萬聖節的回憶

去年今日，言生海港城握手會。我少少地都有帶住對角。有d人真係變裝扮到........面目全非，都唔知握完言生有無本事認得佢地。

但去年呢段時間，亦都係我最難過既日子。萬聖節前一晚，第一次聽我老豆講一d放棄既說話：已經好攰，唔想再撐下去。我當時無言以對.......

真係怕聖誕同大除夕，會勾起更多喺瑪麗醫院既回憶。

今年見到ｄ小朋友變裝，有ｄ感慨。

搵到90%相似既鎖

真係估唔到，竟然比我喺Tiffany & Co.見到同Trapnest樂隊本城蓮嗰條有成90%相似既鎖頭頸鍊。唔買都對自己唔住啦。

個salesgirl話近排呢條新出品好hit，我話梗係啦，咁似漫畫嗰條。二話不說就喺袋度拎本Nana揭比佢睇。如是者我地兩個就對住本漫畫嗲左５分鐘；真係有ｄ低能。

食食食.......

今日連趕4場，除了第一場比較健康d之外，大都係同食有關：

10am Body Massage + Sauna

1pm 同Carol去又一城 Amaronis Little Italy 慶生









3:30pm 趕返去太古城 Queen's 同 Connie & Annie下午茶

6pm 約左梁師奶，細佬+女友去銅鑼灣小南國晚飯

好在唔駛飲野，個胃可以早d休息吓。

烏烏新相

身上既毛毛都生番晒喇，佢只係梁師奶既頭號fans；完全當我無到!!

據我阿媽講，佢應該對我又愛又恨。我唔黎就間屋靜英英，無人陪佢玩；但我一黎就攪到佢半死，煩到不堪。

唔知係唔係心理，我覺得佢d表情越來越似人。而且個頭仲有d似愛因斯坦添!

LOST

同事Jeffrey早兩星期借左呢套電視劇DVD比我；為左唔想hold住套野咁耐，尋晚的起心肝開黎睇。

之前都聽Ebby追緊，仲訓身推介話好好睇。係講客機失事，數十人留落荒島，各人因性格背景差異而面對逆境既故事。(哈，以余經理咁鬼怕坐飛機，比佢睇埋呢d失事場面，佢唔同我去上海都似!!)

So far只係睇左頭幾集。我都係鍾意追d懸疑(eg. 殺人事件) 同鬥智鬥力(eg. 間諜片)多d。呢套睇怕都要追成個禮拜喇。

狗帶

因為Nana既影響，最近買左條皮帶choker；比人話我搶左烏烏條狗帶黎用！我嫌而家嗰條無窩釘，唔夠punk feel，打完邊爐顛起上黎同朋友行去總統商場間寵物店買.....無錯......係真既狗帶！

最尷尬既係揀緊長度，想試上頸又唔敢當眾試既時候，個sales都忍唔住吞吞吐吐咁問：請問係比狗定係.........我（汗）：.........（扮聽唔到）

一出去本來想馬上試上頸，Annie怕尷尬拉我埋隔離商場至比我試。

講真，條狗帶ｄ皮幾好架；話晒都係德國野。當然我唔會顛到買防虱狗帶既，唔係你地以為我噴左ｄ乜野怪味香水添！！

嘻嘻，大閘蟹Encore

今個星期內第二次見班廖太們；因為上次阿丁要返學黎唔到，無理由飛甩佢既。

又係皇室堡，迎囍.......樓上既稻香打邊爐。大家都忍唔住encore多次$30大閘蟹。今次我仲好似破左上次記錄，佢地食晒開埋爐，我仲同隻蟹搏鬥緊。

食到一半Moly上埋黎，再加碼tick多幾碟，傾吓講吓，都食左３個半鐘。其間阿丁跌筷子都成３次咁多，人地事後執野見到成地筷子，仲以為張枱有細路仔添。

P.S. 炸魚皮真係同我屋企附近既味皇差好遠。下次試吓偷運包入去先。

鑊鑊新鮮........

