La Vie Avec Amusement: 03/01/2006

終於都有女生

在重返校園計劃助學左幾年，8個小朋友都係男仔。上次renew時我已經反映左想加ｄ女仔；因為大陸重男輕女依然嚴重，貧困地區更甚，女仔好難有書讀。

今日收到話有兩個學生小學畢業，可能真係見我上次特別要求，代替既係兩個廣西瑤族既女生！兩位都係12歲既女仔，只係讀緊小學一年級！（我地香港12歲讀中一啦！）

雖然小學畢業喺香港搵唔到野做，但對呢ｄ小朋友黎講，可能係一個機會，可以擺脫貧窮既農村生活。

人不如狗

點解咁講？因為當我仲係睇緊8年前買既Sony29吋電視既時候，梁師奶下午已經用皮幾野買左部32吋LCD電視比烏烏睇！！

唔係講笑，真係完全為左個皇帝仔。

因為之前我細佬已經話睇過有d書，講狗仔對眼係睇唔到一般電視；只係睇到一橫橫(好似電視裡面見到另一部電視時咁)。但因LCD電視唔係用顯像管，所以狗仔可以睇到。再加上梁師奶教會義工度有人都話佢隻狗都睇LCD，就更加令梁師奶下定決心。下午同細佬喺apm百老匯買左部Toshiba 32"LCD孝敬個細細仔。

睇怕我呢個做家姐既，食飯時可以有LCD電視睇都係靠黐烏烏ｄ金糠咋！！

飛的去食牡丹蝦

阿Paul走左，今日Kenny又去左澳門；lunch我地癲起上黎飛的出銅鑼灣The Sun食晏。本來只有晚市至serve既牡丹蝦，都比我用"我們特地出黎想試"黎persuade個廚房做比我地!!一行5人浩浩蕩蕩，甚至book到private room添。

以前集成返工時每個星期都黎食晏既地方，而家變左太古坊人，反而為左掛住d美味魚生(因為太古城附近無乜好既日本餐廳)，而要特地勞師動眾咁去。

不過去左太古坊後，多左YY，Bernice & Ophelia幾個飯腳。同裕利&廣告公司Maxus都近好多。真係開會都唔駛出外，超方便。而且返梁師奶度食飯都只係20分鐘。所以唔會太懷念集成囉。

PS 夜晚陳奕迅介紹日本御宅族文化時，竟然去埋電車男故事中既Benoist Tea Room食high tea；笑史我!!

整天都想著的人

我今日無論返工，食飯，坐車都只係想住一個男人。呢個令我咁茶飯不思既男人......姓周.....無人真係形容過佢個樣，連個名都唔知，佢就係周公!!!

可能係由上星期開始都訓得比平時仲少，積埋積埋。再加上阿Paul大半日都仲喺公司，office比平時靜，更令人掛住周生。

補眠去。夜ｄ再煲Anego。

Paul少殺到

我老細永遠鍾意玩d估你唔到既野；今日又毫無先兆8:30am都未到就dut左響度。不過我今日好唔夠訓，無乜心情應酬佢，lunch索性掉低佢，同YY，Ophelia & Gladys自己出去食越南野。

下午本來補多杯啡上足電諗住brief佢Q2既activities，但佢差不多整個下午都同上海telecon(咁多野要傾不如上返去開丫嘛；浪費咁多長途電話費!)。結果等到5pm我地幾個managers唔鬼理佢，自己開返本來schedule左既會。

同阿Paul開會，真係要打醒12分精神；佢ｄ數口又精，講野又快(連我都係咁話），稍一唔留神跟唔上，一定比佢窒。

4晚下來既後遺症：有d失落

好似慣左去紅館返工咁，今晚變得無所事事。
想轉呢個blog個background做流星雨既鋼琴版(encore前放相時既音樂)，但始終搵唔到似樣少少既呢首midi。

奶奶借左Charlotte話好睇既日劇Anego比我，煲完4400，都要停一停換口味。

哈，好似講緊我自己!!

