La Vie Avec Amusement: 01/01/2006

埃及車禍

傍晚新聞時聽到捷旅假期一個旅行團在埃及東南部遇到翻車意外，造成十四人死亡，三十人受傷，家屬晚上乘飛機到埃及善後。真係替遇事既港人家屬難過。本來開開心心新年一家大細去旅行，結果喺埃及呢ｄ醫療同通訊都唔發達既地方出事。就算當地大使館派人去都要坐6小時車至到。如果有家人join Jetour去當地，想了解情況而不得要領既心情都幾煎熬架。

將傷者長途拔洩運返黎就醫都係一大難題；可能政府要出包機添啦。

諗起日劇"Good Luck"都有類似情節..........

Lunch @ 紅螞蟻

Charlotte今日唔駛返，兩條女百無了賴出黎利舞台對面紅螞蟻食晏。

好耐都無黎，個menu多左好多野；簡直花多眼亂。但得兩個胃又怕眼闊肚窄。

試左個三文魚子鮑魚雞粒火燜飯，涼拌露筍同蘿蔔糕。

甜品再隊多個鮮芒果肉ｏｎ椰子沙冰。

Plan台灣行程最好問Charlotte，佢介紹當地導遊帶我地去近郊的九份&野柳。４月底既台北之旅可以有ｄ喪食之外既sight-seeing。如果唔係返黎ｄ相一定會以為我係飲食男女記者添呀。

魔幻王國: 獅子‧女巫‧魔衣櫥

以Manhattan信用卡$1換的UA Timesquare 10:10pm場。好耐無去UA睇戲；可能比IFC縱慣左，覺得呢間戲院好舊同d凳唔好坐。

同Annie分開一頭一尾，但總好過兩個一齊坐前座啦。

成套戲兩小時有多。無一般迪士尼電影咁小朋友，d特技幾好喎。幾個細路唔算可愛，我反而幾鍾意個半羊人同埋個白女巫。

呢套至係我農曆年唯一自己想睇既戲。

幹掉了6本漫畫

懶洋洋的年初二。

一口氣煲左6本漫畫：

Age 35 (柴門文) 上/下
Alive 第7冊
20世紀少年第20冊
吸血鬼十字架 1-2

要梳洗出門了。

Starbucks賀年福袋

早兩日仲惆悵買乜野去拜年，因為朱古力，糖果，曲奇太“行”啦；而且Gigi又係萬寧buyer，無理由去萬寧買番野去佢度拜年咁攪野架。

好在見到呢份非常"Gloria"式既手信：Starbucks福袋!! $108裡面咖啡味蛋卷同花茶一盒；再加環保袋一個。而且2月內將吉既鐵罐拿回去Starbucks，再送一包曲奇比你黎支持環保。

我係唔係寫到好似雜誌線稿呢？

好高深既－春田花花同學會

係！又係同梁師奶睇戲，一樣係MCL將軍澳。今次係6pm睇春田花花！！！

呢ｄ賀歲片一味多星，結合麥兜卡通cross-over真人。但我真係低估左呢套戲，因為我坐左成粒半鐘，真係一ｄ都睇唔明囉！！

平時一套低能白黐戲，我可以大肆批評。但如果連自己都睇唔明，都唔知係佢白黐得濟超出我理解範圍，定係佢好高地想表達一ｄ野，而只係我領略唔到.......

拜年：樂富

返屋企樓下Starbucks充充電之候，又再次上路去第二站樂富林家。

佢地簡直可以用人聲鼎沸黎形容。ｄ細佬用５毫黎聚賭魚蝦蟹，10數個大人分幾group傾偈.......

可以想像如果夜ｄ開埋台麻雀會係咪野盛況。（真係更覺自己屋企既寧靜係幾咁難能可貴！）

唔係留左好耐，因為仲有下一場........

拜年：大埔九龍坑

9am約左Gigi妹阿菁坐火車入粉嶺再轉的士(真係好似去郊遊咁)，入我多年老友兼同學Gigi屋企拜年。初初返香港既時候，好多時都會入去燒野食。有一兩次weekend仲留宿添。所以Dave(Gigi老公)成家都對我好熟；陳auntie而家仲係叫我"阿慧"而唔係Gloria。入聯合魚場拜年變成我年初一既例行活動。佢地過年好有氣氛，可以食到自家製蘿蔔糕，仲有梁師奶唔會煎比我食既年糕同椰汁糕。室外花園既年花同周圍既炮竹聲都好有過年feel。

Gigi父母咁岩又由多倫多返黎探孫，我當然要hea入去拜年兼逗利是。

Carin見Carton到我呢個索姨姨都好比面，乖乖地比我影左好多相ｐｏ上黎。

後園養左３隻大狗Tiger, Jack & Momo。如果我帶埋烏烏入去拜年，一定會赫破膽！！哇哈哈！

大年初一，遇水即發？!