呢d咁鑊鑊金既代理，都唔知好嬲定好笑。

今次跑出既唔係衰開既Operations，而係Finance + IS。又係由我地余經理無意中發現。最趣既係佢地早幾個月收少我地錢，我仲要催佢快d check清楚仲有無其他月份收少我地。大佬呀，年尾流流埋數就咪比呢d驚喜我啦。

攪到我臨放工都要打電話去凶人；睇怕佢地可能每個department夾錢去鵝頸橋打我 (小人) 洩憤。惡女形象都好難洗底喇。

哇哈哈，連放兩日朝早......

一個字：爽!!

雖然下午要返去開會，難得可以連續兩日賴吓床，去Starbucks一邊煲漫畫一邊歎杯至愛咖啡，滋滋油油聽歌沖涼..........對近排做緊超級大打雜既我，呢幾個鐘，仲爽過週末既24小時。

同事Michael隻銀狐狗早幾日突然半夜暴斃。只係當晚聽到另外２隻既吠聲，朝早賓賓想帶出去放時已經發覺佢僵硬左，郁都唔郁。對於我同Ophelia呢ｄ簡直當隻狗係家庭成員既人，聽左點都有ｄ唔安樂。真係應該對烏烏好ｄ，唔好成日蹉到佢半死.........梁師奶話每次我走後佢就馬上訓到軟晒，好似比我虐待完而唔係玩完咁。

mfpa



全名係Mouth & Foot Painting Artists Limited。係一個由一群雙手失去功能或是沒有雙手既畫家創辦既自立更生機構。用口或足繪畫卡片，月曆等供人郵購。香港好似無網站；國際的website:

http://www.amfpa.com/html/show.php?lang=2

早兩日喺信箱收到呢個機構既聖誕卡樣板。而家e-cards咁方便又環保，我都唔寄聖誕卡好耐喇。咪睇吓梁師奶有無興趣囉。佢一見到就話當年佢同我老豆都好佩服呢ｄ畫家，殘而不廢。叫我齋捐錢，最好連回郵地址都咪鬼寫，免得佢地太客氣咁寄ｄ月曆黎。都岩既，而家已經唔興寄真既聖誕卡，日曆年尾通常都大把。太唔環保。

有好多時自己的唔起心肝做善事。但好似呢幾年因為追星（奧比斯，宣明會），同比兩老指使（重返校園計畫，口足畫藝協會）都做多左。好事黎既。總之唔係公益金呢ｄ行政費多過乜既機構就得啦。

有興趣既，香港mfpa地址係：

國際口足畫藝有限公司
香港新界沙田安平街６號
新貿中心B座1508室
Tel: 3142-7833; 2889-1549
E-mail: mgpa@on-nets.com

繼續迎囍.........

真係飯堂一樣。今次係同班廖太們幫Popo慶生。
←Popo
好彩得7條女叫唔到1380咋。反而試左$30大閘蟹；都幾大隻喎。不過我實在食得太慢，一隻都攪成半粒鐘。
奶奶＆Annie
同隻蟹搏鬥完滿手油!!

偷返黎的，但幾有意思........

生命不是為所欲為,有時候我們的承擔要大於接受。

哇哈哈，惠氏四美圖（唔准嘔！）

迎囍1380

無錯!!又係呢個毫無新意，但真係幾抵食既＄1380全包宴。10月係Martha同Johnny生日。除左CHC + YY + Damon外，今次仲有前大秘書Pandora同好耐無見既頭靚 (我以前唔係傻強，都叫做有兩條靚架) 阿楷。

d餸菜雖然無乜新意，水準尚算穩定。

中間發生左段小插曲：前Upjohn同事Marinda過黎囉野，YY一見到佢初頭猛話個樣好熟，再對埋個中文名同學校名..........就咁，一對失散多年既中學同學就相認左喇。

做自己的主人

元暢昨天的我簽，故我在：

作自己的主人，學習如何愛上自己，才能讓別人愛上你。跟大家分享共勉之。

人越大，牽絆越多。好容易隨波逐流，漸漸喪失自我。做自己的主人，不要被人牽着鼻子走。

說實在，我真係好佩服呢個２３歲大男生對人對事的豁達同自我。例如換個角度睇，換個立場睇，選你所愛，愛你所選，同今次既作自己的主人等，都係佢成日掛在咀邊勉勵小寶貝們（fans）的說話。呢種生活態度，又有幾多成年人做得到？

南京鎖

呢兩日一口氣褒左８本NANA漫畫；勁！真係懷疑娜娜同奈奈是否lesbian?

