Encore 6人餐
今晚可能太多人出街食飯兼睇波，周圍都好難book位。結果同3位廖太去左迎囍樓上既稻香。估唔到，又係叫同樓下同一個6人餐!! 呢個星期第二次食呢個餐，今次仲堅，係4條女挑戰6人餐!! 不過呢個都未係嚇人，更嚇人既係：我後日同親戚都係去迎囍，應該都仲係呢個餐。好似食藥咁，一星期3次，每次同一劑!

一坐低就收到奶奶買比我，至愛既統一美研社玫瑰茶!!原來City Super做緊台灣節，只係運左少量過黎賣。今年內都應該唔會過台灣架啦，真係要留番慢慢飲。多謝奶奶!!

D餸出得好鬼快，都未飲完個湯，就連甜品既脆麻花都上埋！唔係我喝住條女，佢都未必會收番入去廚房先。廖太既食量一向都唔弱，越兩級挑戰，只係淨返半隻燒鵝同半碟荷葉飯。


食埋下星期二既私房菜，都係要節制一吓。唔係變第二個胡杏兒就大大煲喇。

惆悵

對住張越做越大既excel worksheet (2007 vs 2006 vs 2005 comparison)，呢兩個字係最佳形容我今日既感覺。

Plug左幾日，又來來回回咁同余經理商討，d數字都塵埃落定。但唔知可以用乜野精簡既方法present去上海。如果你話下年升就梗係易啦，但下年條數估係跌，仲要係core brands，今次真係有排解話囉。

每年最難挨就係剛開始做budget時：睇清楚今年條數，同定下年d野升定跌。自己一定要好清楚d assumptions，因為阿Paul唔係長駐香港，無可能expect佢會清楚details。佢只會問big picture既野，但如果你前言不對後語，真係會比佢"小"架(言語上)。

PLUTO - 今次好大鑊

放工去租漫畫店見到呢本叫《Pluto》的漫畫，封面打出作者是"浦沢直樹 X 手塚治蟲"。我一見到浦沢直樹個名，就好似比魔笛聲吸引咁，身不由己地伸手去納。

佢既Monster，係我至愛既一套漫畫。劇情懸疑曲折，每個配角都有血有肉。有一段真係令我睇到驚架，睇咁耐漫畫都未試過。雖然之後本《二十世紀少年》太多既時空交錯，有d follow唔到，但唔影響我對佢既欣賞。

呢本新作，其實是浦沢起用了手塚治蟲家傳戶曉《小飛俠》裏的一個配角機械人刑警基斯克所展開的一個故事。故事背景是未來的世界，機械人的人工智能己非常進步，甚至到了有像人類的感情的地步。故事由幾宗機械人被殺的懸案開始，主角展開深入調查。未來是人類跟機器人並存的世界。機器人一樣有工作，身分，地位。

本來香港版只出左第一冊都唔係咁大鑊，不過竟然網上有清釋版既連栽： http://www.8comic.com/PLUTO/

我怕今後數日，我都會同部腦玩人機合一，一看就欲罷不能。

仲有，比我買埋新鮮熱辣剛出版既「死亡筆記#11」；好期待下個月上畫既真人電影版(死神流克把聲竟然搵中村獅童做呢！)。

今晚都唔知睇邊本先好！！

至豪午餐第二擊

呢張相係獻比擔心我上次比舊花膠扒"醬住個胃"既Carmen.....

蝦子炆美國遼參














地點，仍然係公司樓下既「中國湯」；價錢，$72之嘛。

你幾時黎搵我食晏，咪陪你去「豪一豪佢」囉！

哇嚡！

尋日阿路本來執左袋好野比我，但唔記得帶出黎。今日下午襯做數做到茫無頭緒之際，我呢個「高級阿嬸」咪當出去行吓，上佢Cornwall既公司pick up囉。









返到去一拆開，「哇嚡！」呢句野(包含左驚嘆既語氣)簡直係衝口而出。皆因我之前只知佢做過Estee Lauder，估唔到Dior都有做；仲要係一set好華麗既Dior化妝掃！！黑襯銀，華麗得黎唔俗喎。簡直忍唔住將佢地排好，當影product shot咁po上黎。

不過對我黎講，就好似送set高級Callaway Golf Set，比個driving range打極都係50M(我打Golf都真係咁屎)既初哥咁。早幾年都仲有化吓妝，而家極其量都係塗少少唇彩既我........阿路姐，多謝晒啦，咁下次約你出黎之前，咪要化個行妝比你嘆？ (我驚個效果出黎似cosplay喎)

Upjohn飯局

雖然有Carmen, 不過唔係一定係廖太聚會既。一年數次既Upjohn舊同事飯局都會有佢份。11年前既同事......諗起都有d嚇人。我剛返黎香港入Upjohn時，Marinda生阿大公子放產假；而家大公子都升F.2咯.......