女人只要年過30，就有一堆煩惱…輕鬆愉快的單身生活，到底能持續多久？現在交往的男友，會成為未來的老公嗎？等我上了年紀，將過著怎樣的生活？即使是叱吒職場、威風八面的女強人，內心也一樣充滿了焦躁與不安…「anego熟女真命苦」，就是這麼一部真實呈現受到年輕後進信賴、被大家稱為「ANEGO大姊頭」的30歲熟女，在颯颯丰姿之下，卻有著對未來的不安、對戀愛的煩惱，與心底深處不為人知的脆弱…

第四場，將流星變成我地既回憶

尾場，終於都坐第5行；可以唔用望遠鏡見到佢既表情。

今晚有好多驚喜位：

1 阿V跳舞時，言生出埋黎伴舞；型呀!!

2 到言生跳舞時，阿V又代替女dancer，變身殺手玩阿旭

3 孝天表演時，阿仔出黎用結他同佢jam歌

4 阿V之前只唱一首日文或韓文歌；今晚兩首唱晒賣大包
5 阿旭新加左首哥哥既"追"；雖然佢咬字唔係太正，但現場大合唱幫拖
6 阿旭唱"我是真的真的很愛妳"時，拖左柴姐呢位製造F4既恩人上台；最後兩人都眼濕濕互擁

睇住佢地臨尾唱流星雨時特別感觸；以後無乜機會再見佢地台上一齊再唱呢首歌喇。由2001年拍流星花園到今晚最後既演唱會，4個人各自行左唔同既路。我地呢班當時比流星感動，唔同年齡，唔同身份既女人，由鍾意而追星，電腦突飛猛進，由陌生人變朋友......

陪你去看流星雨落在這地球上　
讓你的淚落在我肩膀　
要你相信我的愛只肯為你勇敢　　　　
你會看見幸福的所在.....................

開show前去東雀會醫肚

第三場，漸入佳境

依然係山頂。本來唔諗住睇第三場，所以一早無撲到飛。今次同阿丁，佢個妹&琪琪一齊坐。

Charlotte今次坐好前，所以借左個望遠鏡比我。我同阿丁差不多成晚都拿住部望遠鏡，好似米埔觀雀咁望住佢地4個(當然我既視線會集中在阿旭度啦)。連阿V既8舊腹肌都一清二楚!!

言生自加左請個觀眾上台，拖住手唱歌呢段。個肥妹驚到唔多識行咁滯；之後仲雞咁腳走返落去，好好笑。

聽日就係last show喇，會坐$480(終於)；期待亦同時唔捨得，因為應該唔會再有F4 Concert。

恐怖份子和女人有咩分別? (From YY)

1. 一個可以談條件、一個不可以。
2. 恐怖份子明確地告訴你他們要什麼，女人總是要你猜她們要什麼。
3. 恐怖份子會跟你談判，而你不能跟女人談判。
4. 恐怖份子會殺害人質，但是女人不會這樣做，她們只會綁架人質一輩子。
5. 遇到恐怖份子，你只有死路一條。遇到女人，你會活在十八層地獄。
6. 恐怖份子用別人來談條件，女人用自己來談條件。
7. 跟恐怖份子談判，贖金可能越談越少。跟女人談判，要花的錢可能越談越多。
8. 談判中你可能可以找一堆人和警察來抓恐怖份子，可是通常女人會找一堆人和警察來找你麻煩。
9. 女人把褲襪戴在腳上，恐怖份子把褲襪套在頭上。
10. 男人敢退去女人腳上的褲襪，卻不敢退去恐怖份子頭上的褲襪11. 恐怖份子不一定是女人，但女人一定是恐怖份子。

第二場，今晚好好多!!

唔知係唔係聽到太多我地失望既聲音，定係佢地自己都過唔到自己尋晚既表現，今晚無論配樂同氣氛都好左。咁當然我地情緒都會高漲d啦。

仍然係$250山頂飛。好彩Charlotte帶左望遠鏡，耐唔耐都可以見到言生個表情。

連蔡導兩公婆同廖媽媽都係座上客!!咁佢個仔叫我地一齊陪佢唱光良首童話比佢阿媽聽，我地全場點敢唔扯大喉嚨唱呀？!

Encore後既rundown都有改動；變返流星雨做壓軸。大佬，咁至正路架嘛。

阿丁，聽晚應該唔會太差；不過你有就最好帶埋望遠鏡!!

極地雪犬

想睇呢套片成個禮拜，今日放假同梁師奶去Palace APM睇12:35pm。

一個字：讚!!!