So far我最鍾意既竟然係娜娜套係男友蓮頸上既南京鎖！鎖匙？當然keep喺娜娜度啦。

我覺得個idea真係好鬼型！如果自己有條仔，一定照版主碗用把鎖塌住佢，自己就帶住條匙做埋頸鍊。哇哈哈，原來我佔有慾都唔弱喎.........

花より男子

剛睇左21號晚TBS首播既日版流星花園。講真，日版F4真係有d嘔；尤其是做道明寺司既松本潤，又矮又乸型。唔係話偏見，但台版個mood清新好多。不過無可否認，日本ｄ製作例如學校背景，校服都落本。當然個故事比台版更跟足原著漫畫。

做道明寺樁既竟然係松嶋菜菜子！佢把聲咁鬼斯文，點似會係虐打自己細佬既凶狠家姐架？

不滿

講左心裡面不滿，雖然未必能解決件事，始終立場唔同。

在意既唔係件事做到與否，而係對待問題既態度。我覺得做人處事，一個正面負責既態度才可獲得對方信任。

誠信係我對身邊既人最基本要求。

P.S. 無啦啦比人冠以火爆達人既稱號，EQ有待改進。

Why Men Don't Listen & Women Can't Read Maps

老細Paul今日落左黎。朝早開會忙到一頭煙都唔得閒理佢，估唔到中午飲茶時佢真係又再提起呢本話女人（指桑罵槐，其實係話我）無空間距離感既書。

佢一定好鍾意呢本野，用左15分鐘大噴口水差不多講晒個abstract出黎。連人地有個graph錯左都知。你千其咪駁佢呀，你challenge佢一個point，佢就用書既theory講多幾分鐘。我真係怕會沒完沒了所以速速埋單。

仲叫我地應該一人買本看門口；都唔知佢係唔係有份收版稅既呢？咁hardsell。

舊同學飯局

Shirley剛由Toronto過黎渡假，約埋d舊同學去太古城王家沙食飯。
Gigi, Gloria n Shirley
佢係我UofT Pharmacy既師妹；2nd Year攪Chinese Pharmaceutical Society既時候開始熟絡。如果我當初真係F6時入讀英童學校KGⅤ，大家可能早ｄ同校添。

平時Gigi最難約，雖然喺萬寧office咁近返工，但佢一放工都掛住返去揍仔，好少約得齊食晚飯。Connie剛去完東歐旅行，仲放緊假；否則由大埔那打素放工出得黎都宵夜啦。

雖然大家都係呢一行，但就好似Industry (Eli Lilly, Roche, Wyeth) + Hospital (Tai Po Nethersole)+Retail (Mannings)敘會咁。其實我地一講自己個field既野，行外人真係好難插到口。Gigi如果帶埋陳生黎真係可能悶死佢。 Annie, Shirley n Gigi

分歧

朋友之間對一件事睇法唔同係常有既事。通常只要心平氣和咁溝通彼此既想法，就算唔能夠達成共識，都可以理解點解對方會咁做。

但如果感覺被利用，就已經無法再站喺對等關係上分析彼此既分歧。係失望而唔係憤怒。

繼續為$而愁...............