今年又陪Annie半夜行維園花市。上年12點過後仍然好迫人，今年我地再"早"d，3點至出發！！
３點半花市仲人山人海架！

都咪話，乾貨一樣好逼囉。我諗明年真係訓醒4點後去都得呀！

可能個市真係好左，桃花d價都企得幾硬。Annie一心買株細桃花返去，由$80講到$50成交。

我對真花就無乜興趣喇，反而見有ｄ吹氣桃花就幾得意。不過$30有ｄ貴；因為真係好無謂。

乾貨行唔夠半粒鐘，本來毛毛雨忽然邊大！仲係好大嗰隻！

唔駛好耐對鞋已經濕晒，想唔閃都唔得。唯有喺天橋底避一陣雨，再hea去澳門茶餐廳食左個特貴早餐（平時既份量，但價錢double)。

返到黎都６點啦。

好彩有通宵地鐵，同奶奶比我既西施狗地鐵飛。

真係要補一補眠，２小時後又要出發去Gigi屋企拜年。

霍元甲

又係因為有MCL將軍澳贈券，見梁師奶咁想睇李連杰(佢d taste你有時真係估佢唔到!)，被半迫半就地陪佢睇呢套自己就一定唔會睇既戲。

都係同成龍d戲如出一徹，由中國人以武術打低晒d鬼佬。講真我唔覺霍元甲算係乜野民族英雄。擂台上打嬴人地就代表中國人唔係東亞病夫？當時上海比外國人分晒租界，中國根本係受經濟政治侵略；又豈是打交可以挽回尊嚴？

梁師奶睇李連杰，我就入去睇型男中村獅童。估唔到歌舞伎出身既佢，都打得兩野喎。

放早，但去香港大酒店hea

放3點，隔離裕利仲開心啦，12點半都已經拉閘放狗。好少見佢地會早閃過我地。

其實大家都holiday mood，我都係long weekend前盡量清咁ｄ野。返黎要開波做Strategic Plan。

本來我打算一個人代表晒ｄ同事去大酒店向余經理個Daddy鞠個躬；咁近新年好多人都未必想去呢ｄ地方。細Dee都好有心，約埋我一齊殺上去。Kenny佢地都好簡單低調（雖然無我老豆上年簡單到咁誇），因為無乜宗教儀式，所以好多繁文俗節可以免除。

我參與過最誇都係二伯個喪禮：地下200人大禮堂，個二拉再搵隊人黎通頂打齋。大婆一家同二拉一家，表面上客客氣氣，實則明知過後一定老死不相往來............我就係夾住中間，兩邊都費事得失..........

唔係坐左好耐，半個鐘就閃啦。

沒完沒了

一方係我老豆，另一方係加拿大稅局!!!

由去年老頭子病到半死，都交帶落點樣搵會計師幫佢計算2004年度既加拿大薪俸稅開始，呢個遊戲玩到佢死左一年後仍然持續。

今日又收到信話去年10月粱師奶無provide "Foreign Tax Paid" supporting documents，所以重新計過後由本來有tax refund變到要多交2000多加幣(即萬多元港幣)稅。師奶份人一有少少野就唔能夠保持冷靜，只係識怨天尤人。為免佢擔心成晚，我磨到9點幾打電話去Revenue Canada問左幾句，話聽日fax D文件叫佢再re-evaluate the case就收工。

都唔知仲要攪幾耐至可以close老豆個file。都係香港稅局可愛d。

粱師奶心情唔好既另一個原因係佢患左重感冒。呢排身邊好多人都中招：Annie, Hudson, Michael.......人病都事少，千祈咪惹比烏烏呀!!!!

樂富同林氏一家團年

好耐都無去樂富食飯。

初初返香港時佢地一家非常照顧我。知我一枝公喺香港，過年過節都會叫埋我食飯。佢地潮州人講野好大聲，一家人傾偈好似嗌交咁；豪爽得黎好過引架。林家既女人每個人都有我1.5倍咁大份；所以我置身其中完全唔覺自己肥
(′‧ω‧‵)
契女巢樂然，一個140磅的11歲（後面喪笑既係佢阿媽波羅包）

隔離剛焗好一ｄ叫發糕既物體，我初時仲以為係Muffin添。原來係拜神用黎放神臺。我試左一個，好似街外餅店既蒸蛋糕咁，幾得意架。

仲有幾多餐西苑？!