當然同狗有關係最大selling point。人同狗因為一個承諾而堅持差不多半年，真係幾感人架。可惜最後8隻中有2隻救唔到。不過比1950's真人真事，只有2隻獲救已經好好多。

一路睇一路諗住烏烏。

片中極光拍得好靚。套片係加拿大取景，唔知係真既定全部係CG?

第一場，有些失望

尋晚好夜訓(或者應該話好早訓)，好彩今日唔駛返工。朝早去左陪烏烏，因為梁師奶呢期逢星期三要去上家居電器認知，我咪過去陪呢個皇帝仔睇電視囉。

出返黎同Alvin去小南國食左lunch仲可以返屋企補眠。如果唔係一定入場瞌眼訓。

同Charlotte左$250第29行。講真，呢個高度都無乜可能睇清佢地個樣。個台比上次簡陋；而且今晚燈光效果同伴奏都唔係好掂。同上一次氣氛差好遠。尖叫既人唔多，我聽覺仍然健在!!

覺得最失敗係整體太注重"表演"多於唱歌。其實有好多個人新專輯既歌都無唱；例如言生連記憶拼圖同地心引力，仔仔直情第二張碟一首歌都無!!大佬，跳舞打鼓話劇既野，係用黎攝時間，無理由同唱歌時間差唔多。攪到都有幾多冷場架。

最奇怪係encore時唱完流星雨，最後竟然係唱幾首哥哥雞尾歌作結尾!!點會最後既歌唔係自己既咁奇怪架？!

整個rundown可能因為第一晚既關係，有d亂。希望黎緊三晚會好d。

連放兩日假

聽晚F4演唱會開鑼，我承機告兩日假唔駛晚晚開完8個鐘頭工，去紅館返工咁辛苦。大佬，連睇4場，除左3年前做過呢d傻事之外，好耐都無咁癲啦。以前未興派Pong Pong棒，帶晒BB加螢光棒入場。不過相信今次都會係聽覺又一大考驗，因為d人見到佢地4個一定扯大喉嚨尖叫；4晚下來，本來半聾既我，有機會完全失聰!!

佢地有d各自既album，唔係首首歌我都識(孝天隻碟我就無買喇)。不過今次唔睇，都睇怕無下次架啦。希望d服裝今次唔好太奇怪，再著d大紅花花下田裝唱流星雨咁殺風景!

Charlotte，你終於都可以感受香港F4演唱會既氣氛啦。

路人甲

陪梁師奶食完飯後，去左杏花邨做一單樓宇買賣既路人甲。買家係Annie!!

叫埋我去既原因係因為小女子有兩次買樓既經驗；唔打得都talk得。不過auntie實在太鍾意個單位，其實下午已經講好價。我既角色基本上係提點佢地簽臨時買賣合約，要注意既地方。因為利嘉閣個經記實在太dutt！！

個單位其實都叫做有裝修，唔駛點大執。因為要等個業主返屋企，再加上為左屋內傢俬既去留問題而作既最後交攝，結果收工都成1am！！(不過當年我買將軍澳都會豪庭時，都係攪到凌晨）

黎緊呢兩個月Annie有排忙，不過都恭喜佢榮升業主啦。

私房菜français
因為呢兩日load相有d問題，所以請去http://spaces.msn.com/glorialeong/睇相!!

經奶奶推介，約埋Annie，Connie & Jeffrey去銅鑼灣羅素街樓上一間叫The Legend Concept(doesn't sound very french)舖食法國私房菜。

今晚只係我地一枱，等如包場。不過老版娘好好人，home-made bread & mash potato都會主動加比我地：

Snacks & Refreshment

s

* *
Goose Liver with Apple (Foie Gras d'Oie)

or
Pan Fried Abalone

* *
Cream of Pumpkin

* *
Ravioli of Forest Mushroom
or
Shrimp Mousse

* *
Lime Sobert

* *
French Confit of Duck

or
U.S. Prime Rib Eye

* *
Creme Brulee

* *
Coffee or Tea
Cookies

我地由7點傾到10點多，勁滿足。

下次一定要再黎試埋個龍蝦雪糕！！

台北行程4/22-25

睇晒本梁望峰，下個月既行程，隨左食，都仲係食!!各位姊妹，學奶奶話齋，呢個月真係要食吓草先：

4月22日

10：00am 到達中正機場
12：00pm Check - in東龍
1：00pm 忠孝敦化站
- 鼎泰豐：必食 - 小籠包，元盅雞湯
- 過對面度小月：必食 - 台南擔仔麵，肉燥飯
2:00pm東區地下街
- 天仁茗茶：凍烏龍茶
2:30pm市政府站
台北101：新開９層誠品打書釘(順手比ｄ時間個胃消化)
7:00pm劍潭站
士林夜市：必食 - 豪大大雞排，大上海生煎包，青蛙下蛋(即愛玉冰)，十全排骨，大餅包小餅
10:00pm西門町
頂得住既話買阿宗麵線返酒店食