搬運費，拉光纖費係expenses；裝修，置新野係capital expenses.........我愁既係後者..........唔明？

1 現有傢俬搬晒去不在話下，連房間木門都唔放過
2 Server房冷氣要24hrs，拉喉成9萬.....下年至整；暫時開大度門夜晚同weekend開冷風機頂住先。我都唔知要唔要weekend返去幫部冷風機倒水！
3 Pantry有機會做sink盆，不過都係下年；連d櫃都延後做。頭兩個月成間pantry只有水機同雪櫃
4 Projector都唔好買住，開會要用？過隔離用人地conference room開囉。

有咁多野下年做，保佢大，影印機同度骨機千祈唔好壞。如果唔係，你地會見到西藥行第一個MM為左公司而要淪落到喺太古坊賣笑（仲要唔知有無人買喎！）

小泉參拜同「神六」歸航有乜關係？

我亦唔覺得國家元首以往高調去參拜靖國神社係啱；但都唔可以話人地特登揀「神舟六號」回航同一日去拜係玩野架！

日本秋祭係應該一早定左，小泉今次講明係私人性質去參拜：明顯比以往低調 ，沒有像過去那樣穿和式禮服或燕尾禮服，沒有進入本殿，亦沒有記名和交付獻花錢..... 但他出入都是乘坐官車，有助理陪伴。

我覺得如果佢唔係代表日本，純粹係私人參拜，外國係唔係應該干涉佢呢？唔通要坐JR單拖去至得？！

據我所知，靖國神社除左供奉如東條英機呢ｄ甲級戰犯外，仲有其他戰死既人。德國都有二次大戰記念碑比人悼念；點解佢地每年參拜就唔會比人解讀成右翼抬頭？

女人與空間距離感？

真比我老細吹賬，email個floor plan問佢意見，一打電話落黎第3句就話：我而家睇緊本美國好暢銷既書，講男女既分別；你都應該買黎睇吓。本書話女人對空間同距離感好差.....你而家試吓picturize個floor plan...（下刪幾十字）.......咁改法你話係唔係會好ｄ？

佢要改既地方雖然係有point，但我都不禁話：老細，你兜咁大個圈都係想講我無乜空間距離感啫，唔駛話晒所有女人呀？！

下午終於都submit左個floor plan比太古批。

Charles落咗黎日半，最正係比錢搵裝修公司幫我做埋同其他vendors （e.g. PCCW, Chubb, Swire）既co-ordination；搬都搵埋人幫我地pack同unpack（當然我大把私人嘢如漫畫，VCD等就梗係唔好假手於人啦）。佢仲話叫我要好似ｄ阿太咁：我地搬啦！就兩手只抱住隻狗行過Devon，自然有人幫我地整頓好兼上埋ｄFiles喎.......講就易，我真想同佢講：我咪就係嗰隻狗囉！

Background Music

多得小麥同阿丁，個blog可以加上d背景音樂。

有d朋友可能已經知，首歌係孤單北半球(溫馨版)。我既手機鈴聲都係佢(不過係林依晨唱既真人版)。去年秋天台劇愛情合約既片尾曲。

點解咁鍾意首歌？除了片尾片段林依晨喺水簇館遊黎游去好靚外，每次我入個official website聽到呢首鋼琴奏既溫馨版，都令人有好想談戀愛既感覺。

誠意推介：

http://www.tvbs.com.tw/TVBS_G/t_g_a/love/

il Bel Paese

意大利文，即"The beautiful country"的意思。我好鍾意佢出既homemade bakery，今日經過忍唔住入去買左麵包，曲奇同意大利的Tuna Pate回家做午餐。

位於皇后大道東近Three Pacific Place的小店，幾個月前途經發現，比我一個少少驚喜。除左homemade bakery 外，antipasti(appetizers)，pasta，cold-cut & dessert都有。當然仲有意大利運黎既罐頭，橄欖油，醋，當地既生果蔬菜；甚至有時連西西里空運黎既血橙都有!!

自問好怕太多茄膏同芝士醬既野，所以Lasagne就認真麻麻。正宗意大利菜其實有ｄ都幾好食。但香港好多所謂意大利菜e.g. Pizza Hut & Spaghetti House都係太港式化：

Pizza - 人家底薄唔會太多料，以香脆見稱；但香港d厚底甚至芝心批，加埋d古靈精怪餡料，攪到面目全非。

Pasta - 一般都煮得太諗，一d都無咬口。

Rissotto - 好難拿捏佢嗰種唔太乾唔太濕既黏度；好多香港餐廳當係一般炒飯，吹脹！

唔通一定要去Grissini, Sabatini or Cova呢ｄ餐廳至有ｄ似樣少少既Cuisine Italiano?!

