主角都係2月29日生日，呢兩個4年生日一次既人被命運中既紅線所牽引既故事)

悶極無聊Look

好幾位朋友都問起烏烏近況。

佢情況有進步，行得比上星期穩。不過今日off止痛藥，聽日off埋muscle relaxant，所以要睇多幾日痛楚有無翻發。

呢幾日講真點都有點忐忑不安，每次踏入梁師奶屋前都唔知佢情況如何；真係返工都無乜心機。

未受傷前已經長毛要沖涼既佢，再拖多兩個星期，加上呢幾日又熱又潮濕，可想已知佢有幾唔舒服；好彩今日幫佢沖開涼既姐姐家事纏身都抽空黎幫佢沖左個涼，連日黎既酸粟味一掃而空。

仍打算多關佢幾日籠觀察，唔再痛先慢慢逐步比佢重拾自由。

京華Roadshow

去年9月攪過，生意唔錯；食過翻尋味，今個星期再encore一星期。


Sinmei個肚鑼咁大，尋日一早都落去睇set up，真係辛苦晒佢。呢兩日三舅父同Ivan都輪流黎開會，仍未有時間去"探班"。


星期五晚同星期六下午都會有Centrum及Caltrate巨樽響門口宣傳，雖然唔係我扮，但行過不妨同佢地合照吧，哈哈。

難得乾淨

因為大紅，所以殭屍男被邀去Oscar作頒獎嘉賓，兼可帶動一群teenagers audience收看。

學佢話齋：I thought it was a joke.....

平時不修翩幅兼唔鍾意洗頭既佢，難得執得咁正踢死兔視人；唔駛化白面裝既佢，有點Jude Law + Leonardo Dicarprio look(只係本人意見)。

我的美麗日記新年體驗超值組

唔知係大S推介，定係阿蘇台灣之旅節目介紹既效應，台灣統一生產既"我的美麗日記"面膜人氣越來越高。

連尋日做facial既Erika都有朋友送左盒比佢試。

唔駛去台灣抬，因為萬寧都有得賣；雖然比台灣貴少少，但面膜咁bulky既野，點都要比錢人賺。經過見做weekend特價，好奇心驅使下，放低$138買盒新年Limited Edition既雜錦gift box黎玩玩。

一pack兩盒x11片(薰衣草，黑珍珠，紅酒，清酒，玫瑰.....)，加送1片山茶花極潤保濕面膜。

睇個packing都係target靚妹，不過見過引價錢唔貴，一試無妨(家陣敷緊紅酒，有點似Dimetapp既提子味)。

超"卡娃依"既官網：http://www.beautydiary.com.tw/

Midnight Sun: Edward's Version of Twilight

既然呢幾日都要陪烏烏，索性響Twilight作者Stephanie Meyer既網站download一篇佢未完成既新作PDF"Midnight Sun"黎追。

Twilight系列既4本作品都係用女主角Bella既第一身描述，而呢篇Midnight Sun係作者用殭屍靚仔Edward Cullen既角度黎陳述第一本小說Twilight既故事。

佢同女主角有interaction既場合當然有overlap，但因為殭屍男識得mind reading(唯獨只係佢無法解讀女主角Bella既思維)，所以男主角既版本為個故事加添左好多另一角度既細節。

點解未完成會有draft scipt睇？皆因去年底有唔識相既熟人漏左個draft於網上流傳，激到作者於自己網站上發火兼決定"In any case, I feel too sad about what has happened to continue working on Midnight Sun, and so it is on hold indefinitely."

