Gala Dinner

晚會係化妝舞會。

你真係要服大陸d同事鑊鑊都玩得咁認真，場內不乏宮庭裝，蜘蛛俠，紅尉兵…..我地借廣告公司既雪姑小矮人衫頂住好彩都唔太失禮。阿Paul既書生打扮真係極度認真呀。

我地既「雪姑五友」係第二隊表演。估唔到中場請阿Paul上台咀公主Michael時，佢簡直擒落地好似想強暴佢咁!!要余經理幫手拉開先至保到Michael‘清白之身’!

每年人人最期待係成都班女，一向以跳得放肯露肉見稱。今年佢地大跳「如果愛」，似模似樣架；抵佢地囉獎。

得我一個坐head table，誓死霸住有利位置影相。

阿Paul同三舅父佢地成晚比唔同office既人輪流黎隊，真係酒量少d都頂唔住。

個流程好悶，好在10點多就散。之後雖然仍有disco，但我寧願返上房對住部腦好過對住d唔熟既大陸同事。

2006年既除夕，依然係一個人過。

Cool Slideshows

更多相於：
http://glorialeong.spaces.live.com/

年末年始

My New Year Resolution：

ELN GT NAO VMOD OE

好一個Da Vinci Code……哈哈哈哈哈!!

東莞年會 – 開會篇

預左會悶足大半日。其他同事就好啦，被安排坐最後一排，閃出去歇一歇又方便；Daisy & Debbie甚至影印埋sudoku黎玩添呀。我同余經理就無咁好彩，因為係阿Paul既direct report，坐前面第一排，全程要扮留心。但衰在佢地只係講大陸d業績，關鬼我事咩。連畫公仔都唔可以咁張揚。

Lunch阿余經理都仲可以去番同班同事坐，叫做有淡安樂茶飯食；我就繼續坐head table，對著阿Paul同三舅父做陪笑!!

3點鐘一行300人落去lobby影大合照。以往就排排坐，今年攪攪新意思，大家一齊砌個中國地圖出黎。由二/三樓影落黎，唔駛排高矮，15分鐘就攪掂!!

其他大陸同事之後有分組會議，我地香港就免疫；可以偷少少時間upload d相同寫blog
More pics http://glorialeong.spaces.live.com/

東莞年會 – 到步篇

同班同事坐2:45pm由旺角中旅社既直通巴士，經落馬洲/皇崗上東莞開年會。

計埋過關等車d時間，都成6點至去到位於東莞厚街既Sheraton Hotel。一落車就有大大個牌標明惠氏年會；大堂個接待處仲grand，因為唔同地區既office都陸續到達，reception坐左10多個人黎安排派房匙。Martha唔黎，我就要同一條重慶既女share間房。

房間頗大，而且間hotel算新。寬頻免費任用，好彩我死都抬埋部notebook黎，先至上番好幾日上唔到既msn。

每人都派發樓下cafe既buffet餐券，咁當然襯d人未咁多時6:15pm就入去黎個early dinner。食物ok架，生蠔魚生，印度烤餅，拉茶乜鬼都有。你話味道跨啦啦又未至於，但點都比惠氏早前攪既X’mas Party好。Michael狂隊數碟生蠔，Daisy仲笑佢話一定係食定過兩日去澳門用，哈哈。Michael你係我地白雪公主黎架，真係要小心身體屙到腳軟都要演出。

上左4樓既會議室視察聽日個場；工人而家仲佈置緊。睇落就無往年咁grand喇。

今年每人仍然係派件North Face制服比我地聽日著；薄fleece料，頗熱架。女既深紫，男既啡紅。款式比去年老套。返去睇怕都係要黎孝敬梁師奶。

又係「小肥羊」









睇完戲約左卡生同佢老友Amy去銅鑼灣廣場「小肥羊」打個宵夜特價邊爐。比起早幾日既謙記，呢度算平靚正。

Amy剛去完北京旅行返黎，我其實都好耐無見過佢喇。

羊片我地只叫左３碟，反而菜會食得比較多；宵夜真係唔好食太飽。上次Asahi個啤妹欠阿卡生份gimmick(迷你Asahi一罐)，今次見又係佢，幫佢落單之餘，卡生點都屈佢醒多罐囉。