不過就係因為咁，更值得珍惜咁耐之前既同事。話晒Upjohn都被Pfizer吞左好幾年啦，而家出去同d新入行既sales rep講Upjohn，又會有幾多人識呀？

話題天南地北，除左工作，仔女經，食經之外，當然有我同Carmen在場都唔會少既有味笑話啦。好彩今晚客滿，環境比較噪，講大聲d都唔會嚇親人。

地點，迎囍囉。

6人套餐轉左menu，結果又係5條女越級挑戰6人餐。結果？佢地既食後comment又係：味道幾掂又抵食喎。睇怕都係繼續有排黎。

熱帶女郎 - 阿路

約左成兩個禮拜，今日至就岩同阿路去Pizza Express食個晏catch up吓。

哇，雖然係熱啫，一見佢坐低我係女都忍唔住昅多兩野。露肩花裙仔加個新電既中爆炸頭，如果我唔係身處高樓大廈既太古坊，仲以為去左夏威夷度假添。

而家同佢食飯都唔會再講追星架啦，8成時間都係圍繞住佢份工。又因為佢地做sourcing既，同我呢個成世人只知道西藥既井底蛙，性質好唔同；聽ｄ唔同field既野，有時都擴闊自己既圈子啦。

追星呢幾年既得著唔係見過言生幾多次，而係識多好多唔同層面既朋友就真。

食完出黎時Carlos個死仔對眼先哨到阿路，先至見到隔離既我。仲叫我得閒學吓咁著返工，比ｄ驚喜班鄉親父老。我驚真係有咁既一日，班友以為我失心瘋，的我去驗添呀。

Camping Classics Reborn - 林一峰

今年4月出既，全碟都係英文歌。

本人對佢d中文歌唔係咁好，但收音機聽佢翻唱其他人既英文作品，又幾好喎。

大部份抒情為主。唔好見佢電視上瘦弱既形象，把聲唱英文歌幾relaxing。


1 (Prologue) You Can't Hurry Love
2 Dancing Queen
3 I Don't Want to Say Goodbye
4 The Boy From Ipanenia (Original Version: Astrud Gilberto)
5 When He Sings (New Song by Chet Lam)
6 Crazy For You (Original Version: Madonna)
7 Let's Go Camping (New Song by Chet Lam)
8 A Waltz for a Night
9 Rent (Original Version: The Pet Shop Boys)
10 You've Got to Learn (Original Version by Nina Simone)
11 Cool (Original Version: Gwen Stefani)
12 Eternal Flame (Original Version: the Bangles)
13 (Epilogue) Happy Ending (New Song by Chet Lam)

又要參與買樓

今次係梁師奶!!

話說細佬同條新女搬左出沙田住左一年左右，剛由Sony轉馬會做左3個月都無，咁又話買樓。

我個人覺得佢份人都未知呢份工做得長唔長，一陣嫌辛苦又話想quit；再唔係撩起條筋又話想返加拿大。加上呢條女雖然住埋，但都唔知係唔係穩定。上次個Maple拍左7年拖，買左新都城而家梁師奶住嗰度，結果都係一腳踏兩船，散埋拖兼搬埋走啦。以前Maple個阿媽住將軍澳就買呢度，家陣Sharon屋企住沙田又話買沙田......我真係驚梁大少換多幾次畫，要18區置業呀。

