La Vie Avec Amusement: 07/01/2006

壯烈犧牲

今朝一返工Daisy就向我宣佈死訊：棵惠氏魔豆軟趴趴地訓低左！

之前見佢生到上假天花，就大剪一揮地剪斷左兩塊大葉對上個位。結果有兩枝新既由旁邊長出黎。可能唔平衡兼太重啦，結果下面承受唔到就變成今朝咁既死狀。

影左呢張「遺照」之後，就將佢既身後事交比吸塵阿嬸辦妥。

見佢「軟趴趴」既衰樣，Pfizer真係可以考慮用呢張相做偉哥既陽萎廣告喎。

死亡筆記最終篇

終於都買到大結局第12冊。可能要趕8月10日電影上畫前出晒，食住條水。

每本仲隨書附送一款幻彩postcard。我當然揀至型既死神流克啦。

雖然一早網友已經擺左日本連載既結局上網，但點都要拿住本漫畫睇至過引既。

今晚睇吓夜神月點收場。

My Boss,My Hero

7月開播的日本電視台的夏季日劇，由“TOKIO”的長瀨智也主演。

該劇改編自韓國同名電影，講述年輕的黑社會老大隱瞞自己的身份成為高中生、在高中生活中成長的校園青春喜劇。

主角是一個由於沒有學識而被身為黑社會老大的父親拒絕傳位的年輕繼承人。為了拿到畢業證書而隱瞞身份插入某校高中3年級，在與小自己10歲的同學共同經歷的高校生活中，在愛情、友情的體驗中成長。

睇左1集，套劇真係好鬼好笑。27歲既長瀨梳個學生頭，著校服行出黎唔駛講野已經十分攪笑。

比起初頭好大期望既姐弟戀劇Sapuri，結果拍到唔拖唔水，呢套簡直跑贏成條街。

今晚會煲埋load左其餘兩集。

孤單北半球 (溫馨版) 從返

多得Carlos哥仗義相助，幫我upload首歌上file cabinet，呢首歌又再次成為個blog既背景音樂。

其實點解咁鍾意首鋼琴版係因為佢係「愛情合約」website既背景。http://www.tvbs.com.tw/TVBS_G/t_g_a/love/

可能受套電視劇影響，（之前喺呢度都有提過）每次聽到呢首歌，都有種好想談戀愛既感覺......

終於都學曉自己點樣upload D歌上netvigator，不過短期內唔會換架啦。

Kangta & Vanness簽名會@apm

覺得阿Van唔錯(因為佢生日同我只差一day，亦係一個大而化之既獅子座)。雖然唔係好似Annie咁訓身去追，但佢出碟點都要支持吓啦。

同Charlotte 5pm去紅螞蟻食左野後，至去food court對面(即第三層)霸個欄杆位望落去。點都好過樓下比ｄ記者檔住晒乜都睇唔到。

7:45pm開始，佢兩個又唱又跳左首主打歌"Scandal"，同fans玩左兩個低能遊戲，再唱多首"127日"。

我地睇埋至施施然落去排隊。

做埋訪問，真係開始簽名都已經8:50pm喇。

初頭排都好地地，一入到裡面就連圍欄都無；ｄ人好自然就霸有利位置掛住影相。秩序幾亂。

台上唔好得幾多，比隻碟工作人員遞去簽名。手又唔比握，相唔比影。甚至有好多人跟本埋唔到枱邊就被拉走。咁不如簽定一堆分發去CD舖賣就算啦。

10:10pm簽完我同Charlotte後不久，安七炫就要趕11:30pm飛機返韓國；得番阿Van一個死守到最後。所以我地都算好彩，兩個都簽到。

其實Kangta望落都幾nice。Annie就猛話佢乸乸地，所以初頭勁憎佢。不過佢地如果唔係孖住上，阿Van單拖聲勢真係未必會有今晚咁。

Noon K 慶生

林氏姊妹菠蘿包 & Carol，再加埋契女(11歲但重過我)巢樂言，約左去佐敦恆豐隔離Neway唱noon K幫我慶祝生日。

下午真係唔慌多人，可能星期六好多人仲要返工。

巢樂言勁點Twins既歌；因為唱得佢地ｄ國語歌多，佢咬字都幾正架。好過好多大人。我都成個幾月無唱ｋ，連楊丞琳首「曖昧」都係第一次唱。

12點唱到2點半，話都無咁準時就趕你走。

時間尚早，返黎hea一陣至出apm。

Bvlgari Blv Notte

第一份生日禮物，多謝阿Pan!!