4月23日

8:00am出發去九份
10:00am到達九份；必食：舊道口牛肉麵，阿蘭草仔粿，阿雲麵店的魚丸羹
12:00pm九份石階；可選：悲情城市或阿妹茶酒館茗茶
3:00pm離開九份
5:00pm台北車站
光南大批發：必掃 - 平靚正文具，禮物包裝用品，ＣＤ
7:00pm西門町掃街；必食：阿宗麵線，老天祿鴨舌/鴨翼/滷豆干，街邊擋(葱抓餅加蛋，串燒臭豆腐)，三兄弟(豆腐花豆漿冰，白玉苦瓜汁加蜂蜜)
9:30pm可選去誠品敦南店打書釘，或去錢櫃唱K

4月24日

10am動物園站坐660公車前往深坑(至出名食豆腐，唔係比男人食嗰種）
必食：大樹下豆腐三吃(豆腐羹，紅燒魚豆腐，紅燒豆腐)，六嬸婆食府(翡翠豆腐，包種茶豆腐)，陳家豆腐(白玉豆腐腦)，千層糕
手信：郭金山(合桃酥，芝麻酥，花生酥)
2:30pm離開深坑
3:30pm忠孝新生站轉小黃(台灣的士)去永康街
-冰館；必食：芒果冰，草莓冰
-永康公園
-4:30pm鼎泰豐總店(試一試是否真係好食ｄ?!)
6:00pm忠孝新生站
-光華商場: 狂掃日劇
8:00pm忠孝復興站
-牛角燒肉(日本下北澤我地食過同一間); 必食：牛五花，鹽牛舌

4月25日

10am Check Out放低行李在front desk
11am南京東路站
-一風堂日本料理；必食：炸豬排，日式咖哩(唔係淨係因為元暢，呢度既炸物拍得住世貿中心既とん吉)
12pm微風廣場(就對面左近，無理由唔去埋）
2:30pm 返西門町
-謝謝: 花枝羹，肉燥飯
-三兄弟冰品
-老天祿買手信：鴨舌/鴨翼
5pm出機場返香港

有野想加想減請通知我＾＾

去到新城市咁死遠食翡翠

就係囉，時代廣場同公司附近太古城都有翡翠拉麵；坐隧巴轉火車去到沙田新城市食都係為左就細佬仔。不過梁師奶鍾意啦，我當遊車河囉。

唔知點解，銅鑼灣人都好多，但就無新城市火車站出口咁噪。企多一陣真係會頭痛架。可能真係習慣問題，自己住港島，如無必要都唔願過九龍同新界。

繼續窩住張梳化煲4400去!!答應左借比同事Jeffrey(為左報答佢借LOST第二季比我)，所以呢幾晚都好努力咁煲。真係唔好再借呢d US Drama啦，日劇起碼都係十來集，LOST & 4400好似煲極都唔會完咁；越煲越煩厭。

北海道牡丹蝦

今個月The SUN做牡丹蝦推介。Michael試過後極力推薦。

下午臨時約左奶奶同阿丁，靈機一動，就打電話去預定。$48一隻足８吋長，個身係刺身，之後個頭仲幫我地炸到香脆。好味！！

當然仲有勁肥美既三文魚刺身，廣島蠔釜飯，蟹腳玉子鍋啦。

咪以為咁就食完呀，我地竟然癲到過檔去隔離紅螞蟻食甜品添。

好似為下個月台北之旅預習咁。

告別Charles

Charles月底退休返加拿大定居。今日落黎同HR清埋d手尾。當然我地點都要同佢食番餐farewell佢啦。話晒阿Paul新上場時，我同Kenny對個P&L都好懵；佢真係幫左香港好多。

其實呢三年我地同佢溝通仲多過阿Paul；因為佢睇住盤數，阿Paul真係好鬼忙，唔會擺咁多時間比香港。

都係去返惠氏飯堂西苑。

特登帶埋部私伙Fujifilm Pivi去，即場print左呢張相比佢。

雖然余經理去左日本旅行黎唔到，但夾錢我一定會預佢一份既，哈!!

