Relaxing Tea Room

Connie岩岩去完泰國返黎，約左佢去金百利7/F既Relaxing Tea Room tea一tea。咁近，臨時call埋奶奶落黎join我地。




本人對花茶唔係太熱衷，唔識欣賞呢間野好似"想用花海浸死你"式既裝修，不過地點就腳同唔貴就已經塞住我把口啦。

叫左個Waffle wif 玫瑰syrup，當然唔少得至愛既咖啡啦。

奶奶6月底再去Bangkok，同Connie兩個簡直雞啄唔斷咁研究邊度做spa好，邊度食野正。


曼谷因為公司去開過太多次會，同新加坡一樣係自己旅行有得揀都唔會去既地方。雖然Connie話我應該比次機會佢，但.....有假同tripmate都仲係想去日本喪買同喪食。

阿丁，比心機打斧頭啦；我同北海道等你噢。

懷舊鐵版，配梳打牛柳

同奶奶，阿丁& Annie去好耐都無幫襯既金百利花園餐廳食飯。

我一聽到地點，第一件事就係想食呢個鐵班牛柳。明知ｄ牛都係落勁梳打粉，但重點唔係塊牛柳既質數，而係塊細細個就成日見，家陣買少見少既牛型鐵版！

花園餐廳ｄ食物水準你都唔好期望太高。塊牛柳"哪"到好諗，但毫無牛味。服務態度亦都晦氣。難怪假期前夕間餐廳都唔滿啦。

Annie為左要聽得到阿Van新碟既歌詞，去深圳連韓文自學既書都買左幾本；真係服鬼左佢。由最基本發音，到要明白首歌唱乜，人地真係上堂去學韓文都可能要好幾年啦。我都無諗過為KAT-TUN去惡補自己既爛日文。真係好懷疑，呢類書可以教到ｄ乜。

久違既花園餐廳，又可以隔好一大排至會考慮再黎囉。

天南地北，無所不知既"卡廬史"

之前打賭連嬴兩杯咖啡既Carlos(佢都算屎啦，連我呢個外號"逢賭必輸"都會嬴)，加埋Martha & Daisy呢兩個間接受益人，約佢出黎稻穗亭食個晏仔回饋吓佢。

呢個合作左近兩年既廣告公司contact，都係近排至發現佢無論星座/血型性格分析，到邊隻護膚品好用都有研究；莫講話佢既專長classical music！

始終佢地做過唔同既客接觸層面廣好多，唔係好似我地西藥行，來來去去都係呢班友。講既話題跳唔出醫管局，藥房，４大天皇（屈臣/萬寧/百佳/惠康）........我地做consumer products叫做好ｄ啦，有得掂吓廣告；西藥部仲悶，只係不停咁攪medical symposium。

如果我EQ好ｄ，真係會鍾意做廣告呢一行。反正單身寡女，誰怕誰！不過而家比以前更唔忍得，如果我真係轉呢行，一定係會鬧客既account executive。

一公升的眼淚─亞也的日記

台灣Page One買左呢本小說，而家至開黎睇。

一位15歲的國三少女木藤亞也，正要展開人生中最燦爛的高中生涯。嘲諷的是，一場她從未預料過的變化改變了她的一生，使她的生命在短短的十年間加速凋零……一切，始自於一個罕見的絕症──脊髓小腦萎縮症。

肢體癱瘓、吞嚥困難、無法言語，都是亞也未來面臨的病症。她想寫字、想快樂的奔跑、想要談一場甜蜜的戀愛、想要回報父母的恩情。

歌唱、寫字、牽手、奔跑、甚至用嘴咀嚼食物……在一般人眼中是多麼平凡的行為，但在亞也身上全成為遙不可及的幸福。要忘記健康的自己，要忘記吞嚥食物的滋味，不久，亞也癱瘓在床，喪失她一直努力想維持的行走能力。

7年來，亞也努力用筆紀錄生活中對生命的思維與堅持，她並不怨恨父母給予她的身體、她並不怨恨上天為什麼殘忍剝奪她生存的權利，她只是一直為自己的身體而奮鬥，拖著日漸衰弱的身軀，慢慢朝前方那一道狹窄卻存在的生存之門前進，一直到21歲她喪失意識……

