魔鬼蛋糕

美心之前推出既"天使蛋糕"已經覺得非常鬆軟香滑，近期既第二浪"魔鬼蛋糕"，標榜用70%法國Valrhona chocolate，聽見都流晒口水啦。

決定無需要理由，想食就買個返公司，自然會有人幫襯。

朝早到太古坊樓下美心，話要中午先有貨返；咁食晏後同Sinmei再去，竟然話最後個魔鬼蛋糕剛被買走......我衝口而出：如果我今日食唔到呢個蛋糕，會反枱架!!!

嚇到個收銀O咀，馬上幫我打電話去地鐵站既美心check到有貨，我地先過對面掃埋最後一個魔鬼蛋糕。

平時要$148，家陣推廣價$128。一落刀就知蛋糕底非常soft，而且面頭既朱古力醬極香又唔太甜；隨蛋糕附送既朱古力脆片，亦到無天使蛋糕既蜜糖脆脆咁甜。

朱古力愛好者既強烈推介。

身體力行

又一奇人奇技既新突破：就係Sales兩位經理級，要身體力行為下星期一返工既temp staff砌辦公枱同凳!!
以為347呎會議室坐7個人已經係極限，但原來多一個temp但樓下又堅稱無位既情況下，我地要發揮小宇宙，搬走兩個file櫃，整張有如小學生書桌既3呎玻璃枱比個新人；呢個甚至係"自成一角"既面壁死位!!
張枱窄到，連放個櫃仔都無地方，要比個盒佢裝私人野。
傢俬尋日送貨，但個安裝師傅要10日內至到.....唔通下星期一新人返工，我同佢講："你第一個task就係幫自己砌張枱凳"，我真係怕佢做半日會劈炮喎。

余經理邊砌邊搖頭，慨嘆：又話跨國十大藥廠之一，講出去真係會比人笑。

某程度上，都算係展現我地惠氏其中一個Quality "Collaboration"既team building exercise。

Pumpernickel
"All Day Breakfast"

約左廣告公司既Ebby同佢老頂食晏，見大家咁熟都無謂客氣，寧願casual少少去天后開過黎既Pumpernicke食麵包。
平時lunch menu都有幾款pasta選擇，但我就被"All Day Breakfast & Brunch"所吸引：

Eggs Benedict ($68)












Poached egg+Bacon+Garden Salad
on
Smoked Salmon
with
Hollandaise Sauce

with Orange Juice/Milk
+$10 Daily Soup (南瓜湯)









Egg Benedict 有好幾種，最基本的組合就是英式滿福麵包 (English Muffin)，水波蛋 (Poached egg)，荷蘭醬 (Hollandaise Sauce)，然後可以有所變化，在水波蛋跟滿福麵包之間放不同的夾層；愛吃肉的夾火腿起司，培根香腸無妨，怕胖的夾菠菜番茄，愛吃魚鮮的夾燻鮭魚，淋上自製的荷蘭醬。Egg benedict 一次都是一對，鮮少一隻上，所以吃完一對，肚子填得好飽，就無暇多喝它家免費續杯的咖啡，以及土司夾上自製果醬。

如果真係早餐黎食，加埋送既bread basket就太飽了點，但味道真係不俗。
反而Sinmei同Kerry點既Fresh Beef Burger就顯得有點乾。

M&M豪客

當今朝發現樓下惠康既椰子M&M已經斷左市，有點悔恨早兩日唔多買幾包。

結果Debbie幫手對住個惠康Store List打電話，幫我問到公司附近仍有存貨，第一時間撲落去買。

我用眼神一掃收銀隔離地下既幾箱M&M，冷冷地問：你有幾多存貨？

收銀(有點戒備)：你想要幾多？

我改變問題：咁一箱有幾多？

收銀(仍有點疑惑)：24包.....

我(師姐查牌語氣)：乜野期？

收銀(細細聲)：.....2010年4月......

跟住就好cool地：比箱我，個carton揀箱無凹既唔該。

幾豪氣呀。

限量版：椰子M&M

尋日響惠康買野，收銀旁加$5換一包，椰子味一向都係我杯茶，買左兩包試試。











一食停唔到口，淡淡椰子味並無掩蓋朱古力香，非常配合；真係會上引的。

而且每粒M&M都好特別地印左頗熱帶既圖案，甚至有少見既純白色。











最趣既係美國官網有呢個Live Cam，可以望住粒M&M點樣留落熱帶荒島，好CAST-AWAY feel：

http://www.mms.com/us/coconut/

非常隱閉的恒豐酒店Tea Buffet

真係算我身為香港人孤陋寡聞，當Carol SMS比我話今日訂左恆豐酒店tea buffet，我真係一頭霧水：乜恆豐中心唔係齋商場，竟然有間酒店響度？原來酒店響商場二樓側邊可通，再多上兩層，就係cafe"紅煙窗餐廳"。

難得連林Auntie到出動，林家一家7大小出黎tea buffet。$118信用卡有八折，當然咁既價錢唔會期望太高質數，但味道亦合乎佢"普通"既預期。沙律熱盤選擇唔算太少，有即製Crepes同生滾粥，值得加分既係有兩款口味既自助沙冰機(青檸及水蜜桃)，同埋4款Movenpick雪糕。