其實自己都買過呢隻牌子香水兩次。個人比較鍾意綠茶味，因為清爽d。

藍色樽身真係如個名咁，好夜晚feel。

味道有d似Anna Sui。

我黎緊會無論日夜都散發住呢隻味架啦。

第一餐慶生宴

早到未踏入8月，班同事就幫我慶生。

地點係上星期同廖太們黎過既中環"華商銀行公會"。

余經理早兩日老婆入左院，今日剛出院所以決席。YY就開開心心去左Bangkok。

除左同事外，舊同事Pandora，Ophelia & Damon都出晒黎。加埋Debbie個「朋友仔」Sunny，都成浩浩蕩蕩11人架。

基本上食既野同上星期大同小異。只不過同場加送，隔壁枱扒樣火紅Deep V，就黎「漏到瀉」既飯後甜品！

Damon今年暑期工做人口普查員；醒唔起早d搭佢順手幫我地派Centrum 4's sample添，哇哈哈！原來哥仔9月底就去英國入U; 仲要係好近我中學既Norwich。一去就3年，下個月出發前一定出黎同佢餞行啦。

Babysit 烏烏

梁師奶今晚同d教友去文化中心睇話劇。(好高呀!!)

所以我就負起為屋企個皇帝仔做"三陪"既責任.....陪食飯(粒粒)，陪睇電視，同陪佢玩(襪襪)。

師奶特別留d飯飯同菜菜比佢，我都係同碗湯咋。真係唔知邊個至係親生!!

不過烏烏係我地屋企最細既，我自己都有份種佢，邊有得投訴？

Farewell Carlos

卡盧士聽日last day。雖然新公司將來都好近，但話晒佢都serve左我地一年多，點都要farewell佢既。

本來想就佢喜好去食印度菜，但太古城唯一既選擇實在口卑太差。退而求其次，去「哈魯邦」食韓國燒。平時同班同事黎呢度都係叫Lunch Set，因為比較快。好少咁有雅興慢慢自己燒。

呢排扮kawaii講野講得多，班同事就黎想打鑊我咁滯。佢地甚至話可能就係近排我太「陰陽怪氣」，所以至令office風水變差而唔到數！(個地真係硬)卡盧士係唯一鼓勵我長期扮落去既另類支持者。既然係咁，阿「謝居士」就飯後上黎office巡左一round，懶係pro咁指點左余經理同Michael個位點樣改改運。明知佢都係吹水，但事後我唔笑咁複述一次比佢兩個聽，兩位男仕竟然好認真咁跟足黎做！渴望到數之情，簡直溢於言表。原來男人迷信起上黎，真係比師奶尤甚。

大雄聲音永別

「大雄」離我們而去了﹗

資深配音員盧素娟上周六因腸癌逝世，她在無線電視20多年的配音生涯中曾為不同動畫片的男女主角配音，最出名是演繹動畫《多啦A夢》男主角大雄。她離世的消息昨日傳出後，在以青少年為主的高登討論區引起震動，有逾200人留言表示懷念，有人留言﹕「感覺就好像童年好友離去一樣。」

其實自從叮噹改左叫《多啦A夢》之後，我已經無咁鍾意睇。因為覺得d人名唔同晒有d怪怪。以前既技安，阿福同靜兒都唔同譯法，對於我地呢d三字頭，叮噹陪住我地成長呢班"老餅"，而家既《多啦A夢》真係有d睇唔落去。

林保全（叮噹配音）仲更深入民心。佢個女當年都有做過無記2/3線姐仔，真係羨慕佢可以晚晚對住叮噹把聲。如果比我街上聽到呢把聲，一定追住佢簽名。

雖然今日至知盧素娟個樣係點，但真係令人懷念。(都唔知其實係真係懷念佢，定係懷念我地既童年......)