呢幾個月好似同太古城西苑結下不解緣..........

12月1號：大宴裕利5圍
今日：升職被屈第一擊，豪請Finance+IT+HR+CHC兩圍
聽日：CHC自己團年
2月1號：Wyeth全公司開年
2月8號：CHC自己+promoters開年

難怪下午要西苑個部長親自拎３底年糕過黎公司比我地啦。

諗起中菜都有ｄ驚！！

賀年裝飾

真係唔多覺仲有幾日就過年。可能個心仲留左響東京。

經過商場見到ｄ賀年佈置先至再感受到Holiday mood。
Lee Garden

IFC

不過我呢ｄ年就唔多駛拜既人黎講，黎緊既長週末都係煲視頻多喇。

小麥發起的廖太聚會

好耐都無見既小麥，約我地幾個廖太新年前聚聚。過年前中菜都好難訂，所以去禮頓道靚靚UCC Cafe。

呢間野裝修就靚喇，但ｄ野食好麻麻。 Portion大但非常滯。我諗食waffle還可以，但飯就真係唔多掂。好似奶奶唔信邪叫蛋包飯，日本我地個個食都照鏡，呢都再努力都係只食到半碟，就知有幾難食。

有些懷念迎囍添.........

Canadian Consulate @ Exchange Square

放半晝假去中環交易廣場的加拿大註港辦事處遞form renew本passport。

哇，個Waiting Area細到丫，得十來張凳；完全唔似大國既風範。香港加籍既人又多喎，結果咪好似細個玩爭凳仔咁囉！！

足足等左一粒鐘，好彩我都有備而去，自攜本小說。

Renewal一本5年既要成$650（仲要係薄既24頁），真係好過去搶。如果唔係有Daisy老公幫我簽做guarantor，我仲要多比$360等佢幫我搵人宣誓。

真係唔明加拿大要ｄ國民交咁重稅，但ｄ制度既宗旨就好似"Try to make our lives more difficult"。

11am至攪掂行出黎。約左Alvin去灣仔Renaissance Hotel既十八溪飲茶。食左今個冬天首個臘味煲仔飯。哈，肥死至算。

從Michael度偷番黎既.........

雖然我們無法改變人生，
但我們可以改變人生觀；

雖然我們無法改變環境，
但我們可以改變心境。

每月一次

唔係姨媽，而係上海!!!

新職位functionally要report比Damon個三舅父 (admin仍舊report比阿Paul)。以後每個月都要schedule一次去上海office update吓香港既marketing programs。Martha有時少不免都要同行添。

第一件事，係聽朝去遞form renew Canadian passport。兩星期後新passport一到手又要申請multi-entry既China visa..........

睇怕我以後大把機會食仁和ｄ豆漿茨飯。

活在當下

剛睇到一篇幾好既文章：

「我曾經渴望得到一雙新鞋子，直至我看見別人沒有腳。」

大家有沒有為一些事情而不開心？不開心的原因可能是得不到一些東西或者失去了一些東西，但是大家有沒有曾經想過，自己擁有甚麼呢？我們有時候太過介懷當前的得失，而忽略了自己所擁有的東西。

如果每一個人都擁有相同的東西, 那麼人就會認為自己擁有的是理所當然。可惜的是，總是要有不幸的人存在人才會知道自己擁有的是那麼多。那些不幸既人，生命雖然短暫，但他們從短短生命中得到的，比很多人數十年人生得到的還要多，他們可以比很多正常人快樂，因為他們懂得知足。能夠生存於這個世上已經是一種恩賜，只要我們滿足，就會快樂。那杯水是半空還是半滿，是在乎你怎麼看。很多人不開心，因為他們只會看到那杯水是半空的，但是有些人，就連那半杯水都沒有。你需要的可能是一對新鞋子，但人家需要的，是一雙腳。

看到其他人，知道自己比很多人幸運，所以才更加要學懂珍惜。當下擁有的不是永恆，任何時候都會消失，不要等到失去的時候才察覺自己曾經擁有些甚麼，因為那時候已經太遲。

「為今天而活，不要為明天而哀傷，轉眼便是明天。人生很短暫，因為明天而耽誤了一天，便永遠失去一天。」

廖太cross-over藥劑同學的tea

發覺我d朋友network真係越來越融洽。同學Annie自從日本之旅，認識左奶奶&阿丁。廖太Annie同Connie又因為阿Rain，而變成有定期明星相交易既新相識。

今日下午銅鑼灣澳門茶餐廳的tea就係一個cross-over聚會：

廖太代表有Carmen & Annie
藥劑同學代表有Connie & Annie

而我呢個兩棲類，當然係促成呢次聚會既始作俑者。

哇哈哈，再咁落去，可能連同事都會有cross-over。Daisy就係一個大代表。

東京落大雪

上星期d風吹埋面已經好凍，奶奶話d冷空氣由關西落黎。真係我地一返黎，東京就落大雪!!