同Charlotte食晏

Charlotte由多倫多返黎無耐，不過佢喺君悅返3pm shift，今日我又無乜特別野做，咪約出銅鑼灣食韓國菜囉。

言生黎香港呢兩日一夜，唔只我去機場見唔到，連喺佢住既酒店做野既Charlotte都見唔到。本來訂左兩晚房，但正當Charlotte想offer個complimentary treatment引佢上Spa既時候至發覺佢已經check out左。真係來去匆匆。

喺Sogo超市買左好多盒新口味百力枝: Decorer, Mousse, 黑胡麻，五穀......（我成雪櫃少說有十多款百力枝，都可以話係固力果既忠實粉絲）；今晚漫漫長夜，倍我褒online NANA漫畫。

P.S. Charlotte, 多謝張Eason拉闊concert飛。（＾３＾）

Kirin 氷結

下午收到朋友Alvin由日本訂黎既８罐氷結（我既至愛飲料）；有青蘋果，桃，青提同橙味。幾年前去東京, 麒麟岩岩launch呢隻野。坐JR日日都見到個廣告，但就搵到最後一日至喺裏原宿一間小酒舖至買到。飲左一罐就要返香港。而家聽講係Kirin最好賣既產品之一。

因為唔好意思叫人帶ｄ咁重既液體，所以唯有每次去日本至飲返夠本。上年到步東京第一晚，一checkin完就落樓下間convenience store買左罐長既自隊啦。同行既阿丁仲問我是否好口喝添。

有一段時間Sogo有入過，可能$16罐太貴無人買。而家Alvin訂左５箱黎送比醫生做gimmicks, 我就漁人得利。因為數量少，運費同其他費用，圍起上黎成$36罐！自從知道佢訂氷結做gimmicks，我呢兩個月每隔幾日就「關心」吓佢ｄ船期；真係追自己ｄ shipments都未必有咁落力呀！

真係唔係好捨得飲添.........

亞路

搵唔到人食晏，心血來潮call亞路。佢轉左黎Cornwall返工約左幾次都唔成事。擇日不如撞日啦。

雖然佢掛名仲係香港最愛言承旭家族版主，實際佢都退出江湖喇。份人幾豪爽。認識佢係幾年前一齊搞宣明會以言生名義助養27兒童，作為賀佢27歲生日禮物既project度。而家追星大家都無咁熱心喇；大部份餐飯既時間都係講工作+少少私人生活。言生同F3既近況反而要我update番佢。

其實追星可以識到咁多唔同行業，唔同階層既人，networking可能仲勁過讀MBA。

捉蟲

放工閃落去搭A12，同Annie & Moly一齊去機場玩接機。一入到Arrival Hall好多都熟口熟面；有好多三五成群，好似他鄉遇故知咁敘舊。

言生班機９點多到達。因為今晚Oral B無請黑衣人SecuStar（佢地應該去晒幫黎老明）保護佢，大家都唔知佢會好似平時用B出口，定玩野用A出口出閘。

哇，A同B相差200米有多，我帖B，點錯都唔跑喇。正當大家臨尾一刻都仲係收到風係B而聚集晒呢度時，點知個死仔玩A出！！成200幾條女喺機場大堂奔跑既情景都幾壯觀。我今年都真係無咩賭運。

算，當入機場食Spaghetti House.......

放唔到假

都真係要認命，攞左假而放唔到既已經累積到３日；再加埋剩餘既７日，今年內點放呀？！就算我聽日夾硬放，都可以想像坐係屋企和唔同既vendors聯絡同check Email；咁放黎做乜？

繼續為裝修而煩惱：

電腦/電話光纖－因為我地同惠氏佢地搬既時間相差個半月，我要諗掂Oxford←→Lincoln (old server room)←→ Lincoln (new server room)←→ Devon既過渡............