雖然未完成，都有264頁比讀者過一過引，因為作者一怒之下將draft script自己po上去網站度以正視聽，有興趣者可以向下邊網頁有"Midnight Sun Partial Draft"下載：

http://www.stepheniemeyer.com/midnightsun.html

困籠一星期後潦倒Look

當堂跌晒watt。

呢兩日無痛(因為仍然on pain killer同muscle relaxant)，但行路就有點拐，而且兩日未屙屎。

困左成星期，神情當然有點落寞，而且因久未剪毛沖涼，頓變成"污"烏。

希望佢失去呢段時間既自由，可以自己好得番啦。

又徙錢

尋晚梁師奶抱住阿烏成晚，結果到2am佢先安靜落黎。

我都唔會訓得好，而且整日都有點心神彷彿。

好彩食左止痛藥既佢，似乎唔再痛，食慾旺盛；梁師奶決定攬住佢訓。

放工幫佢去坑口"寵物樂園"買chicken & brown rice狗糧時，個哥仔都話呢類脊椎問題，細狗尤其是西施，臘腸狗等常見，因為脊骨比較長。通常都要入籠監禁一段時間，長則要兩個月。

平時甚難sell到我野，但竟然比佢sell到買左盒狗狗Glucosamine粉比佢，等佢既關節修護得好d。

但，

梁師奶一見，就話呢間野除左英國Burns有機狗糧外，其他賣既貨品都好鬼喳；大拿拿$440，應該都唔會比烏烏食架啦。

返去網上一search，頂，美國網上只係賣US$20，平1/3；都算，但點解個packing完全唔同？

心痛，內疚，無助

烏烏下午夠期出籠。尋日精神情況尚好既佢，下午自由左幾小時後劇痛翻發。

梁師奶帶佢去西貢照左X-Ray，都見唔到有乜唔妥；當然X-ray未必能見晒所有問題，下一步可能要refer佢去照MRI(磁力共振)睇睇問題響邊。

下午知佢要再覆疹，已經心瘁不寧。入到屋見到佢要再入籠，個心直往下沉。

睇見佢痛得偶爾大叫，呼吸急速，梁師奶淚流滿面，真係覺得好無助。

到底是否我扯親佢？帶佢連續行左咁多日西貢行得太多？抱佢既姿勢出問題？定係咩野原因？

真係痛在佢身，傷在我地心。膽心得要命。

阿二壽宴第二擊

今次係同廖太們，地點係銅鑼灣軒尼詩道「順德漁鮮火鍋酒家」。

以小炒為主，價錢唔算貴，而且幾夠鑊氣：

兩斤油浸筍殼魚($384)，超香脆肉滑；如果比梁師奶見到，一定骨都吞埋。

例水係粉葛鯪魚煲豬骨($60)，煎藕餅($68)，蜆介鯪魚球($68)，大良炒鮮奶($88)，薑汁芥蘭($55)，麵醬唐生菜($50)......反而唔多特別亦唔抵食既就係半隻順德污糟雞($110)，其實即紅棗薑荵酒蒸雞件，就算係新鮮雞咁整都有點徙料。

香濃魚湯底邊爐

約左Connie，Jeffrey同朋友Joe及Josephine去銅鑼灣謝菲道「漁府」試新野。

地方唔大，唔夠十張枱；裝修亦無Openrice相片影得咁骨緻。

雖然紅衫魚加羊(取其"鮮"字)湯底係店內推介，但$188實在有點貴，所以退而求其次，叫個$58既鮮魚湯底，一樣香濃。

美國雪花牛肉，內蒙古羊脾肉片，脆鯇魚片，珊瑚蚌，桂花蚌，魚腐，高麗餃，豬皮，柏葉，皇帝菜等......碟頭唔大，但食材算新鮮。

每人頭獲贈鮑魚一隻，可打邊爐或鹽燒，我地個個都揀後者。

剛巧返香港開conference既Annie臨尾都趕黎露個面，雖然短短半小時catch up，以聽日早機返上海既佢，都算十分賞面。

妙手撩屎

烏烏今朝都未有開大，平時一日兩次，家陣兩日半都無一次，著實令人擔心。

所以下午make左appointment，再帶佢去西貢Pets Central比佢個鬼佬主診獸醫Dr Muir睇睇。

我一開口就問："Will prune juice (西梅汁) helps?"

佢聽後馬上笑："In short, NO."

用手檢查完脊骨後，再帶上手套，伸手指入內同佢撩屎!!!