梁師奶成日話想ｄ仔女安居樂業，所以成日想幫細佬買樓。但如果佢份人唔定性，買樓係唔係害左佢呢？結果又係要幫佢收拾爛攤子。

睇黎未來我會繼續被逼參與呢個買樓行動。

南記

成年多無去過，忽然好想食魚肉春卷同腩仔肉米線。

撩起條筋出銅鑼灣波斯富街隊左碗小辣既，再加多6條春卷外賣比梁師奶今晚試試。

其實南記香港仔同灣仔都有分店，但以前Gigi個妹阿菁帶我黎呢度極力推介魚肉春卷同勁入味腩仔肉，我印象中就只register左呢兩樣野同呢間分店。

就好似每次去上海，想去永和食茨飯同豆漿，都淨係識去南京路步行街嗰間一樣。呢樣野都幾似余經理咁死硬派。

伊東美咲的Blog

剛發現Miss Hermes都有寫blog既習慣。而且仲差不多隔日寫添。

有好多佢私底下既生活照，而且，同我一樣，鍾意將所食既po上去。估唔到呢個靚得黎高貴既Miss Hermes，同我呢個麻甩女都有唯一既共通點!






Misaki's Blog: http://www.ken-on.co.jp/misakiBlog/

人見人愛，車見車載

下午早d去梁師奶度陪呢個皇帝仔。佢趴喺電腦枱旁邊既床上面，好霎熟咁伸晒俐裝可愛。

表情多多，一時打喊露，一時有成條白毛巾咁笪左喺度。
耐唔耐仲整多個若有所思既表情比你嘆添。

薑包

朝早做massage時佢地送左薑包比我試。係幾個頗熱既小布袋，裡面有薑渣同汁。放喺關節位，同埋用佢黎捽ｄ筋既位置，會驅風同去水腫喎。中國人食薑驅風化寒氣就聽過啫；transdermal會吸收到幾多呀？如果你話用蒜茸黎推會防皮膚病都仲有ｄ根據呀；話晒蒜頭有殺菌作用。

而且massage本身都已經有推油，加埋ｄ薑汁，事後再走入去焗sauna, 感覺好似隻醃好既春雞放入焗爐去燒一樣！！

Encore天樂

Charlotte返Grand Hyatt呢排簡直天昏地暗，難得就得到出黎見吓人。約埋班廖太出黎；Annie原本提議去花園，但我就覺得天樂會好食ｄ喇。無再叫乾炒牛河，反而今次叫左條勁巨既原條龍俐。

Annie岩岩由台灣追完Vanness & Kangta返黎，基本上個心仲留左喺台灣。好雀躍咁用佢唔會太精簡既方式描述呢4日3夜既追Ｖ之旅。

另一個Annie由忙到一頭煙既公司趕黎。送左兩個Starbucks tumbler： Atlanta & Singapore versions做手信。哈，我既tumbler collection而家已經舖滿張飯枱！謝！！

之後同幾位廖太hea上Sogo 10/F旭屋書店巡左一陣。不過除非真係好鍾意，嗰度日本書同雜誌都用11算(vs. Yen)，非常貴呀！

幾豪既Lunch

公司樓下新開間「中國湯」堂食。同事們都有幫襯佢地既速遞湯水成幾年，新屎坑點都會試吓啦。

一坐低，就有一個貌似後生版王敏德既竹昇話有ｄOff The Menu既好野介紹比我地：竟然係一塊有Martha塊面咁大既鮑汁扣花膠扒。連老火湯加白飯都係$98。用刀叉黎切花膠做午餐又幾新鮮喎。結果我，Martha & Debbie３條女都叫左呢個「哥仔推介」。因為呢個係佢地試菜既menu，所以做左幾份咁大把。我地都已經同佢掃晒嚕。Martha仲話食到臨尾覺得個口好膠添；有無咁誇呀？

不過YY & Gladys叫既羊膝都好似幾掂喎。

最好笑就係出去碌卡埋單時個竹昇哥仔至拎部卡機出黎插電，唔通我係第一個碌卡既？見佢同我講中文咁辛苦，真係想叫佢不如轉台啦；反正大家都係英文人。

應唔應該嬲呢？

好怕同熟朋友共事，因為有conflict既時候好難畫定應唔應該太堅持己見。

會問自己，如果唔係朋友，咁既態度我係唔係一定企硬？定係因為係朋友，應該多ｄ體諒？

又或者，如果佢唔係abuse我地係朋友，對其他客既態度又係唔係咁差呢？

可以既話，真係唔好同自己太多工作上有瓜葛既人做朋友。

仲係好鬼慶。

一年一度，數字遊戲又開始喇

收到2007 Budget instruction其實都個多禮拜，一直都想當自己時運高，扮睇佢唔到。但越逃避，結果盞做死自己。鼓起勇氣開個Budget File黎動工。