保安系統－好彩集成搬過黎時無扔掉套舊system；今日下午Chubb黎開箱痞喺度檢查ｄ舊硬件時，感覺好似鴨寮街揀垃圾咁。

租約－終於都等到上海速遞份簽左名既文件；正當我帶埋張支票交比Swire Properties時，先知道少左Stamp Duty的千多蚊.......頂，又要再開cheque requisition。

Floor Plan－仲未落實；Server room/machine area 同大門都仲要執。再唔遞交比Swire審核，點可能如期完工呀？！

Pantry－結果都係無sink盆；上面認為唔值得為洗幾隻杯而花４萬蚊去整。上海office咁多人都係用dry pantry，咁仲可以點拗？睇怕我都係逃唔過去廁所洗杯既厄運架喇。

吓！元暢都有黎香港睇Rain？！

鄭元暢、阮經天跟著恩師洪偉明到香港聽Rain的演唱會，拍宣傳照時，還穿上與Rain相同的百萬LV皮衣，讓他直呼開心。

自從今年3月在北京的「百事音樂頒獎典禮」中，看過Rain的8分鐘舞蹈之後，鄭元暢就被Rain的舞台魅力收服，「哇，真的很 厲害，很有魅力，我在家族網站跟fans分享，結果就收到一大堆Rain的相關產品。」鄭元暢笑言，「『浪漫滿屋』都還沒上，fans就先送我盜版片，當然我還是有看電視播出！」

鄭元暢說，他計畫赴港已經好一陣子，還把Rain的南韓演唱會DVD看到爛熟，「結果啊，就是看太熟，連歌單我都會背了，到現場 看，反而覺得好像都看過。」小綜笑說，Rain的脫衣、狂舞他都知道在哪段出現，只因坐第一排，爆破時太靠近，讓他嚇得從椅子上 彈起來。

回台後，鄭元暢進棚拍宣傳照，造型師借來的第一套衣服，就是Rain在香港剛下飛機時穿的LV皮衣，「哇，穿起來感覺真不賴，不 過我還沒富豪到要買啦。」

OMG
怎麼我跟元暢那天在同一個空間之下,
我也沒發覺,我就坐在後幾排而已,
傷心ing..........

皇后飯店

太古城新開左。YY痄腮好番後第一次「誰怕誰」同佢食飯；約埋ｄ同事一齊去試吓呢間搬左黎太古坊好耐都無去既地方。

唔......ｄ招牌羅宋湯同咖啡都一樣水準；但野食就唔係咁掂。都係利園對面嗰間好食ｄ。

好彩今日要早ｄ食晚飯；因為梁師奶８ｐｍ要去開天主教義工既例會（佢都要開會？果然有其女必有其母！）。佢自己一食完就閃左去，得返我陪烏烏睇左一陣書至走。

巧婦難為無米之炊

唉！自己私底下都唔駛咁慳家，唔知點解返到去工作崗位要為ｄ玻璃門，鐵櫃，拉光纖等煩惱。本來聽日告左假都無得放，算吧啦，ｄ野好多都係我做contact point，自己都唔放心放假。希望星期五無乜突發野可以放得成。

聽日仲約左PCCW & Chubb上黎開會，淨係為我地搬左去Devon而佢地仲未搬過Lincoln嗰一個月transition period既電話同server點過度都搞到好頭痕。

仲要睇緊ｄ年尾條數，如果淨係掛住搞搬屋而唔到數，無人會可憐架。

SPA

太攰，book左去合和做body massage。因為個body師要遲到，所以送15分鐘Jet Spa。浸完再按，焗埋sauna再沖埋涼出黎簡直.............完全唔記得朝早自己拜左２個鐘山囉。今日條女幾大力吓，開始體會烏烏比我按摩時既感受；下次都係細力ｄ先。

同Carmen比Annie個死野拉左去藍灣半島食西餐。山長水又遠。佢勁sell嗰度ｄ cheesecake，其實都唔係好特別啫，估唔度個商場咁細就真。

拜山

一年兩次，好似遠足一樣。鑽石山(曾祖母)，黃大仙藏法寺(二伯)，長沙灣天主教墳場(爺爺，嫲嫲同今年新增既唐大嫂）；好彩我老豆擺左喺梁師奶屋企，去少一轉。細個時就周圍去拜年；而家年就唔駛拜，反而山就越來越多。