因為係真人真事，雖然日劇將個情節拍得更感人，但讀既時候唔係為佢既不幸覺得悲傷，而係一路諗：能夠活著，原來就是一件最快樂的事。

今日行過書局見到有本佢母親寫既手記：生命的障礙─《一公升的眼淚》母親潮香的手記

「生在這個世界的感覺真好，活著的感覺真好。哪怕只有一次，我也希望讓女兒感受到這樣的心情」這樣的想法，相信是每個父母、每個重症患者的親友心聲。眼看最愛的人生命逐漸凋零枯萎，不肯向最後結果妥協的毅力，任何例子都可能出現在你我身邊，可能是孩子、可能是父母、或者是朋友…

亞也勇敢生存的記錄，母親潮香從悲傷、努力、到陪伴亞也走完人生的過程。

平時唔鍾意睇ｄ韓式喊苦喊忽戲，但呢套劇相反地令我由一個不幸身染絕症少女既故事，體會到自己應更珍惜生命裡面我地覺得理所當然既事。簡單如跑步，食飯，講說話....如果無左健康，呢ｄ我地認為好基本既野，會變得遙不可及。

呢個亦都係我喺老豆病重既一段日子深刻體會到。

Hairdo的售後服務

兩個月前電的負離子唔多掂，加上天氣潮濕，把頭髮更加不受控制。

今日本想去修短ｄ同焗油，但髮型司川島裕美聽到我講上次電負離子後一星期內已經鬆及捲，佢話可能係用左隻無咁傷頭髮既mild藥水所致。今次唔收錢再幫我用多次mild藥水補電直前面及頭頂嗰撮。

雖然比預期坐得耐左，11am攪到2:20pm，但起碼唔駛我再忍把死人捲髮４個月至可以再攪啦。（本來負離子係唔應該密過半年一次架）

雖然Hairdo整chemical唔算平，但佢令我覺得舒服；有時真係花錢買service架。

寧願早ｄ去，費事同人逼

Sogo又攪ｄ乜鬼感謝週年慶。每年呢個星期都會ｄ野好似唔駛錢咁人山人海。尤其是超市，比錢條龍簡直長到你寧願豪嗰10%比返佢。

反正11am book左appointment at Hairdo，早少少去好targeted咁掃左ｄ零食。（順帶一提，卡樂B巨型包裝蝦條回歸了）

最開心係喺旭屋書店買左本3月號COOL，係速水もこみち做封面；而且最抵係內附A Bathing Ape既大塊手巾一條。３隻色，可惜抽唔都最鍾意既深籃色。

西貢巧遇Damon

細佬今日生日，同梁師奶約左佢同條女Sharon去西貢食海鮮。









本來想去路口大間d既全記，但隔壁有班佬食煙；你地都知梁師奶幾介意架啦，咪去入d嗰間囉。就係咁，坐正Damon一家隔壁。 佢同佢細佬都幾餅印feel架。（不過都真係好難搵ｄ好似我同我細佬咁，隨街執兩個陌生人都似姐弟過我地）

本來以為差唔多，叫ｄ每位$170既套餐。點知上枱就知揩野。聖子同龍蝦都係超小版。係乾煎大蝦同埋條蒸魚叫做好ｄ。其他既蒜蓉粉絲蒸瑤柱，海膽炒桂花，海膽炒飯等都係好"行貨"。

同場加送，超煩人飛蟲一大堆。可能呢排落雨，ｄ飛蟲好似"神風特工隊"咁不時向住ｄ餸俯衝落去。既然佢地生命咁短暫，點解咁都唔比餐安樂茶飯我食呀？

今晚既得著係：食海鮮都係自己揀比佢加工，唔好再叫ｄ乜鬼套餐喇。

巴士阿叔

最近網上可能好多人都睇過呢段"巴士阿叔"粗口x人阿伯母既片段：http://www.youtube.com/watch?v=YY6JIfLrvJc&search=%E5%B7%B4%E5%A3%AB%E9%98%BF%E5%8F%94