10pm打到1am散，仲跟埋阿Amy上去佢屋企睇吓鬧市中(奶奶同一棟大廈)既套房係點既；無想像中細，叫做乾淨喎。

新鐵金剛智破皇家賭場









聽奶奶同Shirley都話好睇，放工見約左打邊爐未夠鐘，同卡生出銅鑼灣即場買飛睇。

明珠JP 7:15pm。

其實睇完兩個半鐘都唔係太知到底成壇野係為左乜。為錢？為恐怖份子？而幕後主腦又有乜動機。

開頭似成龍上身咁飛簷走壁，當然James Bond係槍林彈雨下永遠打不死。中段到賭場豪賭時，"眼神接觸"得太耐啦，有d造作。

套戲勝在奇貌不揚既男主角都叫做打得搏命，同埋取景叫幾靚。

臨尾明顯地有cut到片，所以有d奇怪位：例如James Bond一分鐘前仲坐緊輪椅，下分鐘就可以同條女響床上糾纏。

唔係太差，不過無想像中好，故事有d堆砌。

「迎囍」變質

近排真係多見朋友少見阿烏。襯未去東莞，約埋廖太們去老地方「迎囍」聚一聚。









雖然大時大節期間都預左無平套餐，但ｄ餸加左價都算喇，問題係連質素都下降呀嘛。以前就覺味味都唔錯，但今次就味味都普通。唔通佢轉左廚？

侍應生服務更加一落千丈。全程黑口黑面，就算係忙都唔係咁既態度啦。

我地未食得飽都決定過檔食甜品，就可以想像呢間野短期內會被我地ban左。

甜品就行去登龍街既「糖人街」；食左個叫"甜蜜蜜"既芒果西米溝豆腐/喱哩爽。呢間野舖面細細，但就不時都坐滿人；而且不乏遊客添。

慢到想死

相信大家同我一樣，同MSN messenger完全失去連絡。

今日連公司收發外來d Email，如裕利既都收唔到。一個台灣地震，就令半數互聯網世界癱瘓。我呢d靠電腦度日既"電車女"，更加有d被拋棄響孤島feel添呀。

雖然仲上到blogger，但upload有如龜速；慢到我無名火起!!

如果呢兩日唔攪番掂，都睇怕我無須要帶埋部laptop上東莞囉。

大閘蟹味百力枝

Shirley上星期去左上海旅行幾日，買左巨型大閘蟹味百力枝比我!!

呢d固力果授權內地生產既百力枝，只係響浦東機場入閘後既免稅店先有得賣。我見佢標價過百港幣，實在太貴唔捨得買(日本d地區限定版都係1000yen，即60多港元)。蟹味唔算濃，有d海鮮既腥味添!! 哈哈。

除左上海大閘味，另外仲有"北京填鴨"同"香港魚翅"味百力枝，同埋"荔枝Pocky".......以前只係試過魚翅味，唔係好得；似d溝左醋既漿粉水味就真。

Annie個妹送左關島/塞班島既揶子味百力枝比佢做手信，佢都醒左兩條比我試；哈哈，身邊既朋友實在太清楚我既喜好啦。

星期五就返加拿大既Shirley，下午特地過黎太古坊，同Gigi & 我落樓下「金煌庭」食晏。佢都叫做見左我幾次，但要見Gigi呢個大忙人，真係要提早預約至得。

謙記吉祥閣

新開既分店，位於鵝頸橋附近。









裝修無疑新ｄ，但地方細過老店。價錢好似貴左，我同Connie & Annie３條女，醬油加碟花生都收我地$51！咁當然佢既醬油架係幾好玩。









因為怕熱氣，我地都係選左個"大澳蝦乾清湯底"。好在(都唔知其實算唔算好)碟頭勁細，可以叫多幾碟。無仔在場，當然係少肉多菜。同Connie隊左兩枝大啤，唔係因為個啤妹索(in fact佢有ｄ扒樣)，但條女唔hard sell兼頻頻幫我地斟酒。

料就算新鮮，服務態度亦都算好。不過如果我地無叫ｄ特別野都過$200 per head，打邊爐真係有ｄ貴囉。

滿城盡帶黃金甲

今個聖誕檔期，我只係想睇傷城同呢套戲。

一早網上訂左飛，同Connie, Annie, Charlotte & Shirley去UA TimeSquare睇5:30pm。









無疑真係一部大製作；淨係睇d金錚錚既戲服，同宮庭既華麗佈景都要響戲院睇至夠震撼。唔好講笑，走廊條條柱，連同餵鞏俐飲藥既碗，都係類似「琉璃工房」既彩玻璃，唔怪得知製作費要成3億幾啦。

就算我唔係麻甩佬，對眼不期然會focus響鞏俐同班宮女，谷到湯碗咁大既胸度。但無可否認，鞏俐同劉燁都做得好好；周董亦都比想像中出色。反而發哥既內心戲唔多，有ｄ比下去。

後段打鬥場面有ｄ為左顯示大製作而拖得長左，但整體唔係影評講得咁差呀。

UA TimeSquare女廁
臨睇戲去揸揸水時，赫然發現一排女廁門口貼滿Nana 2既promo!!