笑口常開

區樂民既新書「開開心心又一天」，有呢段幾好笑：

姐姐和我在三叔的家吃飯，姐姐說她參加信用卡抽獎，中了二十歐羅，差不多等於二百港元。

香港人最怕「執輸」，問明打電話抽獎的方法，我立刻行動。電話筒傳來結果：「恭喜你，你抽中二十港元。」

眾人哈哈大笑，除了我。

三叔拍拍我的肩問：「為甚麼不開心？」

「她中了二百，我只中二十，怎會開心？」我反問。

三叔分析：「試想想，你認為在你死那天，你的財產有多大機會一元也不剩？今天即使給你二百元，也不會影響你的生活質素，除非你打算花到最後一分一毫。」

笑容滿面的三叔從不參加抽獎，原來是這個原因。

我佩服道：「作家三毛曾說：『小聰明的人，往往不能快樂；大智慧的人，經常笑口常開』看來我只是小聰明。」

三叔聽了，笑得更開懷，三嬸忘補充：「請注意，笑口常開的人，除了大智慧，也包括大笨蛋。」

有其他既新書文章介紹：http://www.crown-bookstore.com/show_book2.php?bookid=2072&page=0

迷信

從來都唔覺余經理份人咁迷信。

佢見今年1-7月，都好似無乜邊個月到數，覺得好唔老黎。

提議有二：

1. 買隻乳豬返黎切

雖然過左農曆年，不過當搵個藉口食d脆卜卜乳豬囉。我唔太反對，佢鐘意啦。

2. 叫同事帶ｄ細路番公司玩一日

有見奶粉嗰邊呢幾年攪ｄ乜鬼"Bring Kids To Work Place"，而又生意大好；想借小朋友黎帶旺個office。
我否決左喇。傻既咩，人地請小丑，同外面PR既人安排好晒ｄ親子活動，如：有人扮巨型紅蘿蔔同小朋友影相，印水紙紋身，馬賽克畫學堂，扭氣球等......淨係叫Michael & Daisy帶ｄ細路返工，班細既悶時大人都唔駛做野啦。

其實梗有ｄ時間生意唔好架啦，年年都唔駛諗辦法去追，真係ｄ生意會自動送上門咩。

求神不如求己，諗吓有乜方法未試過，而去討論其可行性，仲有建設性啦。

第二次坐磁浮

5點多至離開公司。今日d公司司機唔得閒，所以決定坐的士去龍陽路站左磁浮去浦東機場；唔怕繁忙時間塞車。

比起去年11月同班同事柴娃娃一齊試坐，今次當然少左新鮮感。其實40人仔一d都唔貴，但可能個站去唔到市中心浦西，所以坐既只有小貓數隻；而且多數係老外添。都唔知大陸點為本。

其實維持最高時速既300km/hr只有2-3分鐘，7分多就入到機場。

全靠佢，我至可以趕都早個半鐘頭既7點機返香港。

PRF II Training

9點多到達位於中信泰富廣場26樓既office。

一放低野就閃落樓下轉角既老好Starbucks上一上電。竟然比我發現上海tumbler出左新design！！而且仲靚過之前既好多......頂，忍唔住同一個城市都要買多個。台北係咁，上海又係咁。如果每個城市再relaunch新design，我屋企既飯枱就黎放唔晒ｄ收藏！

Trainer有一個美國黎既女版Mel Gibson(試想像Mel Gibson帶個棕色假髮既樣)conduct。Regional Demand Director & Regulatory Affairs Director都在場。其他既都係上海office既同事。基本上我整日係英文國語nicam。

為左慳時間，連lunch都係阿姐買外賣點心，粉麵飯黎會議室既working lunch。

4pm就散。

Keith同Ivan終於都同阿Paul傾過，定到條數喇。明年唔會易做，但起碼都有得開行turbo趕budget。

臨出機場都要比Paul兇左兩句，預左啦；唉.......

真鍋咖啡館

雖然好想食「永和」既粢飯, 但真係懶得撘的士特登去. 過馬路去對面一間「扮」日式既Manabe真鍋咖啡館, 叫左碗原味牛肉麪 RMB30, 同杯冰珍珠拿鐵(既Latte)RMB25.

可能間野價錢以大陸黎講唔算平, 所以靜英英得兩枱.

牛肉麪0K, 有台灣水準. 但D珍珠真係好唔掂! 煮得過熟, 完全無哂QQ既ロ感. 粉圓類既野, 都係要返台灣食.

漫漫長夜, 本來帶左日劇黎狂K, 點知無帶DVD Rom!! 整定我要早D訓.....

小路寶司機

剛到上海.