真係手到拿來，啡色既大便清左4-5條，好彩仍然濕潤，應該唔係便秘，而係佢痞低個姿勢會痛，所以唔肯屙。雖然仍有少少響腸內深處，手指尖掂唔到，但知道無大礙，都鬆一口氣。

Dr Muir話烏烏一定要訓多3日籠，因為"狗仔同男人一樣咁衰，痛時就聽聽話話，一唔痛就故態復萌，完全忘記左之前既痛楚"。

見clinic內有個游泳機，可以做Hydrotherapy，$50一堂；等佢好番後週末帶佢黎，穿上救生衣做水療。

陪人追？

下午時代廣場有個新城攪既基本法活動，巢大小姐去追Hotcha，GEM之前，約左我食個lunch攝時間。

對面2000年廣場3樓新開左「大戶屋」既分店，見時間尚早唔駛排，就殺上去一試。

炸雞扒飯＋竹盤冷蕎麥麵($70)

迷你雞件飯＋熱湯烏冬($70)

炸物香脆乾身，掂！試左件雞件，肉質滑而燒汁惹味，呢個價真係唔算貴喎。

飯後陪巢小姐排左一陣欄杆位，未等到開show就入去探烏烏；反正Hotcha, GEM, Solar, Janice, 方大同及薛海琪都唔係我杯茶。

多謝契女既勁抗氧化情人節禮物：日產超甜草莓，及智利Carbernet Sauvignon紅酒。

烏烏近況

多謝各方好友問候，佢今日明顯比尋日精神。

雖然隻腳行路仍然有點拐，但訓左成日籠無乜郁動或者會腳痺。

最緊要係胃口依然旺盛，食得就好。

家陣迫切點係佢兩日無開大，可能坐低會痛；希望聽朝屙得出，否則有入無出都幾弊。

烏烏的鐵窗生涯

尋晚烏烏半夜忽然扎醒，於梁師奶懷裡嗚咽顫抖左數小時，嚇到佢晨早call我問到底西貢發生左乜事。

大佬，除左比隻大狗哄過有點嚇親外，無喎。

朝早師奶帶佢入西貢睇醫生，結果話係脊骨扭傷左；唔通係平時佢餵粒粒時跳得太高？定係我見佢唔聽話要行反方向時扯得太大力？

攪到整個下午都勁擔心，一收工就撲入將軍澳。

可憐，獸醫叔叔話要訓籠一星期，開左d止痛藥同肌肉鬆弛藥比佢。買左個呎半既兔仔籠比佢"休養"，上演一齣烏烏之監獄風雲篇。

真係寧願扭傷既係我囉。

連趕4場

放假最後一天，行程排得滿滿

9:30am

約左水喉師傅上門換慮水filter，及清理洗衣機既毛隔(我用左10多年既惠而普都無清過，難得開左出黎完全唔塞)

12:30pm

同對面返工既Alvin到AIA後街「山地人」咬個越南法包黎個quick lunch。剛去完大阪京都incentive trip既佢，竟然晒料到坐左個多小時往有馬溫泉day trip齋浸！

1:45pm

趕出「和三昧」join埋相約食晏既奶奶同阿丁，再轉場落樓下「發記」食甜品。除左個焗芒果酥皮卷超香牛油味之外，另外既紫米露同芝麻湯丸都好唔掂；真係要帶佢地去屋企對面既「福圓湯丸」試試。

4pm

假日例牌：同皇帝烏去西貢享受陽光與海邊

7:30pm

出返銅鑼灣食街既"iTHAI"，同卡生，Ellena & Amy黎個露天飯局。

食街為左應情人節，有點心思地佈置左個心型長廊。

越南特式麵包咖哩雞($125)，泰式鮮魚爐($138)，泰式珍珠椰菜($52)，香辣炭燒魷魚鬚($55)[唔夠熱，而且最大鑊係質感有點梅]，荵油薄餅。

第一次食爐燒烏頭，無想像中腥味；而且另上一碗湯邊燒邊淋，幾特別。鮮味，但肉質唔滑。