如果唔係成班女望實，我真係想自己拍埋去整番張合照。

呢個media位都真係幾effective喎，因為好多人入場前都會先交水費；女廁永遠大排長龍，點都迫你望幾分鐘啦。

雖然Nana 2好多主要角色都換左人，但都好期待1月4號既上畫。

必看!!

話唔去又去









早兩日至話要ban呢間b仔記餐廳，言猶在耳，結果今日又同Connie & 奶奶去下午茶。

銅鑼灣飲tea既地方來來去去都係Sogo一帶，諗唔到新地點之餘，都係比多次機會佢。

4點鐘去到，walk-in都係等左5分鐘就有位。一樣係比個窗口位我地。

我點左個Raspberry Tart + Coffee，賣相唔錯，味道就不過不失啦。反正食cake都唔可以差得去邊，無加一又8折，本來$78，折實$60個tea set咪當買個地方囉。

唔識主角既生日Party

Ellena姐約左我夜ｄ出黎飲野，有兩場比我揀，早些少既尖咀同午夜後既老銅，做左一日義工點都要返去換件衫同個妝，我揀左夜ｄ第二場。

1am去登龍街永光中心10/F既TT Pub。

最抵死係電梯內撞到上海LB(我地大陸用既廣告公司)既account director Paul Chan。呢條友去年第一次見時，已經講左好幾次話應該識得我(我自己就全無印象)，只可以話佢可能係某ｄ場合見過我；但誤叫我做"Grace"就真係抵鬧。









基本上係一個生日party，主角Martin包左場；入場位位$280。場內9成既人都係唔識既，只係識Ellena同上次BBQ幾條女。不過呢ｄ環境識唔識根本唔係重點，因為大部份人都係會走埋黎大家交換個名就傾得兩咀。聖誕係咁意都有玩交換禮物，我抽到既係邊個送就更加不得而知。

成晚玩得最多係"幸運骰"同"龍蝦枚"，隊既清一色威士忌溝綠茶。

Ellena其中一個朋友仔唔見左部手機，擾攘多半粒鐘，走既時候都4am喇。

同條女手拖手去尖東睇燈飾

一ｄ都唔浪漫！因為條女係一位輕度智障人士。

都係為左比面梁師奶，我同Annie，細佬拖埋女友Sharon落水，一齊同梁師奶跟住佢兩個"嬸狀"教友，行去尚德一間叫"基督教懷智服務處"，帶一班輕至中度智障人士去尖東睇燈飾。你無睇錯，天主教x基督教，真係型。

呢班係屋企照顧唔到，要住響中心既智障人士；好多都係成年人。









我地每人負責帶一件，我條"女"叫冼詠恩，特點係唔鍾意人地掂到佢，不時自言自語，同間歇性出力咬自己手掌！佢唔鍾意比人掂，但落車又會自己主動拖住我。

一行大約40人，7:30pm架旅遊巴響尖東羅馬噴水池度落；大約只係行出海旁一小時左右。

尖東人流無海運咁惡劣，而且剛好8pm「幻彩詠香江」有煙花，可以順手撈埋。

我就發揮部手機既night mode，幫佢地影左ｄ相。佢地大部份有得出去都顯得好開心，反而我地呢ｄ行動自由既人，就唔會感受到出街點會帶黎咁大期待。

唔駛9點送番佢地上巴士，我地就響尖咀散喇。

http://glorialeong.spaces.live.com/

教堂打雜









1:30pm去到坑口梁師奶去開既"聖安德肋堂"幫手佈置下午既攤位遊戲。

基本上呢個教會聖誕親子活動，係天主教「聖雲先會」攪既。地點響平時望彌撒既禮堂內，set up 8組遊戲比ｄ小朋友玩。唔同既成績可以蓋唔同數量既印章，黎換毛公仔。有個聖誕老人同ｄ小朋友影相，門口又有Popcorn machine派發爆谷。