好彩早d返；雖然阿丁未見過雪，但咁既情形下見都唔係好事。因為隨時滯留機場架。

阿丁，勤d打苦頭，我地下年去北海道啦。

定休日

旅行返黎真係叫做清晒d野，可以悠閒d痞喺屋企做條懶蟲。

天氣又濕又凍，朝早去Starbucks既時候見到窗外咁既天都唔想郁啦。

多得Damon哥過左側田，Janice，何韻詩同李克勤比我；等我可以update吓部iPod mini。

全屋最有用既家電，煤氣乾衣寶唔多妥；約左朝早上黎檢查。原來只係隔塵網因柔順濟揮發有ｄ塞。不過值得一讚既係煤氣公司ｄ人既態度真係好得。約佢地永遠準時，ｄ師傅又好人。唔通，我應該多買幾手中華煤氣？

正想食晏時Carmen call到，兩條女又去左我既飯堂，城市花園順壽司。岩岩返黎當然唔會食魚生啦，因為真係會比下去架。

襯有閒，清左兩集惡作劇之吻。今晚開剛download既新一輪日劇：小早川伸木之戀，同豊哥&崔智友套輪舞曲。

香港UniQlo勁減....頂!!!

食完經過美麗華，早兩日見到報紙賣UniQlo大減價，咪hea上去巡吓囉。ｄ基本款既冷衫超平，cashmere都係$299，平過日本買添。早知唔駛幫YY買啦，佢自己黎揀仲唔會買錯款同呎碼。我都忍唔住多買兩件。Debbie話我件件都灰同黑，真係著乜野新衫都睇唔出。

好彩銀座限定版的UniQlo tops香港唔會有，唔係一定更嘔。

有時間呢幾日經過尖咀記住去望一望啦。

尖咀譚魚頭

Michael月頭生日，因為灣仔間譚魚頭太窄，所以Martha提議去尖沙咀間打邊爐。咁呢度又真係坐得舒服好多既。

佢呢度唔用豉油，反而用d芫茜同其他豆類，加半殼火鍋湯底撈渾黎點。味道會有d唔同。Michael叫埋好多腸同內臟，最恐怖係成碟雞子，成1/3隻手掌咁大。真係唔明雞邊有咁大個睪丸？人都未必有咁大啦。
Michael & Damon食麻辣鍋，攪都面紅耳赤

雖然新鮮，但唔平。都係謙記抵食d。

換Passport

一去完日本，立刻要著手換死人加拿大護照；因為10月到期，4月過後就邊度都唔駛去。

趁lunch time落樓下快圖美影左張車頭相；其中一張仲要勞煩Daisy個老公幫我簽。點解咁麻煩？咪死人加拿大ｄ衰野囉：

Passport application (even renewal)都要有醫生，牙醫，警察，銀行officer，或律師做guarantor；要識我兩年以上，證明相中人係我.......加拿大本土還好，藥劑師都可以簽（我有大把同學執緊業啦），香港唔承認藥劑師，大佬，唔係個個都同家庭醫生咁熟架麻，加上touch wood我又少病痛......無法，唯有麻煩做阿Sir既Daisy老公喇。

除此之外，仲要兩個non-relative既reference（一樣要識我兩年以上）。哇我renew passport啫，申請信用卡都唔駛查咁多家宅啦。

最低死係本passport最長只得５年（BNO都１０年啦），撇除最後６個月唔用得，咁即係話我要每４年半就重覆呢個咁替死既動作。唔係貪佢好多地方都唔駛簽Visa，我真係啋佢都傻呀。

返黎呢幾日......

忙忙忙！！！

整理同ｐｏ左二百多張相去MSN Space。

寫極都唔完既Blog。

分發手信比梁師奶，同事，朋友。

186個Emails，清左裕利疊Debit Notes。

同梁師奶用贈券睇左四眼雞丁同情義兩心知呢兩套，未至於垃圾，但唔多好睇既戲。

不過.......哈哈......今日已經book左機票同Connie４月尾再去台北啦！！Anybody want to join?