今晚的贈品 

Hea到11pm，正想返屋企之際，比呢兩個癲婆call去HSBC(佢地去左過戶），原來櫃員機裡面天花竟然掛住張元暢同依晨既惡作劇之吻海報！阿二眼明手快咁撕左落黎。

我本來仲氣沖沖咁行入去：作死咩！咁遠要我行過黎.........（見到張海報唔識出聲）
然候，
我：嘻，可唔可以幫我同張海報影張相？

兩個癲婆

同梁師奶食完晚飯後，去左屋企附近花園餐廳陪Annie & Carmen呢兩個癲婆，精神支持佢地撲F4演唱會飛。話說頭兩場本來Carmen表妹搭上搭識人囉到靚位，於是Annie便搭佢頭兩場每場20張。其實下星期開show，而家都仲未比到飛就夠奇怪。點知真係拖左Carmen兩星期，而家至話無。佢地估應該囉左出去炒就真!!

我去到簡直見到佢兩個好似炒燶股票生意失敗咁既款＠＠

兩個不停咁打電話，同人解釋，道歉，撲飛......

我諗佢地面前食緊咪野都無味。

無$480，唯有$250平飛都照殺啦。反正尾場都有$480，其他場數志在參與啫。見佢地咁down，真係唔好意思；明知佢地都唔想，都係義務但又攪到壓力咁大。

其實同３年前上次演唱會相比，好多人既熱情都淡左ｄ；雖然點都支持吓，但唔會太過緊張。所以你地都take it easy啦。

最緊要下星期大家一齊開開心心去睇４仔。

辦公室18真言

早兩日收到呢篇野，有幾句真係幾抵死：

雖然我地division細，無咁多人事，但絕對可以想像隔壁屋就係咁既寫真。

有效管理壓力四部曲

第一部曲：思想重整(Rethink)

-看清楚自己有沒有思想謬誤
-扭轉過份非黑即白的思想(Thinking in Shades of Gray)
-把注意力習中在如何解決問題上，而非把焦點放在怪責自己或他人身上，因為這樣會令自己感覺更差

第二部曲：減低壓力(Reduce)

-分清楚事情的緩急輕重(Prioritization)
-適當地委派工作予下屬(Delegation)
-不要拖延
-放棄過份完美主義

第三部曲：鬆弛練習(Relax)

-腹部呼吸法(Abdominal Breathing)
右手放腹上，用鼻子慢慢地深呼吸，心裡數1，2，3；感覺右手徐徐向上升。
稍為忍住呼吸，然後慢慢呼氣。
心裡默默數1，2，3，然後再重覆呼吸練習。

第四部曲：釋放壓力(Release)

-做運動，要持之以恆
-開懷大笑
-哭

Stress Management Workshop

惠氏今朝請左中大醫學院既臨床心理學家同d員工講解何謂壓力，認識自己既壓力指數，同點去舒緩壓力。條女唔只幾靚女，仲講得幾好架。無乜悶場，同埋quote D examples都好攪笑。

呢個已經係第二個session；上星期有同一個workshop比出街d sales，今日係back office staffs。

點解會有d咁既野？可能同西藥部有隻叫Effexor既抗抑鬱藥有關。

最抵死係臨尾佢問：大家仲有無ｄ乜野問題呀？
我（自以為低聲地自言自語）：咁你幾歲？結左婚未？
條女（一呆）：我今年３３......

同Annie撐枱腳

無飯開，因為梁師奶今晚教會要去將軍澳醫院做義工，所以call Annie出黎陪我開餐。

放工真係凍左好多，又落雨。本來今晚F4去晒九展綵排，我都叫Annie咪走去食風。凍親病鬼埋下星期都唔知點去concert尖叫４晚。

兩條女去左我樓下電氣道味皇食炸魚皮，勁熱氣但好味。Annie正在為下星期ｄ演唱會飛頻撲，真係要講聲唔該晒。比我要撲咁多飛，又要煩交收，我都頂唔住啦。

真係要透足精神，下星期去紅館見４仔！！

黃梅天，極討厭!!