通常我只係一年見我ｄ堂妹兩次，就係清明同重陽。ｄ長輩移晒民，得我地幾個做大代表；身附重任，唔去都唔得啦。

以前去鑽石山拜山好開心架，有脆薄薄燒肉同霎雞蛋食。哈，有一次放學工人五姐問我下午茶想點整隻蛋，我唔識點形容，咪話：好似拜山嗰D蛋囉。五姐馬上話：啋！！

本來叫梁師奶買枝紅色permanent marker油番ｄ字；佢醒到買左枝whiteboard marker!!!真係比佢激死，大佬呀，一落雨ｄ字咪化開晒，好似流血咁囉。又係一個唔好靠人既例證。

我其實返左香港呢幾年拜山都幾pro。有一年見鑽石山個墳有裂縫，叫老豆喺Canandian Tire買枝cement gun比我上去修補。雖然一開始大頭蝦唔知要剪開個窿，攪到係墳前打長途電話求救外；自問真係修得幾掂架。d 山狗仲望住我忙到一頭汗，以為我同佢地搶飯食添。

去藏法寺時見到有人帶埋隻西施狗去；仲坐係架成＄1900既手推狗車車(BB車都未必要咁貴！）。一問之下，原來狗狗已經12歲架啦；去年養開佢既婆婆過左身，所以帶埋佢黎拜。

唐大嫂Cherry比我Daddy早走一個月。之前喺瑪麗Daddy住２０樓，佢１６樓。佢比我Daddy辛苦，成日食好多止痛藥。死時得４０歲；睇見佢咁，做人都真係幾化架。

身水身汗，的左梁師奶去The Sun食埋野至放佢走。

唔夠$$$$$$$$

當然唔係講我，係搬屋既裝修費。

個quote出左黎成46萬，但我既capital expense連30萬都無。咁大差距，點cut呀？! Charles話最好搬埋而家用緊d門過去可以慳到幾萬喎。唔係fa？我真係驚個pantry會無sink盆囉；拉條喉都幾皮野架嘛。但如果比隔離見到我喺廁所洗杯，顏面何存；仲駛出黎行既？！唔通真係要屈ｄ代理，廣告公司捐錢比我地整sink盆？！（歡樂滿「惠氏」，整番個捐獻箱先！）

老細要個Floor Plan大執；改唔緊要，但最怕延誤開工，令我地12/1搬唔走就大大鑊啦。

P.S. 都夠忙架啦，成朝仲要應酬３隻澳洲Supply Chain既鬼佬加件Interphil既肥婆。一齊lunch後我就一腳伸佢地返酒店。

P.P.S. Starbucks今晚好似街市咁；連ｄ蛋糕都所餘無幾。我地坐到打佯至走。聽朝唔夠７小時我又去隊杯啡至去拜山。真係應該買吓Starbucks d 股票；每月我都放低成千蚊比佢啦。

收到成績報告

因為Daddy既關係，係「重返校園計劃」助學左８個廣西既小學生。係郵箱收到2004/2005下學期既成績報告，屈指一算，都第４個年頭喇。

當初老豆係加拿大睇無線既唔知「星期幾檔案」，見到廣西山區ｄ小朋友為左讀書，日日要行好遠路去返學，大為感動。吩咐我代佢助學。但最攪野係唔記得個慈善團體既名。攪到我要打電話比無記既sales去問製作部至搵到。

每年都會寄ｄ成績表，相片同手畫既公仔黎。不過唔知是否巧合，８個都係男生。相信同重男輕女有關。呢樣我就唔係咁鍾意。有兩個已經小六，明年一定要指明要ｄ女生先。

有興趣既，可去：http://w3.hkcc.org.hk/bts/020.asp

鬱悶

持續左個多星期。

完全係自己問題。與其解決唔到，唯有放棄。

可能要違背一個承諾..........