竟然今日連明報都有談論呢段片：

巴士客粗言辱人犯法 旁觀者啞忍助長歪風

巴士「阿叔」怒罵青年的手機偷拍短片，在網上流傳近一個月了，由於片中「主角」相繼在主流媒體現身，令它再次成為城中熱門話題。

這段6分鐘短片吸引眾多市民觀看和談論，其語言暴力元素當然是「賣點」，但更重要的是，許多人都有過被罔顧公德者滋擾的不愉快經歷，公眾容易對短片內容感同身受，不齒罵人「阿叔」所為，卻苦無對策。其實，在公共交通工具上以粗言穢語冒犯他人，是刑事行為，受害人或旁觀者都可以報警求助，啞忍只會助長欺凌歪風。

從網上片段可見，當時巴士車廂內坐滿乘客，但出聲要求「阿叔」降低聲浪的，只有一位見義勇為的青年Elvis。怎料他被對方用粗口大罵，歷時數分鐘，其他乘客一直無動於中，只有一個鄰座乘客偷偷拿出手機拍下片段，準備一旦有暴力事件發生，就當為呈堂證據。事件中，無理大叔的言行固然應受譴責，旁觀者的冷漠，何嘗不叫人感到悲哀﹖

香港人的公德心，近10年無疑有所改善，排隊上車、不隨地吐痰、搭電梯靠右站等文明社會的要求，基本上都能做到﹔但在公眾地方高聲講電話的做法，卻須改善，冷眼旁觀別人受欺凌，亦值得反省。

第二餐，回復麻甩本性

放工約左廖太們去利舞台紅螞蟻。

終於可以暢所欲言，完全唔駛顧及隔離枱感受。其實有時廖太聚會有我同Carmen在場，都幾口不擇言，旁若無人架。

Annie剛confirm6月中台灣追van之旅，興奮中；我諗2個月前佢勢估唔到自己會為阿van越洋追去台灣。又係另一"世事無常"既鐵證。

如果今晚同星期一迎囍都係$82-5一個人，咁講真，迎囍抵d囉。

今晚張單又夠Carmen申請紅螞蟻張VIP card嚕。

好食，但可惜好拘謹

余經理今日放假剝智慧牙；留番我獨力應付Ivan。

下午同Ivan約左專幫惠氏做trademark registration既律師行W&G，去中環置地44/F既Banker's Club食飯。中菜之中真係算好食喎。連平日飲茶絕對唔會叫既男人點心鹹水角都做得好香脆而唔肥膩。因為W&G同佢地熟，所以連西餐廳今日有乜好野都會介紹埋。今日連比利時藍青口同甜品芒果拿破倫都有。

可惜因為同W&G幾條女一d都唔熟，餐飯食得好拘謹。佢地個阿姐係嗰種化行裝set行頭，手帶鑽表做法式修甲既人。對方講野時又要"懶"social咁停晒筷聽，自己make conversation時又要注意用詞；如果好似我平時d咁麻甩feel，口沒遮攔，一定嚇餐人。

世界杯版Be@rBrick









睇雜誌發現KFC家陣同本地design既Be@rBrick攪join promotion； 而家食$25KFC可以加$15換購一隻世界杯版既熊仔。但亦可以唔食淨用$20買。咁我當然選後者啦，寧願比多$5都唔好肥死熱氣死。

咪話，外面係銀面焗漆，幾精緻架。今個星期係第一個禮拜換，我夜晚拿拿臨去將軍澳新都城間KFC買左隻德國(即正中嗰隻)。個人最鍾意last week既英國版，呢個係我志在必得啦。

惠氏魔豆

家陣marketing諗gimmick真係越玩越刁鑽。奶粉部竟然連d妹妹仔玩意魔豆都出埋；長出黎既魔豆一面會有WYETH logo，另一面有Alpha protein奶粉既icon (阿媽抱阿B) 。我諗係代表孕育成長既concept掛。

Debbie呢株已經唔駛幾日就萌芽；聽講惠氏有一同事種到棵野上到天花咁高；令我聯想到童話中生到上雲頂上既樹。

同數字搏鬥中

星期四&五Ivan由上海落黎，要傾今年條數。

呢兩日對住excel同d數字搏鬥，心中只有兩個疑問：

1。點解個sales越plug越低？
2。Funding從何來？

Budget package已出，又係踏入每年做數做到慾仙慾死既時候......