每年三四月，係我最討厭既天氣。天色總是陰陰沉沉，空氣帶著很高的濕度，有一種難以形容的敝扭。頭髮不受控制，整個人都好似會發霉!!

忍無可忍，推番部暖爐入去；換抽濕機出場。

再落樓下百佳買左大包小包的抽濕劑，同d衣櫃換晒佢。如果唔係，d羊皮(其實香港根本無需要著)一發霉，筆乾洗費仲甘呀。

懷念東京既乾燥........

小南國Encore

今個星期的第二次去Times Square小南國。

約左班U of Toronto Pharmacy同學。Annie個大頭蝦完全唔記得左，好彩住得近，都趕到參與下半場。

Gigi帶左Carin & Carton出黎。佢地兩個自得其樂，好在唔會太忸。

雖然Gigi喺我樓下萬寧返工，但平時放得夜，週末又要揍仔，所以都好少約到出黎食飯。

Cedric更加忙；轉左行做律師，成日要出trip，一年都唔知見唔見到2-3次。

最常見當然係仍然單身既Connie & Annie啦。

其實如果計埋其他我識既U of T Pharmacy graduates，都好多人回流返香港。但真正practise緊pharmacy既少之又少。唔係去晒藥廠，就係補多個law degree做律師。

不過你比我再揀過，我都係鍾意而家份工。接觸既野多ｄ，而且有挑戰性。

選你所愛，愛你所選。

今個weekend w/金三順

本來煲緊4400，但奶奶借左套金三順DVD比梁師奶(佢好鬼鍾意睇)，我決定呢兩日攔途截劫，先煲為快。

其實台灣GTV早前已經播過，連元暢都有讚。

係有一d Bridget Jones既影子。一個肥但又樂天既女人，點樣溝個白馬王子既故事。有ｄ好笑位，同時唔係好忍受到點解ｄ韓國女人可以咁暴力！好彩節奏尚算明快。

今晚有３包薯片伴我煲金三順。真係驚睇完後會變佢個身型！

東京手繪旅記

喺開益發現呢本大野清美既書。簡直有ｄ驚喜。封面有ｄ閃兼有ｄ和紙feel。內文手繪插圖好多，而且題材係熟悉既東京。

作者－大野清美以清新的插畫風格搭配輕鬆的生活遊記書寫，向讀者介紹東京值得一逛的散步路線，同時也呈現了她身為插畫家的獨特生活品味。讓渴望能在東京生活的讀者，透過本書感受東京生活的自在與悠閒。隨著她的腳步，我們看到的不只是一般旅遊書中的東京，而是充滿生活味的多變東京。透過大野清美的畫筆與步伐，以及匯集兩年心情的手繪旅記。除了有作者精心推薦給讀者的私房散步路線、日本特有文化的介紹之外，更流露出她對於家人的真摯情感，與那顆喜愛台灣的心。相信看完本書，妳將會發現，東京在時尚之外…原來也可以如此悠閒自在！

★ 大野清美的東京手繪旅記官方網站
http://www.suncolor.com.tw/event/tokyo/index.htm

咁要快ｄ做台北旅遊既功課，早ｄ開呢本淨係睇都會愛不惜手既書。

同奶奶拍拖睇側田

放工約左廖太們去紅螞蟻。

聽講Carmen有10張側田$400靚位要散。奶奶挨義氣哽左一張。我雖然手頭有$100飛(本來諗住純粹聽歌，又唔係F4要睇樣；$100最抵睇)，但無理由唔陪奶奶。唯有放左張$100，做個孝順新抱啦。

Damon哥，我有好大機會同你坐添呀!!!!

今晚試左個薑汁梳扶里；幾得喎。份量兩個人會剛剛好。

公司=差館？!

唔知係唔係近得余經理多，有時pick up埋佢d"契弟"，"坎家Ling"呢d未算係粗口，但好俗既形容詞。(通常用黎形容......哈.....生意伙伴囉)

其實我一向都唔係斯文架啦，不過d同事話我好似呢年越來越粗魯。

早兩日我只係不經意咁同Debbie講：Chubb條友又話今朝上黎，鬼影都無，頂你個肺!!