Rain Concert

陪Connie去睇佢既新歡。

個concert喺會展Hall 3攪，我地坐紅區H行，都唔算太遠。起碼睇唔清楚個樣都見到佢跳舞。不過就差不多全程罰企。氣氛？咁多靚妹，當然好啦。估唔到連林峰都有去捧場。

同一月韓國演唱會既DVD差不多９０％一樣。當然勁舞＋露肉唔少得。連背境，煙花同灑水效果都直搬過黎。全場又跳又唱live接近２小時。不得不承認：He's a good performer and he got a nice body。比較意外既就係佢英文幾好架；講得快之餘，咬字清晰兼有ｄ美國音。可能同佢師父JY Park一樣成口美國英文有關。JYP講野嗰陣Nel Nel彈出黎做翻譯；好心人地ｄ英文講得咁好就死返入去啦，又唔係譯得傳神。

雖然我唔係好知佢唱乜，but overall a pretty good show。

NANA - 世上的另一個我

剛開始睇呢套漫畫，係講兩個背景性格徊異既女仔，娜娜同奈奈 (日文都讀"Nana") 機緣巧合做左flatmate；互相扶持既故事。

如果可以有個咁好既患難知己，真係好似搵到世上既另一個自己咁。

不過我份人鍾意保留番一d自我，如果有人咁close，感覺反而幾恐怖。

中島美嘉扮演既電影版娜娜真係幾神似架。

電車男 - 電影版

晨早流流出左皇室睇早場。

電影版比電視版簡短好多，都唔明點解個醜男約會5次就可以溝到個靚女OL。老實講，中谷美紀扮演既"愛瑪士"小姐比起電視版既伊東美咲老好多。

電影版

電視版

d配角好多都熟口熟面，最囉膽係With Love既女主角田中美里竟然做Benoist Tea Room既waitress; 撞鬼!!

呢個故仔，我已經睇左電視，電影同漫畫；小說剛買左未開。差在未飛埋過日本睇武田真治既舞台劇咋。

期待下個月上既NANA電影。

搬屋

一早過去Oxford開生日會；Wyeth終於都宣佈左搬屋。其實我諗好多人都心中有數；見d經理們成日神神秘秘咁開會，又帶contractors度來度去，八九不離十啦。

ｄ紙箱下星期三就到　(哥仔，幫襯唔到你地嗰ｄ$4.4同 $6.6，唔好意思！），又要用ｄ空餘時間去執野喇。好在上年啱啱執過，扔棄左好多野，今次應該無咁大鑊呱。

希望新office工程盡快開工，可以早ｄ搬過去。否則佢地一開始喺Lincoln動工，我地頂得順ｄ噪音都頂唔順ｄ天拿水啦。日日high天，office又開唔到窗，容乜易令智商本來都唔高既我，創歷史新低架？！

下午因為某個衰人既大意，我要徙時間落倉再點一Lot漏網之魚；哼，仲要比人話賺到啦，可以早半個鐘頭收工。

開會開會開會.......N次方

唔同既vendors, 唔同既projects, 唔同既細節，但一樣趕既deadline。我由一個marketing manager 再一步進化(定係退化？)變成一個集marketing, admin, clerk, courier於一身既超級大打雜。 由floor plan, 保安系統，電話光纖，報價，到pantry 有無sink盤都要理埋。一朝坐低對住ｄE-mails都唔知覆邊個先。長覆長有。

下午只係"兼職"同agency開會討論2006 Media Plan。呢瓣我比較有信心，而且同Maxus條team夾左咁多年，一早建立左默契。Explore吓D唔同媒體落廣告既效益，我覺得好好玩。起碼我終於都有返ｄ做番自己既感覺。

呢幾年既Q4都唔知係唔係受咀咒，一定有ｄ野發生而會另我好唔得閒。往好方面諗，都睇怕無幾多個同行有我睇既scope咁大囉，由最大條數到最瑣碎既野都關我事。勁！！

Buffet

下午食唔飽，加上一肚氣，勁餓。好彩趕得切出灣仔Novotel同廖太們食buffet。

Annie個衰婆為左佢至愛既蟹腳（唔係Jerry) ，問左個waiter幾次，攪到個部長但凡有蟹腳出都黎同佢講，差在未拎埋黎比佢揀完至擺出去。

終於收到隻日本秋葉版tumbler, 唔該晒奶奶！