但Dinner Buffet就千祈咪試，因為我地5:15pm臨走時，見佢地已經擺晒ｄ頗削既蟹腳，青口小龍蝦壽司出黎走廊任我地呢類路人甲指指點點，而最大問題dinner buffet係6:30pm先開始，咁樣放ｄ海鮮響室溫成粒幾鐘，隨時食到中招。

另：多謝晒Carol既太陽花水晶同埋巢大小姐既櫻花香水，今年首份生日禮物(哈，其實八月都未到)。

絕對惡攪：山寨版四大天王

見Facebook同事po，真係似到呀：

唔只樣有5成似，連聲都有點亂真，內地真係乜都有。

乳酪風潮

其實我每日返工途中買yoghurt做早餐都有一段時間，Sinmei見我日日隊一杯，稱佢從未嘗過乳酪，問到底係乜味道？

有乜直接過佢自己品嘗？所以lunch time就買左杯比佢，開始佢人生第一杯yoghurt，導佢升仙。果然，Sinmei一試就覺得味道比想像中好，而且係越食越愛上，呢兩日唔係早餐，下午茶都總會見到佢手拿住一杯自隊。

Debbie見Sinmei食得咁滋味，都食埋一份；家陣樓下Circle K既Acti-V輕盈酪三隻味道係乜野expiry，佢地會比我更清楚。

一向"不問世(俗)事"既余經理見兩女大談乳酪，自爆原來佢每週都會食3杯......哈，唔聲唔聲。

"具俊表"病毒

繼Connie之後，公司既Kerry同Debbie都呈現同一中毒徵狀：不時發出"具俊表"，"具俊表"既叫聲!!

















Debbie因為只有週末可以睇，所以初期屬於隱性患者，但加埋Kerry呢個日煲夜煲既新病患，佢兩個日日響公司一唱一和："點解有人可以咁靚仔"，"真係越睇越得呀"之聲不絕，更甚者係今日圍攻Sinmei迫佢睇"韓版花樣男子"。

相信扮時運高聽唔到既余經理同Michael，一定暗地裡滴晒汗。

坐雞記送貨

萬寧響將軍澳尚德商場一連幾日擺Roadshow，我地都唔執輸整番個counter。
因為將軍澳區年青小家庭較多，所以特地整左6呎高既Caltrate兒童度高尺，推銷隻小朋友鈣片。

要Michael一個人抬落去就真係有點兒那個，所以下午call架雞記貨van，我同Michael做埋跟車，抬塊大型度高尺落去set up。












哈哈，拿住落樓既時候，真係有d似"默默"捧住卡沙巴王子既紙牌feel；如果我剪埋個"默默"頭，就真係襯絕。

Mr. Brain

大家一聽到"木村拓哉"呢個金柒招牌，就自然會將套日劇列為必看類；新一季日劇DVD剛出爐，暫且放低舊愛豊哥，先開呢套短短8集的"重頭戲"。

木村扮演的九十九龍介，原本是一名公關，因一次意外令腦部受傷，大難不死後卻使右腦開竅，繼而變身警察廳科學警察研究所（通稱‧科警研）的腦科學家。每個案件唔同嘉賓客串：小雪，龜梨和也，上川隆也，GACKT，仲間由紀惠........另加天然呆既"干物女"綾瀨遙做傻氣助手。

木村的角色頗似《神探伽俐略》的福山雅治，故事亦都尤如《HERO》的翻版，只能嘆一句：點解得8集咁少？會否拍續集？電影版？

公司觀日偏蝕

呢兩日新聞最熱門既話題，都係百年難得一遇既日蝕。

大家講得多，今朝自不然對個太陽都特別留意。9點多個天真係比較陰暗d(唔知是否心理)，大家就衝落樓下12/F Pharma office向東面l落地大窗抬頭望天......

初頭一瞄只覺好光好刺眼，嘗試用相機拍低亦睇唔到d乜；不過如果細心望太陽下既光影，就可以清析見到彎彎一把鐮刀既太陽。




最可惜影唔到啦。

囍宴‧東丰

裝修左超耐，公司樓下之前7-Eleven既舖位，近期開左間Jacky Yu既囍宴新店。

大家都係新屎坑，所以日日大排長龍。我地四條女亦都係本住新鮮感，試個set lunch水準如何。

唔掂。大都淡而無味。

Set lunch配青瓜海蜇小食，及熱飲(杭菊蜜)：

招牌擔擔麵($62) - 望落去都幾"非一般"，問Pauline味道如何，佢一個囧樣已經表達晒

沙爹蘿蔔蚊牛肋骨配芝麻白飯($66)-芝麻欠奉，飯亦超硬，連我喜歡食硬飯既，都怕會食到胃痛

秘製鎮江骨配芝麻白飯($76) - 唯一比較夠味既一道菜，如果連呢味都淡，就真係經典囉

唔好話set lunch，就算Debbie散點既煙薰鴨胸拉麵($58)，淡得黎麵質亦稔，水準以下之作。

囍宴真係越來越差，好心Jacky就唔好掛住上鏡，落多d心機去改善味道啦，否則壞自己招牌。