黎機場接既唔係平時既小林. 今次係Keith既司機, 一個頭圓圓, 身圓圓, 成個小路寶一樣既哥仔.

小路寶手車偏快, 公路上逢車過車. 加上今日落毛毛雨, 真係想話我其實唔係咁趕住去酒店.

雖然有咩冬瓜豆腐, 公司都有36個月糧; 如果死於意外再多36個月!! 但我呢排唔等錢洗喎!

WALL'S雪糕蛋撻

尋晚聽Moly同阿路都話呢隻新出既雪糕蛋撻好食，搵左好幾間7仔都無，結果反而樓下惠康入左兼做特價。

撻身是朱古力做既脆皮，中間黃色既係蛋味雪糕; 味道唔錯，真係有蛋味，唔太甜。比較快溶，要快口食。

一盒有6隻，不過一次起碼都隊兩隻至過引啦。

哇哈哈掛住食，連相都懶影。圖片係人地個blog到"偷"既。

新地點

去迎囍食得多都厭啦。Annie生日，同班廖太試試五稜會樓上既華商銀行公會。

成11條女，好耐都無咁齊人。連稀客阿路姐都賞面。本來阿路尋晚劈得高興，今日hangover想唔到，但放工過得到黎hea左一陣，都唔差在黎埋啦。真係好佩服佢，踩住4吋半高跟鞋，都跟到我既步伐。比我著住，企都企唔穩啦。

Annie收既禮物，都係大部份fall into紫色，波點，或Vanness呢3個categories。佢應該最鍾意既係，奶奶由日本Vanness演唱會帶返黎既場刊!!

11個女人中，有我，Carmen同阿路呢d咁癲喪既"腳"色，當然又係唔顧隔壁枱感受，越講越放。例如年頭我地去日本，講開和服裡面唔suppose會著任何野，而引伸到咁古代ｄ日本女人點用姨媽巾都大大聲咁討論。Carmen甚至中段笑到噴茶添。所以，聽笑話時唔好邊食邊聽，高危動作黎架。

食物ok喎，8人餐都係$688；抵呀。而且service一定好過樓下五稜會先啦。最欣賞既係飯後叫既蛋撻仔同皮蛋酥。 (可以去我msn space睇相：http://glorialeong.spaces.msn.com/)

決定下星期五班同事同我預祝生日時，再帶佢地黎呢度。好過完全唔響應劉華既呼籲既死人泉章居呀。

三舅父

同"三舅父"Keith開足一日會。佢同阿Paul坐機由澳洲training完，倒塌咁早5點就到香港。Keith梳洗完，9點多就殺到。

我，余經理同Martha由朝早講條數，到下午focus on明年既strategies.......雖然要解釋點解生意跌，點樣再build brand equity係無早兩年報喜咁容易，但真係appreciate佢同Ivan肯花咁多時間落去睇香港條數。Afterall，學阿Paul話齋，香港既生意對佢黎講，只係等同大陸一個類似成都既城市。

好彩一日之內攪掂，聽日可以清埋其他野至出trip。反正下星期一上海office都見啦，等佢同Ivan執完條數，阿梁總(Paul)一首肯2007交條乜野數，下星期返黎就會如火如荼做budget喇。

綠色炸彈

上年追收過去4年holiday allowance既稅，都仍然上訴中，未解決！！今日收既綠色炸彈火力更猛，簡直驚天地，泣鬼神！比上年個「歷史新高」再加多50%！！

我覺得自己似幫稅局打工，而唔係幫惠氏打工。

睇怕都要諗ｄ秘撈幫補吓囉：

小販？ 咁既身型走鬼跑唔快喎。
企街？ 超齡啦!!
一樓一？ 我未見過康澤會比我掛黃色招牌；而且我個樣唔夠住家feel。
走粉？ 我份人殺氣咁大(according to 我班同事)，似差婆多d喎。

聽日都係認命返工........