急招嫁左可以唔駛做既俊男一名，打救我脫離呢個數字惡夢。

又愛又恨既迎囍

迎囍呢兩個字，除左烏烏同梁師奶外，都算喺個blog出現率最高架喇。

有時厭唔厭呢回事，好難同平靚正對抗既。

奶奶剛由日本返黎，Carmen又叫做病左咁耐終於都可以出黎見吓人。咪再去呢個百食不厭既迎囍囉。

阿丁好神速地煲晒ｄKAT-TUN碟同寫真還比我，當然順便比埋在坐都好既Charlotte "LUN一LUN"先啦。睇佢LUN到完全當自己搭枱一樣；加埋奶奶又喺日本帶左ｄKAT-TUN既靚靚單張返黎，我地對住ｄ相仲好似有興趣過面前ｄ餸！









飯後甜品係奶奶東京空運既黑胡麻菓子"ごまたまご"（Go-ma Ta-ma-go即黑胡麻雞蛋咁解）；最過引在個名兩邊讀都一樣，都幾有心思架。其實係一個外面白朱古力（扮雞蛋殼），內裡黑芝麻芯既小蛋糕。唔係太甜，おいしいい！

講人話OK架啦!!

發覺梁師奶兩母女都幾攪笑。講既唔係我，而係我阿婆!!

諗番都覺得好白痴。尋日梁師奶同身在多倫多既婆婆講電話，烏烏如常地趴響隔離聽住。

講到咁上下，梁師奶比烏烏同我阿婆講兩句。阿婆竟然好攪笑咁對住個電話："Woh, Woh"咁叫!!

烏烏一臉惘然，結果梁師奶睇唔過眼搶返個電話：你唔駛扮佢啦，佢聽慣人話架。

30歲就中年發福？














睇明珠台星期一既Jamie's Great Escape（走訪意大利學廚），真係比當年心目中既"靚"仔廚神而家既中年發福相嚇親!












睇左佢下櫥10幾年，佢d作法都幾邋遢，但又令你覺得cooking can be fun；而且加上佢ｄ黐脷根英國口音，同成日揸住架綿羊仔穿梭大街小巷買材料，真係好鬼型。

"識"左咁多年，睇住佢同多年女友Jools結婚生女。但結果生女後發福既唔係佢老婆而係佢自己！

香港ｄ男仔30歲都仲當自己小朋友，睇住Jamie由仔變佬........Mamamia!!

不過有一樣野真係好佩服呢個佬既就係：佢名成利就後響London開左間餐廳，請左班雙失青年邊學邊做。

Website about "Fifteen Restaurant"　http://www.fifteenrestaurant.com/

Channel 4's episode on "Jamie's Kitchen" http://www.channel4.com/life/microsites/J/jamie/index.html

咁肚餓就不如咪做啦!!

地鐵trackside廣告嚇然發現，一隻叫"活色生香"既安全套新出左"健康蔬菜味"!!

因為之前自己做過inTouch condom，所以慣性地會留意有乜新野出。一向走"安全"形象既杜蕾斯， 近呢兩年都出埋d唔同味道既condom：朱古力，芒果，荔枝......

呢隻"活色生香"更難頂，有檸檬茶，cappucino，同呢隻"健康蔬菜味"(真想問問，食咁多人造味道落肚，點健康法呀？)

條女真係咁肚餓就起身食野，咪鬼攪啦。

唔知機時會出埋d燒肉，干炒牛河，豬腳薑味condom呢？










Durex竟然出埋"限量版"世界杯唔同球隊既condom：英格蘭，德國....係比d麻甩佬一邊睇波一邊攪，定係想要人收藏既呢？

好彩inTouch已經delete左，真係唔夠佢地咁好想像力!!