黎緊直至9月中，我都會被數字折磨到慾死慾仙。

尤其是余經理個2007 Outlook唔係咁樂觀，有排同阿Paul解話。

大家都可能心裡面想禽流會殺埋身，因為好似當年SARS咁，Centrum賣到我地要配給比貨咁濟。

余經理臨放工時都用一ｄ，絕對唔係關心既語氣問我地：深圳確診條友死左未呀？

繼續被蹂躪

佢地好似一班問題中坑咁，要幾刁鑽，有幾刁鑽。

其中有個黑妹對我地同裕利份contract特別有興趣。衰到bypass finance直接打電話黎問我點解佢地既commission唔包埋promotion discount。奇就奇在，我尋晚至比香港既Financial Controller問同一個問題。個黑妹send Email黎又無cc Finance任何人，擺明係想對吓我地口供夾唔夾。大家都係惠氏人，駛唔駛玩到咁賤呀？！好彩我地一向都係講事實，誰怕誰！

真係難為YY呢兩個星期日日被佢地糟質。聽晚送走佢地真係要放返自己兩日假啦，有乜手尾跟都充番電至算。

大食漬

今晚比梁師奶飛，call左Connie出黎陪我食飯。Annie又臨時甩底，睇怕佢忙裝修已經一頭煙，近排都唔會泡頭架啦。

兩條女去左紅螞蟻。好似患左大食漬咁叫左3-4人份量既野，而又食得晒至得人驚：

牛油果海鮮龍蝦汁幼麵，冬菰腐竹酸菜米粉，生煎籮蔔糕，炒雜菌釀白玉瓜，再加個兩人份既薑汁疏乎里。

我都好佩服自己可以隊到咁多野。

話題成晚圍繞住身邊朋友既婚姻問題。真係我識既朋友中，只有兩對係結婚後無問題；呢個數字都幾discouraging。見到咁多唔開心既例子，邊個仲想結婚？

埋身肉搏

尋日stocktake只係我被蹂躪既序幕，今朝仲要print一大疊supporting親身行過去惠氏Lincoln Office用左個多小時同個auditor解話。因為我地同裕利既瓜葛比較複雜；somehow箇中details班finance既同事又無心裝栽，結果要我出面花一大番唇舌至大到個auditor唔再糾纏落去。雖然好耐無人肯同我講咁耐英文，過足引，但有時講得唔好仲可以快ｄ洗走佢地；太流利只會引發更多問題。

唔好以為咁就收科，臨放工都仲要比我地Financial Controller問裕利Contract既細節。大佬，free goods & promotional discount佢地finance無理由連個做法都一ｄ概念都無掛；比auditors銼先至黎問我呢ｄ基本野。

學我秘書Debbie今日食lunch時話齋，我真係要好好保重身體；有ｄ乜野冬瓜豆腐，好多野都會變成一個迷。

返到屋企check voicemail又再聽到聽日既節目：Media Accrual。真係望佢地audit埋星期四快ｄ走。

廣告公司問題唔會大，不過睇怕我地同裕利點都會有手尾跟喇。又改procedures，好難怪人地封我地惠氏為「頭號麻煩」啦。

Zuellig Stocktake

自上年10月stocktake攪到一鑊粥之後，今次去之前真係有d驚唔知佢地會比d乜野有驚無喜既surprise我。

Lunch後同Hudson哥的落小瀝源既裕利倉。班auditors仲早到左添。

兩個落倉既女auditors都係中國人，一個based in US，另一個上海黎。加埋香港finance帶佢地去既Wylis，一行5人加2個倉既兄弟，浩浩蕩蕩咁做呢個random stocktake。基本上我地事前完全唔知佢地會抽邊個lot黎點。而且我地無停單，所以倉係繼續打單執貨，都會令件事更複雜。

結果，有兩個items實貨比inventory report上既數多左幾枝。我嘗試避重就輕地幫佢地解畫，但哥仔既解釋有d老實不過就越描越黑既感覺。

唔知佢地返去會點寫，見招策招啦。反正聽日仲有d其他既report要拎過去解話。

雖然有d亂，不過今次同陳生夾得比上次好；起碼唔會返到黎喺個blog度媽聲四起先啦。

余經理的惡耗

對搭飛機有恐懼既余經理今朝收到一個比加佢50萬sales target更慘痛既惡耗......就係8月頭有個Category Management Training，地點係....哈哈....美國既芝加哥(14.5小時飛機)!!