在場既Kenny, Debbie & Martha都不禁失笑。

Kenny: Gloria，我都唔知係唔係累左你；你係堂堂Commercial Manager，唔係差婆呀。唔好連呢d都一日一日進步至得架!!

Martha: 我初初入黎時你無咁粗架!

Debbie: 我真係要飲番d湯，補補個肺先得啦。

咁其實，我又唔係問候人地d親戚，邊有差婆feel呀？!

唔通我應該貼張關二哥poster 喺門口？

惠氏生日會

公司每個quarter都會開生日會。通常都係點心+抽獎(唔好咁大期望，只係抽公司d gimmicks)。

今次係第一次再Lincoln新office攪。

承機po兩張reception的相上黎啦。用左價值兩層市區樓既裝修費，值唔值就真係見仁見智。

《4400》

廣告公司Carlos上星期燒左套《4400》DVD 比我。

睇左第一集，感覺上比LOST好睇。

4400個被未來世界人類綁架的人回歸地球，他們要融入社會。這批回歸者各具特異功能，逐漸成為話題，甚至成為社會恐慌。

有個細路女已經失蹤左幾十年，一晃眼間身邊親友大部份都死晒。

真係山中方一日，世上已千年。

去殮房提貨都唔睇清楚？!

真係世事無奇不有，除左早兩年星展銀行保險箱事件後，今日呢單都算經典：

殮房誤領遺體

衛生署表示，今早有死者家屬前往沙田富山殮房，認領90歲父親的遺體時，發現其遺體不是他的父親。他們經過初步調查後，懷疑其遺體已被另一家人領取，並已火化，現仍留在殮房的遺體則為另外一名57歲男子。

衛生署指出，每一具遺體均有手帶及號碼，確認身分，而親屬亦要親眼確認，並簽字作實，暫未知那裏出錯。
被誤領遺體的家人今早到富山殮認領遺體時，發現遺體不是他們的親人，一度報警求助，衛生署亦於晚上回應，確認誤領遺體。

我上年都有親身去瑪麗提貨啦，點都要望清楚確認自己親人架嘛。除非係跳樓或浸左好耐，否則真係無可能唔認得個親人咁攪野喎。

遇到呢d香港開埠都好似未發生過既事，都唔知好嬲定好笑。

如果我地每個人都植入barcode，會唔會好d？(靈感來自烏烏後頸既狗牌)

好難約的哥仔@小南國

約Hudson食飯真係要有無比耐性，因為佢隨時都比人捉去開會；除左等，都仲係等。

本來講好6:30pm好閃，要出銅鑼灣陪佢買PSP。結果，等.....等.....呆等，成7:45pm至走得。好在唔駛一定去Sony Shop買(收8pm)。結果出左Times Square買左個value pack。

去到小南國坐低食飯都成9pm。好彩ｄ野都唔係太大碟，兩丁友都食到好幾樣。

走都成11pm；阿哥仔今晚一定玩住部新玩具唔願訓；聽日遲到唔好賴我！！

Annie的手信

約左Annie & Connie出去紅螞蟻tea。

Annie剛跟公司incentive trip再去東京，今次去埋輕井澤添。我當然唔會放過叫佢幫我買Starbucks tumbler啦。係長野縣NAGANO版本，我而家至知輕井澤座落長野縣。

另外仲有信州地區限定既百力枝同Pocky!!!! 有蘋果同巨峰提子(不過輕井澤同信州又有乜關係呢？)要佢帶兩大盒野返黎真係唔好意思，不過勁鍾意!!

去到梁師奶屋企已經忍唔住開左黎食啦。

Tumbler & 百力枝，我最鍾意既兩樣東東，唔該晒!!!

7-11 史諾比25周年Snoopy 遊香港磁石夾

7仔真係玩極都唔厭；繼Hello Kitty，大頭狗之後，今次係Snoopy!! 其實係一個背面有小型晾衫硤既badge，點都唔夠第一浪既Hello Kitty磁石貼咁精美實用。

都幾佩服7仔marketing，隔離Circle K都跟住玩過麥兜同Miffy，但點都唔及7仔既聲勢。

雖然我自己唔儲，但又好鍾意折開睇吓抽到邊隻，有少少折禮物既感覺。

通常都係end up送晒比公司班女。

睇怕Annie同奶奶又要開始儲了，努力。