The Da Vinci Code

又係一個希望越大，失望越大既例子。

下午下定決心放自己半日假。同班女食完晏後，去MCL康怡睇2pm。因為套戲尋日剛上畫，如果想放工或今個weekend睇，應該勁多人。閒日下午點都可以舒服d先睹為快。

講真，莫講話未睇過本小說既，會睇到一頭霧水；我睇過原著英文版，都跟得好辛苦。事關個故事拍到一節節，細節又交代得唔清楚。書中引人入勝既抽絲剝繭式解碼過程，都無詳細交代。

Tom Hanks簡直又老又殘(唔係因為我近排睇慣D22歲至咁講架)；好多近鏡都影到皮膚打晒摺，加埋個M字額，真係歲月摧人既鐵證。

反而法國佬Jean Reno個樣保樣得好好多；同"殺手"時期個look相差無幾。

或者因為睇左小說先入為主，真係會比較得挑剔。

豬肺唔當造？

尋日lunch同Martha，YY & 佢家姐(本來佢地兩姊妹約左，我同Martha純粹搭枱)去西苑食。

因為呢兩日YY一聽我電話，比我劈頭一句"頂你個肺"問候得太多，話點都要飲番d招牌豬肺湯補一補。點知平時餐牌上一定有既"杏汁燉豬肺"竟然換左。

我第一時間懶叻咁話：或者呢排豬肺唔當造呢？

YY望住我一呆，都唔知點比反應我；Martha已經話：植物就話有季節性啫，豬肺都有？!唔怪得知Kenny話，除左公事要聽Gloria之外，其他野唔駛聽!!

熟悉我耐既，就會知道我既優點(或缺點)係，將唔肯定既野用好肯定既語氣講出黎。唔清醒既人會比我攪到半信半疑，但心水清d既會知道，有好多時我都係廢噏既！

Starbucks Coffee Passport









呢本係AIA Starbucks既 gimmick；好似話每間分店都要諗一d自家獨特既promo。而我去得最多既當然係屋企對面呢間啦。

每次買咖啡都有一個coffee sticker(即包裝咖啡豆上既貼紙)； 滿25個就換到一本coffee passport。每本都有呢間分店既staff少少既"塗鴉"，所以無咁死版。

內業貼上唔同既coffee stickers同埋有列出其來源，特性。其實無乜實用性，貪得意叫做得淡笑啦。

我寧願好似上海或台灣Starbucks咁有d特別些既贈品：Starbucks小tote bag (上海)，換領外地tumbler (台北Starbucks Debit Card)。兩地都係統一集團經營，比香港既美心經營既Starbucks有心思呢。

淨係連禮物包裝紙都無，已經比日本店輸九條街啦。

珍珠姐，過主啦......

以往打8號可以唔駛返工，會仲爽過自己囉annual leave。但當你九百十萬樣野堆埋黎時，打風放假仲衰過唔放。ｄ野有deadline既，放半日假咪即係自己要開夜.....

下個月中有好囉膽既internal auditor由美國黎，尋日YY姐掟左３大張form要聽日之前填晒比佢consolidate。於是呢兩日我班同事就日日食海鮮大會......聽我不停魚蝦蟹.....

份questionaire都咁detail，可以想像下個月班auditor一定審犯咁審，有排比佢地蹂躪。

頻頻打電話比YY問佢條問題到底想問乜，攪到佢一聽到我咁煩躁把聲馬上話：嗱！怨有頭債有主，你唔好咀咒我先得架。

我唔想打風到，同YY打賭：如果一掛８號佢嬴；只有３號我嬴。賭注係餐日本菜！

同阿丁曬冷

Annie響深圳抬左咁多KAT-TUN比我，尋日惡補左一日(Real Face單曲MV製作，海賊船Concert同新版金田一[無錯，龜梨和也係第3代金田一])之後，今晚放工約埋阿丁，Annie & Virginia去迎囍曬一曬冷。