本來公司一向比較少Sales staffs既training，同埋可以去聽講城市規劃好靚既芝加哥，公司又出埋Business Class機票比你去，應該期待至係。不過比一諗起要搭飛機就坐立不安既余經理身上，簡直係一個酷刑。

我同Martha成朝都提佢囉美國visa，應該搭國泰但怕佢識唔識轉機時清關，定搭直航既UA但有可能係恐怖襲擊target.....呢d令佢越聽越面如土色既話題度打轉。

雖然將自己既快樂，建築喺他人既恐懼上，係有ｄ唔人道；但佢怕飛機既程度，真係好攪笑。我諗如果有得揀，佢寧願搭船去美國囉。

Quick Update

下午5pm約左Connie去Sogo Club 12/F一間都幾隱敝既餐廳tea一tea。佢頑強既感冒似乎好得七七八八。因為就食飯，所以只係叫左件超甜既Apple Struddel，update一吓近況。

地點夠靜，傾偈就唔錯。雖然我好甜品，但呢件野實在太甜左ｄ。真係唔知香港邊到有正宗英式既Apple Crumble + warm custard.....

《SAPURI》－相差8歲姐弟戀

雖然阿丁都po過，但超超超期待呢套7月上檔富士月9既重頭劇：

日本人氣女演員伊東美咲（28）將與日本人氣6人偶像團體KAT-TUN的成員龜梨和也（20）共演由日本富士電視臺製作的連續劇《SAPURI（暫名）》。該劇將被放在有黃金強檔之稱的週一晚九點（月9）播出，故事將講述28歲的職業女性與23歲的兼職年輕男生之間的戀愛。

伊東美咲飾演的大廣告公司廣告製作人，是一個以事業為生命而面臨30歲危機的事業女性，雖然在工作和服飾流行上都走在先端，但是唯一不足的便是在男性眼中非常重要的“可愛感”。 另一方面，龜梨和也飾演的是在同一家廣告公司兼職的23歲，以不羈性格吸引女性的年輕男生。

故事講述的就是這樣兩個人的相遇，同時還包含了周圍的人與人之間充滿夏天氣氛的各種事件。在過去以姐弟戀為題材的連續劇中，山口智子（41）和木村拓哉（33）的大熱連續劇《悠長假期》便是代表之作。而龜梨這次初次挑戰的姐弟戀題材作品，是否會給年長女性帶來另一種不同的全新衝擊，十分值得期待。

"工作是白飯, 戀愛是補助食品(sapuri)" [是講我嗎？] 我反而覺得似Anego多d。

希望偉大既BT快d有得load，可以與日本同步睇!!

大頭烏

尋晚被我用雙腳夾住，動彈不得所拍既大頭照。個衰樣串到，想唔蝦佢都唔得!!

父親節

對我黎講無乜大意義，只會令我更掛住佢。

港版BJ？

今日生果報頭條係暴肥既胡杏兒！！

胡 杏 兒 近 日 為 了 演 繹 新 劇 《 肥 田 喜 事 》 的 港 版 BJ ， 不 惜 自 殘 增 磅 變 身 肥 美 花 旦 ， 近 月 來 唔 肥 唔 食 ， 食 飽 就 訓 ， 在 短 短 52 日 內 增 肥 35 磅 ， 上 圍 由 A Cup 變 C Cup ， 水 桶 腰 粗 達 35.5 吋 ， 脹 爆 巨 躉 也 暴 增 至 40 吋 ， 以 往 合 身 的 衣 服 全 被 迫 爆 。

無記ｄ編劇真係除左識跟風之外，毫無新意！無疑，爛笪笪既肥妹同個靚仔由歡喜怨家，到溝到返去變左自己隻佬，真係滿足到一眾扒女既夢想。自外國既「BJ單身日記」，到韓劇【我係金三珣】，到而家日本播緊既「愛上恐龍妹」，都係用呢條formula而大賣。

第一個谷肥自己做BJ既Reneè Zwelleger就話係叻女啫，胡杏兒演既港版BJ，就算比佢跑出，極其量咪年尾比佢囉個無記豬肉「我最喜愛女主角獎」咁大把。為左咁而唔顧健康黎暴飲暴食，將來未必減得番之餘，仲要唔知有無後遺症。值唔值呀？！