「HERO特別篇」

多得偉大既BT，木村拓哉的2小時「HERO特別篇」，7月3號日本至播完，過兩日已經load左。

真係不得不承認，薑係老既辣。比起Supuri中，嘗試再創當年長假或Love Generation既木村神話，結果攪到不淪不類既龜梨和也，睇返原裝，演技立見高下。

雖然木村拓哉變老了，留了長髮、皮膚黑了，但依舊魅力不減。

《HERO》（《律政英雄》）在２００１年首播，居然在五年後續播特別篇，也可稱是近期極不可思議的事件之一，但更離譜的是播出後的收視是30.6%，的確如富士電台所願，再次創造收視佳績。久利生是個不畏強權、充滿正義感的檢控官，最喜歡穿著他那件橙色的皮衣辦案，而且沉迷電視直銷，外表冷峻，內心熱血，言語行為均十分破格。

特別篇的故事講述久利生，離開了東京的一眾夥伴，到了一個平靜的村莊工作，處理當地相隔十一年後再次發生殺人事件的故事。因此有堤真一、綾瀨遙及中井貴一等新陣容加入。

中井貴一自白既幾分鐘內心戲，面部表情既微妙變化......無番咁上下演技，真係做唔出黎。

原來劇中的重要班底，只在最後五分鐘出現！久利生在最後終於被調回東京，再見一眾的工作夥伴，那群人仍是那麼的好笑!!

唔信邪

Connie今個禮拜醫院返夜，之前話過陪佢去「中國湯」食呢個勁豪花膠扒。雖然第二次Martha叫既時候已經話縮左水，同埋由花膠公轉做花膠乸(suppose平ｄ同削ｄ)，但既然Connie無試過，就無比較。比多次機會佢平反囉。

今次又進步番ｄ，不過始終係第一次最掂。

講真，佢地ｄLunch Set唔算平，但對女仔黎講，唔駛咁多肉，份量剛剛好。

唔知Connie返工時有無覺得膠住個口，定膠住個胃呢？

叫左外賣，夜晚人肉速遞比梁師奶。最衰烏烏唔食得，不過佢成面毛毛，補唔補骨膠原都無人覺啦。

奶奶手信

奶奶上星期由東京返黎，抬左ｄVanness既野，夜晚約Annie出老銅Starbucks飲野。

Annie lunch時call我，連續兩日都見過，實在忍唔住問：又Starbucks?！今次有乜objective先？(又唔係斷背，駛鬼見得咁密呀？)坐我對面既YY愕左然，以為除左打電話比我要講重點之外，約飲野都要list objectives。

手信一：宇治金時(即抹茶紅豆)味既袋裝Kit-Kat。之前記得香港都有出過細盒裝，但袋裝就無見過。

手信二：日本夏天限量版既西瓜Starbucks Tumbler!!勁可愛，有隻小甲蟲隱身在紅色西瓜肉中添。聽奶奶講當地仲有金魚版，真係好有7-8月既花火大會feel。

路過Sogo既LeSport Sac counter時，赫然見到有紛紫色邊既黑底白波點袋！！仲要係特價7折款！雖然送左生日禮物，但唔買比Annie都對佢唔住啦；整定佢有運行。

火都黎埋

Finance條女做我地盤數都大大話話3年啦。每隔一排都會比d"驚"喜我。

上星期五發現2005年度既Caltrate discount條數低到唔合理，叫佢去check。今朝圍唔到條數不特止，仲要死撐!!

身為finance，連最基本幫我地keep track住條數都做唔到。因為佢令到2005個by brand discount level好怪，我做2006 & 2007既projection時，個trend會解釋唔到。

大姐，我無可能每一樣野都自己做晒。不如我出埋佢份糧，做埋佢嗰份好唔好？！

做左幾年都一舊雲，唔係見佢係女仔怕佢喊，我真係想對住個電話爆粗架喇。

呢排真係食左火藥，血壓唔高至奇。

勇氣

Karmen係我藥劑既同學仔。

初頭一齊返過黎香港做藥廠，幾年前去美國讀MBA，畢業後嫁埋個拍拖多年既師兄，現定居New York。

佢同我係同年同月同日生，但性格一ｄ都唔似既兩個獅子座(唔知邊個既阿媽攪錯生日喇)。

早幾年佢剛新婚就發現患甲狀腺癌。雖然電療叫做治瘉左，但其實咁後生患癌既復發機會幾高。真係好佩服佢有咁既決心懷孕生仔。繼大女Haley後，個多月前又追多對孖女Jacqueline & Kristen。