奶奶去左日本梳乎，Carmen又病到死吓死吓，所以無平時廖太敘會咁熱鬧。不過Annie已經變心到連訂位都唔記得用廖太(攪到我初頭搵唔到），睇怕遲ｄ都要叫佢一聲吳太囉（嚇然發現，佢尋晚po相竟然用"vanannie"而唔係jerryannie！）

其實家陣坐埋講既都唔係太多言生。我同阿丁呢排好KAT-TUN既"赤。龜"，Annie就煲阿Van，Virginia就小美同明道.......我地都叫做貪新鮮感搵新歡，但Annie簡直好似結婚多年至勾二叔咁奇怪。

炸子雞

母親節無出去食，因為梁師奶自己都唔多鍾意出去；加上佢呢位"百彈寨主"，牛肉唔岩，打邊爐又怕生，有煙味更是死路一條。

結果決定買佢至愛既炸子雞加餸算喇。

唔知是否細個每次出去食飯老豆必叫炸子雞，話因為梁師奶鍾意；鑑生要我對呢樣野食厭。講真，如果唔係母親節，平時自己同朋友食飯，對呢種又鹹又熱氣既整法，真係唔會叫囉。

我對"雞"既ranking係：

1。無乜好感類(朋友叫又唔介意夾兩件)：
- 炸子雞
- 白切雞
- 豉油雞

2。比較喜愛類(會自己揀既，但無又唔會掛囉)：
- 貴妃雞
- 鹽焗雞
- 南乳吊燒雞

3。神台類(諗起都留口水)：
- 手撕雞 (外皮要微烤過)
- 太爺雞 (即煙熏過的雞隻滲透住幽幽的茶香)

可惜第3類香港真係唔多，手撕雞還好，太爺雞我只喺多倫多以前一間排隊排到開晒巷，叫"神燈"既酒家食過。

烏烏Die-Hard粉絲

無錯!!唔係淨係言生至有死忠粉絲，我細細佬都有。

其實烏烏每次落街周不時都好多狂風浪蝶架啦，無論係幾歲行都未行得穩既塞豆靚，定係斯文OL我地都已經見怪不怪。

話說梁師奶樓下有個11-2歲既妹妹仔，對阿烏烏好搭糖。耐唔耐樓下見到都好似蟻漏蜜糖咁唔願走。尋日有見到梁師奶抱烏烏落街：

靚妹：Auntie呀，早兩日我響屋企電視度(指大廈lift的閉路電視)，咁岩見到你帶狗狗落街呀。我有d狗糧coupon，但唔知你住幾樓，唔知點比你呀。
(如果烏烏唔係一隻狗，我仲以為係金魚伯伯d屎橋!!)

師奶：其實烏烏食樓下姐姐賣既organic狗糧，呢d優惠券用唔著架。(再講左一陣organic狗糧同Pedigree/Caesar有乜唔同；但同個靚妹講呢d野會唔會有d徙氣？)

靚妹：咁我本雜誌仲有d狗玩具coupon架，我可以點比你呀？

於是梁師奶就講左住幾樓同屋企電話比人知喇。

真係同粉絲唔同命；之前有個西裝友一見到烏烏猛話可愛，不自覺出手摸完又摸。結果梁師奶費事個仔比人摸蝕晒，一句："你摸夠未呀？"

細細佬新相

開心伸俐樣。

地下舖左cushion，係除sofa以外佢既私竇黎架。

深圳滿滿既KAT-TUN手信？!












Annie黃昏由深圳返黎，話買左好多野比我又懶神秘唔肯講係乜。陪梁師奶食完飯出黎，又去返屋企樓下既AIA Starbucks飲野。正當我以為佢又買左元暢比我之際，結果.......竟然係成大袋KAT-TUN!!!
都咪話，厚厚一本寫真集(當然係所謂大陸d正版啦)都係30多人仔。 DVD + Album + Single + 書仔亦係30多。印刷當然唔夠日本靚，但紙質一d都唔差。咁既價錢真係無投訴啦。呢咋野運到去台灣mark up起碼一倍唔止。

Annie本來諗住上去搵言生同阿V既野，結果變左幫我抬左滿滿既"搭得杯落"返黎。都真係幾重架。我地癲到響Starbucks曬冷攤開黎影相!! 好在坐角落位，無乜人見到。