扮蠢

Carlos成日話只有兩種女人受歡迎：

1. 真係蠢既女人
2. 唔蠢但識得扮蠢黎取悅自己件佬既女人

雖然我唔係屬於絕頂聰明類(瘀爆既案例，我班同事最清楚)，但點都唔會歸納入第一類。

至於第二類，係自己不屑去做。試問要扮演一個有違自己本性既角色，偶一為之就得，點可能長時間做架？我覺得兩個人相處最緊要係自然，如果要咁樣至能sell到自己出去，我寧願過年過節寂寞ｄ，都無謂為左幾日，而要自己一年365日做另外一個人咁唔化算。

獅子座只會為自己而生活。

下星期一「東張西望」有元暢專訪!

剛食緊飯睇無記東張西望下集preview時，原來宋芝齡去台灣採訪Vanness & Kangta之餘，竟然會有個元暢既專訪!!

自上星期有播元暢同林X玲去日本LV Show既花絮後，今次會有長d既訪談。唔通無記為左遲d收費電視播「惡作劇之吻」而開始舖路？


係就將套劇放o係翡翠台播，應該收得過套「王子變青蛙」啦!!

講重點

好怕telemarketing。應該咁講，但凡sales approach我都大部份比我dud過。

今日Daisy駁左個搵"梁小姐"既call比我，算佢唔好彩.....

Sales： 梁小姐？我姓張既，家陣阻唔阻你呀？
我(意識到又係sell野，語氣即時急降)：你代表邊間公司架？
Sales(窒左窒)：我係代表AIA投資...
我(未講完就比我打斷)：有乜幫到你?
Sales：無，其實呀梁小姐都應該有買左保險架啦呵....
我(語氣更冷)：唔該講重點!
(當時Daisy已經喺出面偷笑）
Sales(一呆)：我有一d投資計劃想....
我(再打斷)：無興趣。
Sales：eh....唔知幾時....
我：幾時都無興趣。

Carmen成日都話我呢句："講重點呀，唔該!!"嚇到佢連本來想對我講d乜都唔記得。

其實我唔係唔同人講無聊野，不過就算打電話黎係無聊野都會有主題架嘛；如：

- 今日做到好辛苦，想死!!
- 你快d落去買X週刊啦，有F4呀
- 今晚無飯開，出唔出黎?

起碼都比我知道想打黎講乜先得架。通常如果講到第4-5句我都唔知你打黎做乜，就會開始唔耐煩。大佬呀，我唔介意打黎傾閒偈。不過都可以一開始講明：好悶，得唔得閒陪我嗲兩句？(呢句咪係重點囉!!)

天樂 - 雪山正過牛河

聽奶奶話白沙道天樂餐廳d瑞士汁炒牛河掂過太平館。約左廖太們放工去試。

估唔到份量頗大。叫左個二人餐可以一次試齊瑞士雞翼，炒牛河，梳乎里(兩人份大到好似個枕頭咁，有d嚇人)......再額外追加一客火燄雪山。講真，個火燄雪山仲好食過個牛河。比起上次南亞既認真好多。

Annie雖然在坐，但成晚電話響過不停。睇黎間新屋裝修仍然問題多多。睇佢連食餐安樂茶飯都唔得，真係唔知佢點get through成個裝修過程。結果佢約左個designer 9pm去Park Lane樓下既Haagan Daz傾裝修既細節。費事佢一個人亂，都係跟埋去幫吓口。話晒８年前裝修而家間屋go through過既野，點都仲有ｄ概念。都係一句講晒，裝修佬交貨10個有8個遲，自己要隨時比佢搵到，同埋要勤ｄ落去跟；費事有乜整錯可以立刻叫佢改。太遲發現有時真係口同鼻拗囉。

超低能

真係諗番都有d瘀。

話說早兩星期見到Cici (舊同事對孖妹Cici & Didi中既大孖) MSN messenger個名有d好古怪既字：“・$40”,“・$30”

我本來都無乜點理，以為係ｄ細路既暗號。

點知過幾日竟然見Clara個MSN都出現呢ｄ野：“・$13”, “・$1”！

我諗會唔會係家陣電視一ｄ潮既Code，而我因為唔多睇電視所以咁背。食晏時問左Martha & Debbie都無人知。於是......鼓起勇氣打電話比對孖妹直接問個究竟。

接電話既係細孖Didi，

我(吞吞吐吐)：Didi呀，Gloria姐姐有d野想開口問你成個禮拜架啦.....