如果唔係勁鍾意細路，加上未來身體狀況有咁既未知數既情況底下，比我就打死都唔會生。

此獅子不同彼獅子。

痴纏

同Annie & Carmen呢兩條女，比拍拖d仔更痴纏。

去完街返屋企無耐，呢兩位大姐剛起床。結果凳都未坐暖又出城市花園間服務奇差，野又難食既「晶苑」陪佢地飲下午茶。

反正今朝出銅鑼灣既Agnes b la maison sur l'eau (travel concept store)買左份生日禮物比Annie，順手比埋佢喇。買野比Annie實在太容易，一係波點，或紫色，或Vanness都岩。當然太女人既野我買唔落手，都係一貫簡約同實用性為主。呢間舖雖然比較隱閉，但會carry一ｄ外面Agnes b無既產品。今次比我發現新出同另一品牌cross-over既限量item，二話不說就叫人包起佢！(因Annie要留待生日至拆，所以只好賣個關子)

間茶樓服務太差，我同Carmen兩個煤氣爐都未出聲，Annie已經發火。寧願埋單我帶佢地去屋企對面，橋底既「福圓湯圓」食甜品。話晒唔駛受氣，黑芝麻湯圓勁肥大兼皮薄餡多。

無跟佢地出銅鑼灣，反正話唔埋今晚又Starbucks見，仔都唔可能見咁多啦。

少"飲"多餐

呢排隊啡有越來越多之勢。之前朝早一杯大既都頂到成日，而家下午往往要整多杯細既至concentrate到做野。上週末下午3-4點直頭出現withdraw symptoms添。唔係頭痛，而係成個人講唔出既唔舒服。直至去到Starbucks上完電至正常番d。

長此以往都唔係辦法。

今日既strategy係：朝早只係整杯細啡，下午唔舒服都忍一忍。寧願夜晚整多杯細既keep住個blood caffeine level。i.e. Caffeine Q12H

夜晚正想去上電，Annie剛好打黎約飲野。正中下懷啦。扯埋Carmen個衰婆，3條女坐到人地打佯。隊多件勁甜既朱古力蛋糕，漫漫長夜，有足夠既caffeine & glucose支持我煲日劇。

又係私房菜

本來無諗過隔一星期又黎，但答應左請Carlos食飯，Martha話想試一試呢間The Legend Concept，咪約埋阿路一齊去囉。阿路姐打扮一貫既性感，雖然無出deep V，但低胸黑裙仔，紅色high heel，絕不欺場。

我今次再揀d上兩次無食過既野：Pan Fried Scallop, Stuffed Snail in Mushroom, Scallop Consomme, Sea Bass Cutlet, Orange Souffle.

被個budget file蹂躪左足足一整日，做數做到極呆滯兼脾氣暴燥既我，起碼食飯既數小時內，係完全無再諗過堆數字。

小狗波士再一次成為PR。連唔多鍾意狗既Carlos都話佢勁似公仔，忍唔住抱住黎影相。我同阿路直頭唔願放手添啦。而且證實Martha比Connie更怕狗。因為Martha連摸佢背脊d毛毛都唔敢!!

S.H.E. 演唱會

其實我唔係太熟佢地既歌，反而睇佢地做台劇比較多。當然印象最深係「薔薇之戀」啦。三個之中我唔係太好Selina，因佢太女人。

我同Connie純粹係支持佢地既第一次香港演唱會，唔係粉絲，所以無必要坐太前。結果$250買左黃區側台飛。開三面台，同側田一樣。可能只唱一場既關係，全場爆滿！！

2/3係快歌，又跳又唱live，佢地都幾夠氣架。

Selina瘦左好多，中間一段辣舞，著得非常性感；再加對4吋幼跟鞋，又扭又跳，好擔心佢會拗柴！

Hebe打鼓solo左一段，都有ｄ睇頭架。

Ella依舊故我，作比較中性既打扮。

嘉賓有Tank，張智成，同重量級既周董。周董鋼琴伴奏左一首，又solo左首「髮如雪」。都算值回票價啦。

尋晚訓好少，好攰。真係要早ｄ去搵周公子哝泣.......

和富飯店 

慶祝Marinda生日，同Upjohn舊同事去和富花園對面既和富飯店食飯。（唔駛次次去迎囍咁悶丫）

雖然裝修有ｄ兜痞，但晚飯時候門外大把人等。Carmen一早寫低晒有乜野出名：小龍蝦蒸荷葉飯，魚香肉碎炒大聖子，南乳炸豬手，是但(海鮮蒸蛋白)，鬼馬(黑芝麻沙律醬魚肉釀油炸鬼).....