靠右歪的belt

剛見到一張赤西仁煲煙相。煲煙唔係重點，試問邊個日本仔唔食，重點係，佢呢排習慣將條皮帶靠右歪黎扣........型喎。到底係而家日本仔興，定係純粹佢個人自創既呢？

如果我返工都試吓，d人會唔會以為我失心瘋呢？

帶Virginia買毒藥

話說Virginia睇完惡魔在身邊之後就中左小美既毒。與其燒賀小美其他視頻比佢，我寧願帶佢去買平靚正DVD喇。起碼又清又唔駛用電腦睇得咁辛苦。

奶奶介紹皇都戲院隔壁間"仙樂"都勁多韓、台劇賣。$30-48一套。好過ｄ人去深圳提心吊膽咁買返黎。雖然我唔好ｄ催淚韓劇，但都要承認，呢間野造福左好多師奶。

Virginia一口氣買左"愛情合約"同"惡男宅急電"。 睇怕佢今個週末都會係滿滿既小美嚕。

三條女去食完味皇，再過檔Starbucks飲野。9:30pm都散喇。Annie今晚上大陸，Virginia當然第一時間返去同小美溫存啦；而我，就繼續呢個"野豬大改造", 同KAT-TUN既龜梨和也糾纏。

師傅到!!

係水電師傅(唔係姨媽啦梗係!)。

下午放假等佢黎，好在都準時，話3pm就3pm。結果關左食水總制，落樓下買過個新既喉制；搏鬥左10分鐘就攪掂。當然順手幫我換埋filter啦。呢個哥仔都幾好人，地下d水抹得七七八八至收工。唔駛我執咁耐手尾。

有時單身住，有呢d水電contact都好既。Touchwood D講句，有乜事翹起手黎，唔係個個男丁都識呢家野架嘛。

7-Eleven 大口仔世界波衫匙套推廣
































今日嚇然發現7仔又出新招啦，呢次係連我都覺得勁靚既大口仔世界波衫匙套!!!

而且仲易換左：購物滿$20可得一個，滿$30可得2個，滿$40可得3個；如此類推。

「大口仔世界波衫匙套」共有33款，每款匙套代表一個世界盃賽事入圍國家，同時特別包括香港在內。每款匙套設計會印上國家/地區的英文名稱和一個獨立的編號，設計精美。匙套亦可當作吊飾掛在手袋、背嚢及手機等物件上。

7仔出手，Circle K真係唔夠佢砍囉。

我唔會儲，但真係想搵個英國或者日本黎用都好呀。

點解唔滅價錢牌？

平時留意到，好多街上行人著既鞋都留有好礙眼既白色價錢牌。初初以為係d內地同胞，至會有呢舖引；即好似有好多表叔特登唔剪西裝袖口label，以為show off"名牌"，其實娘爆既行為。

但連中環金鐘d靚靚OL，上自動電梯時對高跟鞋底都出賣左佢地。我真係覺得好難明，買對新鞋返黎，滅一滅個價錢牌徙你幾多時間？當你身光頸靚，婀娜多姿地踩住對尖頭3吋高跟鞋時，每一步都比後面所有人見到個勁顯眼白label，係幾咁殺風景既一件事？

Cartier Pasha USB 1G

嘩嘩譁!!今日in-tray收到新出既地鐵免費刊物metropop，平時flip雜誌快過乜既我，對眼既焦點不其然被封面呢條超矜貴既USB懾住!!

非常簡約既設計，黑襯銀，我既至愛。但一睇價格......really put me off!!! HK$4300呀!! 除非我係失心瘋，呢個價莫講話1G，成個百多GB既CPU都買到啦。

1/4價錢既話還可以考慮.......流口水ing.......