我同Annie再加件不知名既哥仔負責一個用膠圈扔雪糕筒既遊戲；看似簡單，其實好鬼難扔中。小朋友可以試完再試，做死執圈圈既哥哥仔就真。

我對呢ｄ野一向無耐性，由3點折磨到5點，真係笑到有ｄ攰。

其實唔明ｄ咁低能既遊戲有乜好玩，我好似佢地咁細時都唔會有興趣啦；要個公仔駛鬼玩得咁辛苦咩。

定我真係無乜童真？

Annie初遇烏烏

聽過阿烏好多次，Annie襯今日會黎幫梁師奶手攪教會既活動兼夜晚一齊做義工，特地提早一粒鐘上黎見吓呢隻皇帝仔。

烏烏一貫高竇樣，但我地食野既時候就完全唔同表情；比個可愛樣你想搏你餵佢。

正一世界狗。

傷城

自去年要坐第一行頭顎顎睇3粒鐘King Kong之後，都係覺得幾蚊手續費係唔慳得既。今年早成個星期網上訂飛睇"傷城"。

零晨12:20am UA Times Square。









雖然都睇到成兩點幾，但套戲唔悶喎。金城武一向都係我杯茶，梁朝偉塊面就真係鬆左ｄ喇，勁厚粉。

去到中段我都估到梁朝偉既真正身份，不過出乎意料既係舒琪竟然會接ｄ咁大茄既角色。

好彩今晚有通宵地鐵。

超無氣氛倒數









差不多12點落到去，以為可以黎個Christmas countdown.......人就夠多啦，但氣氛就無囉。

無蘋果countdown，踏入12點，只係響大電視播左段低能卡通短片。無歌星，無特別燈光，更加遑論會灑紙絮。成班在場等既人都有ｄ鼓譟下散去。

真係同上年apm countdown既氣氛差好遠。

The SUN的毛蟹X'mas Set

唔想去食超貴價buffet，約左Annie，Shirley，同過左午夜就生日既Charlotte，一齊去時代廣場The SUN黎個聖誕餐。









$488兩位既X'mas定食，有平時食都唔會平既毛蟹，呢d日子算抵食：

冷嘗北海道熟毛蟹
炭燒木魚稻庭冷烏東
3點刺身
酒蒸石燒活九孔鮑魚
毛蟹膏甲羅燒
海鰻天婦羅
毛蟹釜飯
甜品
聖誕特飲(香檳+橙汁)

味道唔錯。毛蟹勁甜，而且ｄ殼都大部份剪好晒，唔難拆。木魚包住ｄ冷麵條，外面係湯汁既啫喱凍；非常特別。









4條女由8:30pm磨到差不多12點，我地又係最後一枱；無法，要就之後睇戲時間，又唔想咁早落去同人迫。

多謝晒ｄ聖誕禮物。哈哈，Annie送既Starbucks coupons，簡直包起左我一月份既晨早咖啡！

要睇毛蟹，又係呢度：http://glorialeong.spaces.live.com/

再試新相機

飯後襯利園一帶無咁多人，我地再試卡生部新機。今次我帶埋自己部Sony T1同佢比拼。

X'mas Lunch at b記餐廳









同卡生再去Agnes b 餐廳食個聖誕lunch。唔一早訂座用埋credit card過數，都咪駛指意會留張枱比你。

呢ｄ日子當然會有ｄ唔多抵既X'mas set menu；不過我張ami card有8折，唔算太離譜。

同上次夜晚黎相比，今日較多一家大細。侍應生服務水準亦有改善。

今次我地唔飲餐酒，改試酒精68%既苦艾酒(Absinthe)。其特別之處，在於先響杯內斟約1/4草綠色既Absinthe，再有個勁古典設計既架生，將冰水慢慢滴落粒方糖度，再落杯酒。味道有ｄ怪，似馬莎某種wine gum。

頭盤：Smoked Duck Breast, duck gizzards, duck leg confit, girolles mushroom, pine nuts, mixed leaves and walnut oil
一句講晒，"鴨雜沙律"，亦都係成餐最出色既一道菜

主菜：Roasted Atlantic cod fish, provencal style vegetables, garlic mayonnaise and basil coulis
味道普通
卡生叫既春雞胸簡直鞋口添啦，兩味都唔係好掂

甜品：Traditional Christmas Cake
即朱古力蛋卷，好似嘉頓蛋糕上面加少少裝飾咁；Starbucks既X'mas log cake應該好食過佢

咖啡+Chocolate Truffle

每人送左包聖誕玩具，我地第一時間帶左個鹿角影左兩張相。比較過引係送埋一男一女兩個b記薑餅人比我地，呢個最得我心；哈哈。

上次唔比影相架，今次個個都舉機，佢都無理喇；咁餐廳真係無理由唔比人影相既。

呢間野都係應該隔好耐至會考慮再試架啦。

Full Course Meal: http://glorialeong.spaces.live.com/