Didi(見我咁凝重，有d驚)：乜野呀？

我：你MSN個名嗰ｄ“・$40”,“・$30”係唔係有乜特別意思架？家陣呢ｄ符號潮咩？

Didi(忍住笑)：唔係！Gloria姐姐你如果download左某個新software，就會見到呢ｄ其實係一ｄ顏色公仔黎架。

我(汗，用狂笑遮掩尷尬)：哇哈哈哈........

見報2









星期六收到Albert既SMS叫買明週，話有野睇喎。因為公司星期一會收書，所以今日收到後第一時間揭黎睇吓有乜好野。

揭完本main book都唔覺有乜特別，正奇怪之際，竟然比我喺本supplement度見到幾張熟悉面孔：阿Dave, Carin & Carton！！（註：Carin & Carton係我老友Gigi對仔女；而家都仲叫我做"索姨姨"既老實小朋友）









原來佢地應父親節做左個訪問，影左好多Dave帶佢兩個打Golf Driving Range既得意互動相。不過都係advertorial，因為Albert女友喺呢間Golf Club度做；而呢篇亦係該Golf Club既廣告。

Carton剛帶左個Harry Potter式眼鏡，簡直同個老豆餅印一樣！

今日咩日子呀，咁多朋友見報既？！

見報1

Hudson哥篇CRM稿今日出街，點都一早買份東方日報支持吓啦。

雖然佢一早都講左張相影得肥，哇，但一打開份財經版.....哥仔你下次都係唔好用左邊3/7面視人喇；真係唔多上鏡。反而你老細Andrew仲無乜點走樣。

成篇報導有半版咁大。我都奇怪東方點會咁好死。Carlos哥用佢既"專業"指出呢篇係Microsoft落既Paid Advertorial(即廣告)。唔怪之得啦。玩吓手佢兩個可以收返Microsoft既royalty fee(肖像費)添喎。

呢個始終都係哥仔升職後落手落腳攪既First Baby，雖然係一篇廣告稿，但點都要有ｄrecognition M記至用佢地黎做role model出黎曬既。

Keep up the good work, mate。

Internal Auditors

自家公司由美國飛左5隻鬼黎，再加埋大陸finance既3件大陸佬，今日開始，進行兩年一度既"盛事"：令好多management聞風膽喪既internal audit。

唔係話有d乜野唔見得光至怕佢地，而係班auditors比外面請既Price Waterhouse更唔會同你客氣，更加打爛沙盤問到篤；絕對有本事令你煩到不堪。

一般會有finance dept擋駕；所以我今日都唔敢搔擾YY佢地。Finance都解釋唔明至會問到我。

希望呢兩個星期唔會比佢地蹂躪得太利害啦(不過8件都係女......真係比佢地蹂躪，都唔會爽得去邊!!)

西洋骨董洋果子店

數年前睇過既日劇；瀧澤秀明、椎名桔平、藤木直人三大帥哥再加攪笑既阿部寬。嚐甜品既我，當年睇既時候都被每集出場既糕點(唔係班男角)所吸引。

神田英司（瀧澤秀明飾演）終於如願摘下日本拳壇羽量級冠軍，卻因為眼睛受傷必須退出拳壇，令英司大受打擊、從此銷聲匿跡。財團小開橘圭一郎（椎名桔平飾演）生平最不愛吃的就是甜食，卻突然決定要開一間蛋糕店。

圭一郎請到了天才蛋糕師傅小野裕介（藤木直人飾演），同時買下一間骨董店，於是風味獨樹一格的「西洋骨董」就此開張。

某日英司外出慢跑，發現了這間奇特的蛋糕店。英司品嚐過小野的蛋糕後大為感動，決定成為蛋糕店學徒，從此展開了「西洋骨董洋果子店」的傳奇故事…

原著漫畫原來只有4本。












今日大半day就係刨緊呢套野。原來，藤木直人呢個天才蛋糕師傅既角色係好gay架。可能日劇始終唔可能太露骨，所以tune down左呢個角色。