Farewell Ophelia @ Butterfield

HR既Ophelia做埋呢兩個星期。Lunchtime我地Consumer Healthcare & YY一齊去太古坊內的會所Butterfield西餐廳farewell佢。

雖然惠氏係member，但平時我地好少黎食。因為每次黎都要finance出封信authorize。又唔係好食得咁緊要，都費事煩啦。Ophelia係我地平時既飯腳，為左唔想去d成日會去既地方farewell佢，揀左呢度。

自選既main course麻麻地，反而buffet頭盤同甜品仲吸引。 奇就奇在，佢地話好新鮮既生蠔，勁鹹海水味!!巴黎食過seafood platter既生蠔只有淡淡既海水鹹味，邊有咁鹹架？真係喉嚨唔舒服都會開番聲呀。

換慮水filter芯

下午開monthly management meeting都事先聲明要5:30pm sharp閃，完全為左大半年一度，約Alvin上我屋企更換sink盤底既慮水filter芯。

呢d又係當時年紀少，裝修時以為安裝sink盤底慮水器會filter得勁d；無諗過換芯時會自己攪唔掂要假手於人呢個問題。好在件ex抵得諗，每半年上黎幫我換一次。

正當我以為今次都會好快攪掂之際，世事永遠唔會咁易比你估到。換之前要先關掉入水喉管，減低水壓至可以扭開個filter。結果......竟然扭左個製都切唔到水!!擾攘左一陣，斷定係條喉既開關壞左，都係要搵d"專業"水電叔叔至識攪。頂，星期五下午要告假等佢添。

落樓下搵左個水電叔叔既contact，就去"老地方"城市花園酒店地牢上將吧飲兩杯。哇，呢度由我93年尾返黎，到而家10多年都係咁既樣。反而樓上lobby同cafe就翻新過晒。由拍拖，分手，同Alvin"昇華"為朋友都十年人事幾翻新啦；呢度除左無左d短裙仔啤妹外，真係連裝修格局都無變。估唔到呢間Bar仲襟挨過我用左8年既慮水器。

魚在水裡哭...

今朝收音機聽到呢首歌名好特別既歌；係台灣一隊叫"深白色二人組"3月時出既。歌詞填得好好(唔通誠品打得書釘多真係有文化d？)：






魚在水裡哭
我握著你的手說魚在水裡哭
你笑著說別傻了魚並不會哭
他們是一種沒有眼淚的動物

樹在雨裡哭
我抬頭看著你說樹在雨裡哭
你溫柔看著我說樹並不會哭
他們是沒有思想情感的植物

我突然的無助
沒有眼淚的悲傷沒有人清楚
只能呼吸著不被諒解的孤獨
一個人靜靜祈禱一切會結束

我矛盾著無助
很需要你能給我一點點保護
想對你說的話卻總說不出
我變成了植物

沒有人在哭
你摸著我的頭說沒有人在哭
我在哭　只是沒有人在乎

可以click入呢個blog聽首歌(用左黎做背景音樂)：http://www.wretch.cc/guestbook/fish7515

記得好耐之前既日劇"星之金幣2"，豊哥講過：

小朋友哭，係因為想得到一些東西，
成年人哭，係因為確切地知道，永遠都得不到一些東西。

個人認為，既然注定得不到的東西，哭過了學識放下，才是成年人。

想要呢首歌既，可msn我。

我 很 普 通









晚飯時睇鏗鏘集，呢集叫我 很 普 通，講一13歲的中一男生，由於自小患有黏多糖症，影響正常發育，現時身高只有三呎左右。日常生活中不少環節，都需要倚靠其他人的特別照顧。由於擁有疼錫他的父母、親友和同學，使他一直都活在愛與關懷之中；縱使面對失明和壽命較短的隱憂， 仍能坦然接受。而且，仲要考到全級第一名；同學仔見到佢點樣克服生活上諸多不便，做出比常人加倍既努力，亦都得到正面既影響。















另一個案係全港首位接受肢體延長手術増高的女侏儒，當年的增高過程前後歷時近三年，結果，身高由三呎增至四呎。現時24歲，充滿自信和熱誠，連身邊朋友也被樂天和積極的性格所感染。

身體有殘障仍可以積極樂觀態度面對人生，係唔係比我地呢ｄ身體健康既一ｄ反思呢？

有興趣者，可看節目重溫： http://www.rthk.org.hk/rthk/tv/hkcc/20060507.html